Rudy Santosa
Country General Manager
Kalbe International Myanmar Co Ltd
ပညာအရည်အချင်းနဲ့ လုပ်ငန်းအတွေ့အကြုံ . . .
ကျွန်တော်က Financial Management ၊ Capital Market တို့နဲ့ Master Degree ၊ MBA ဘွဲ့တွေကို အင်ဒိုနီးရှားနိုင်ငံမှာ ရရှိခဲ့ပါတယ်။ လုပ်ငန်းအတွေ့အကြုံအနေနဲ့ အင်ဒိုနီးရှားနိုင်ငံမှာရှိတဲ့ Distribution ကုမ္ပဏီတစ်ခုမှာ ခြောက်နှစ်ခွဲ အလုပ်လုပ်ခဲ့ပြီး ၂၀၀၇ ခုနှစ်မှာ Kalbe ကုမ္ပဏီမှာ အလုပ်ဝင်ခဲ့ပါတယ်။ ကျွန်တော့်အနေနဲ့ ကမ္ဘောဒီးယား၊ လာအိုနဲ့ မြန်မာနိုင်ငံတို့မှာ စီမံခန့်ခွဲရေးနဲ့ ဈေးကွက်ထိုးဖောက်ဖို့အတွက် တာဝန်တွေ ထမ်းဆောင်နေပါတယ်။
Kalbe International ကုမ္ပဏီနဲ့ပတ်သက်ပြီး အနည်းငယ်လောက် ပြောပြပေးပါ . . .
Kalbe Pharmaceutical ကုမ္ပဏီကို ၁၉၆၆ ခုနှစ်မှာ စတင်တည်ထောင်ခဲ့တာဖြစ်တဲ့အတွက် ဒီနှစ်နဲ့ဆိုရင် နှစ်ပေါင်း ၅၀ ရှိပြီဖြစ်ပါတယ်။ ကျွန်တော်တို့ကုမ္ပဏီဟာ အင်ဒိုနီးရှားကုမ္ပဏီဖြစ်ပေမဲ့ စင်ကာပူမှာ အခြေစိုက်ပြီး ရုံးချုပ်ဖွင့်လှစ်ထားပါတယ်။ ကုမ္ပဏီဟာ အဓိကအနေနဲ့ ဆေးဝါးနဲ့ ကျန်းမာရေးစောင့်ရှောက်မှုပစ္စည်းတွေကို ထုတ်လုပ်ရောင်းချနေပါတယ်။ အခုအခါမှာတော့ Nutrition နဲ့ပတ်သက်တဲ့ ကုန်ပစ္စည်းတွေထိ လုပ်ငန်းကို ချဲ့ထွင်ထားပါတယ်။ မြန်မာနိုင်ငံမှာ ကျွန်တော်တို့ရဲ့ ကုန်ပစ္စည်းတွေကို ၁၉၉၁ ခုနှစ်မှာ စတင်တင်ပို့ခဲ့တာကြောင့် အခုဆိုရင် ၂၅ နှစ် ရှိနေပြီဖြစ်ပါတယ်။ ကျွန်တော်တို့ရဲ့ ကုန်ပစ္စည်းတွေကို အင်ဒိုနီးရှားနိုင်ငံကနေ မြန်မာနိုင်ငံကို လေကြောင်း၊ ရေကြောင်းအမျိုးမျိုးနဲ့ တင်ပို့နေပါတယ်။
မြန်မာပြည်မှာ စီးပွားရေးလုပ်ငန်းတွေအတွက် တကယ်ကို အလားအလာကောင်းတဲ့ ဈေးကွက်တစ်ခုဖြစ်တာကြောင့် ကျွန်တော်တို့ရဲ့ စီးပွားရေးလုပ်ငန်းတွေကို ဒီမှာလာရောက်စတင်ဖြစ်ခဲ့တာပါ။ တဖြည်းဖြည်းနဲ့ ကျွန်တော်တို့ရဲ့ စီးပွားရေးလုပ်ငန်းတွေဟာ အောင်မြင်လာတာကြောင့် ၂၀၀၁ ခုနှစ်ကနေစပြီး မြန်မာပြည်မှာ ကုမ္ပဏီရဲ့လုပ်ငန်းစဉ်တွေကို ဆောင်ရွက်နိုင်ဖို့ Representative Office ဖွင့်ပြီး တာဝန်ရှိသူတစ်ယောက်ကို စေလွှတ်ခဲ့ပါတယ်။ ဒါဟာ ၁၉၉၁ ခုနှစ်ကနေပြီးတော့ ၂၀၀၁ ခုနှစ်ထိ မြန်မာပြည်ကို ကျွန်တော်တို့က ကုန်ပစ္စည်းတွေပဲ တင်ပို့နေတယ်လို့ ဆိုလိုချင်တာ ဖြစ်ပါတယ်။ အဲဒီအချိန်က ကျွန်တော်တို့ရဲ့ လုပ်ငန်းစဉ်တွေကို ဝန်ထမ်းနှစ်ယောက်နဲ့ ဆောင်ရွက်ခဲ့ပါတယ်။
ကျွန်တော်တို့ Kalbe Pharma ကုမ္ပဏီဟာ အရှေ့တောင်အာရှမှာတော့ အကြီးဆုံး Public ကုမ္ပဏီဖြစ်ပါတယ်။ ကျွန်တော်တို့ရဲ့ လုပ်ငန်းဟာ ကမ္ဘာတစ်ဝန်းမှာ ရင်းနှီးမြှုပ်နှံငွေပေါင်း အမေရိကန်ဒေါ်လာ ၁.၆ ဘီလီယံ ရှိပါတယ်။ နိုင်ဂျီးရီးယား၊ သီရိလင်္ကာ၊ တောင်အာဖရိက၊ အာဖရိကစတဲ့ နိုင်ငံပေါင်းဆယ်နိုင်ငံမှာ
Representative Office တွေဖွင့်ပြီး လုပ်ငန်းတွေကို ဆောင်ရွက်နေပါတယ်။ ဒါပေမဲ့ ကုန်ပစ္စည်းတွေ တင်ပို့နေတာကတော့ နိုင်ငံပေါင်း ၄၀ ရှိပါတယ်။
Kalbe ကုမ္ပဏီမှာ ဝင်ရောက်လုပ်ကိုင်ဖြစ်ပုံ . . .
ကျွန်တော် ဒီကုမ္ပဏီမှာ ၂၀၀၇ ခုနှစ်ကနေစပြီး ဝင်ရောက်လုပ်ကိုင်ဖြစ်ခဲ့တာကြောင့် အခုဆိုရင် ဆယ်နှစ်နီးပါးလောက် ရှိနေပြီဖြစ်ပါတယ်။ ဒီကုမ္ပဏီမှာ စစချင်း တာဝန်ထမ်းဆောင်ခဲ့တုန်းက ကမ္ဘောဒီးယားမှာ ကျွန်တော့်ကို ခန့်အပ်တာခံခဲ့ရပါတယ်။ အဲဒီမှာ နှစ်နှစ်ခွဲလောက် တာဝန်ထမ်းဆောင်ခဲ့ပြီး မြန်မာပြည်ကို ၂၀၀၉ ခုနှစ်မှာ ပြောင်းရွှေ့တာဝန်ထမ်းဆောင်ခဲ့ရပါတယ်။ အခုဆိုရင် ကျွန်တော်မြန်မာပြည်မှာ တာဝန်ထမ်းဆောင်တာ ခုနစ်နှစ်ရှိပြီဖြစ်ပါတယ်။
ကျွန်တော်မြန်မာပြည်ကို ပထမဆုံးတစ်ခေါက် လာတုန်းက မြန်မာပြည်နဲ့ပတ်သက်လို့ ဘာမှမသိထားပါဘူး။ မြန်မာပြည်ဟာ ကျွန်တော့်အတွက် တော်တော့်ကို ထူးဆန်းနေပါတယ်။ ဘာလို့ မြန်မာပြည်မှာ အလုပ်လုပ်ရမှာလဲလို့တောင် ကိုယ့်ကိုယ်ကိုယ် ပြန်မေးမိခဲ့ပါတယ်။ ဒါပေမဲ့နောက်ပိုင်း ကျွန်တော်မြန်မာပြည်နဲ့ပတ်သက်ပြီး အချက်အလက်တွေ၊ သတင်းတွေ စတာတွေကို လေ့လာတယ်။ အင်တာနက်ကနေလည်း ရှာပြီးတဲ့အခါမှာ မြန်မာပြည်ကို မိသားစုလိုက်လာရောက် အခြေချနေထိုင်ဖို့ ဆုံးဖြတ်လိုက်ပါတယ်။ မြန်မာနိုင်ငံဟာ တခြားနိုင်ငံတွေနဲ့ တော်တော့်ကို ကွာခြားပါတယ်။ ပထမဆုံးအကြိမ် မြန်မာပြည်ကိုလာတုန်းက အခြေအနေတွေက အခုလိုမျိုးမဟုတ်ပါဘူး။ အဲဒီတုန်းက ကားတွေ သိပ်မရှိဘူး။ အင်တာနက်လိုင်းက မကောင်းဘူး။ တယ်လီဖုန်း Sim Card တွေတောင် ကျွန်တော် ဒီကိုစလာတုန်းက ဒေါ်လာ ၁,၅၀၀ ပေးရပါတယ်။ ခုတော့တော်တော်လေး ဈေးကျသွားပါပြီ။ ဒါပေမဲ့ ဒေါ် လာ ၁,၅၀၀ ဆိုတာ တော်တော့်ကိုများတဲ့ပမာဏ ဖြစ်ပါတယ်။ ဒါပေမဲ့ ဖုန်းလိုင်းတွေ၊ အင်တာနက်လိုင်းတွေကျတော့ တော်တော့်ကို ဆိုးဆိုးရွားရွားပါပဲ။ ကျွန်တော့်အနေနဲ့ အဲဒီတုန်းက လမ်းပန်းဆက်သွယ်ရေးကိုတော့ တော်တော်သဘောကျပါတယ်။ ဘာလို့လဲဆိုရင် အဲဒီတုန်းက ကားတွေနည်းနည်းပဲရှိပြီး လမ်းတွေကလည်း ကျယ်တယ်၊ လမ်းလည်းမပိတ်တာတွေကြောင့် ဖြစ်ပါတယ်။ ၂၀၀၉ ခုနှစ်၊ ကျွန်တော် မြန်မာပြည်ကို စရောက်လာပြီးနောက်ပိုင်းမှာ မြန်မာပြည်ရဲ့ စီးပွားရေးဟာလည်း တိုးတက်လာပါတယ်။ ၂၀၁၀ ပြည့်နှစ်ကနေ စပြီး မနှစ်ကအထိ စီးပွားရေးဟာ ကြောက်ခမန်းလိလိကို တိုးတက်လာတာကို တွေ့ရပါတယ်။ ဒါကြောင့် မြန်မာပြည်ဟာ စီးပွားရေးလုပ်ငန်းတွေအတွက် သိပ်ကိုအလားအလာကောင်းတဲ့ နိုင်ငံဖြစ်တယ်လို့ ပြောတာဖြစ်ပါတယ်။
ဝန်ထမ်းတွေကို Training ပေးရာမှာ တွေ့ကြုံရတဲ့ အခက်အခဲတွေနဲ့ စိန်ခေါ်မှုတွေ . . .
လုပ်ငန်းခွင်မှာ ကျွန်တော်တို့တွေအတွက် အရေးကြီးဆုံးတစ်ခုက ကိုယ့်ရဲ့ဝန်ထမ်းတွေရဲ့ အရည်အချင်းတွေ တိုးတက်လာအောင် ပြုလုပ်ပေးဖို့ ဖြစ်ပါတယ်။ ဒါမှ ကျွန်တော်တို့ ရည်မှန်းထားတဲ့ ပန်းတိုင်ကို အလွယ်တကူနဲ့ ရောက်နိုင်မှာဖြစ်ပါတယ်။ ကျွန်တော်တို့က အလုပ်တွေအားလုံးကို တစ်ယောက်တည်းမလုပ်နိုင်ပါဘူး။ ဒါကြောင့် ကျွန်တော်တို့ရဲ့ ဝန်ထမ်းတွေရဲ့ အရည်အချင်းတွေ တိုးတက်အောင် လိုအပ်တာတွေကို ပံ့ပိုးပေးရပါတယ်။ ကျွန်တော့်အနေနဲ့ကတော့ ကျွန်တော့်လူတွေကို မန်နေဂျာဖြစ်ဖို့ထက် ဦးစီးနိုင်တဲ့သူတွေဖြစ်ဖို့ ရည်ရွယ်ထားပါတယ်။ ဒါမှသူတို့အနေနဲ့ တစ်နေ့မှာ ကျွန်တော့်နေရာကို အစားယူနိုင်မှာဖြစ်ပါတယ်။ ကျွန်တော်က မြန်မာပြည်မှာ အမြဲတမ်းနေသွားမှာ မဟုတ်တဲ့အတွက် ကျွန်တော့်ရဲ့ဝန်ထမ်းတွေကို ကျွန်တော့်နေရာကို ရယူနိုင်အောင်၊ အောင်မြင်တဲ့လူတွေဖြစ်အောင် လိုအပ်တာတွေကို ပံ့ပိုးပေးနေပါတယ်။ ကျွန်တော်လိုပဲ တခြားစီမံခန့်ခွဲမှုလုပ်နေတဲ့ လူတွေအနေနဲ့လည်း ကိုယ့်ဝန်ထမ်းတွေရဲ့ အရည်အချင်းတွေ တိုးတက်အောင်၊ Leader တွေဖြစ်အောင် ပံ့ပိုးပေးဖို့လိုပါတယ်။ Leader ဆိုတာ လုပ်ငန်းမှာ ကိုယ့်ရဲ့အကျင့်စာရိတ္တ၊ လုပ်ငန်းခွင် စွမ်းဆောင်နိုင်မှု၊ အရည်အချင်းစတာတွေကို အတုယူပြီး ကိုယ့်နောက်လိုက်မယ့် ဦးဆောင်သူတွေဖြစ်အောင် ပြောတာပါ။ ကိုယ်ကသူဌေးမို့ သူတို့ကိုယ့်စကား နားထောင်ရမယ်ဆိုတာမျိုး ပြောတာမဟုတ်ပါဘူး။ တကယ်တမ်း ကိုယ့်ရဲ့ဝန်ထမ်းတွေကို ဒီလိုမျိုးထိဖြစ်အောင် သင်ကြားဖို့ဆိုတာ မလွယ်ကူတဲ့အတွက် စိတ်တော့ရှည်ရပါတယ်။ ကျွန်တော့်အနေနဲ့ ကိုယ့်ရဲ့ဝန်ထမ်းတွေက တစ်နေ့မှာ ကိုယ့်ထက်ရာထူးကြီးသွားလို့လည်း မနာလိုဖြစ်မယ့်လူစားမျိုး မဟုတ်ပါဘူး။ လုပ်ငန်းမှာ သူတို့တွေ ကိုယ့်ထက်ရာထူးတိုးသွားပြီး တခြားဌာနတွေကို ပြောင်းရွှေ့သွားတယ်ဆိုရင်လည်း ဝမ်းသာနေမှာပါ။ ကျွန်တော့်အနေနဲ့ ဦးစီးဦးဆောင်သူတွေကို မွေးထုတ်နိုင်တယ်ဆိုပြီး ပိုတောင်ဝမ်းသာဦးမှာ ဖြစ်ပါတယ်။ ကျွန်တော့်အနေနဲ့ မြန်မာပြည်မှာ အလုပ်လာလုပ်နေတာဖြစ်တာကြောင့် တတ်နိုင်သမျှ မြန်မာပြည်သူတွေကို အကျိုးပြုနိုင်အောင် ဆောင်ရွက်ပေးမယ်လို့ စိတ်ကူးရှိတာကြောင့်လည်း ကိုယ့်ရဲ့ဝန်ထမ်းတွေ လိုအပ်တာတွေကို ပံ့ပိုးပေးနေတာ ဖြစ်ပါတယ်။
မြန်မာပြည်မှာတွေ့ကြုံရတဲ့ အခက်အခဲတွေနဲ့ စိန်ခေါ်မှုတွေ . . .
မြန်မာပြည်ကို ပထမဆုံးအကြိမ်လာတုန်းက ကျွန်တော့်အနေနဲ့ အခက်အခဲတွေ အများကြီးကြုံခဲ့ရပါတယ်။ အခြေခံအဆောက်အဦပိုင်းနဲ့ လူ့စွမ်းအားအရင်းအမြစ် ရှားပါးတဲ့ပြဿနာနှစ်ခုကို ကျွန်တော်ရင်ဆိုင်ခဲ့ရပါတယ်။ နောက်ပြီး အဲဒီအချိန်တုန်းက လျှပ်စစ်မီး၊ အင်တာနက်လိုင်းနဲ့ ဖုန်းလိုင်းတွေက မကောင်းပါဘူး။ အင်ဒိုနီးရှားမှာရှိနေတဲ့ ကျွန်တော်တို့ရုံးချုပ်ကို ဆက်သွယ်ဖို့နဲ့ ပြည်ပမှာရှိနေတဲ့ စီးပွားရေးလုပ်ဖော်ကိုင်ဖက်တွေကို ဆက်သွယ်ဖို့ တော်တော်ခဲယဉ်းပါတယ်။ ပြီးတော့ အဲဒီတုန်းက နေဖို့အိမ်ရှာရတာတောင် ခက်တယ်။ ပြီးတော့ ကျောင်းတွေကလည်းရှားတယ်။ ဒါကြောင့် ကျွန်တော့်အနေနဲ့ ကျွန်တော့်ကလေးတွေရဲ့ ပညာရေးအတွက် ကျွန်တော်မျှော်မှန်းထားတဲ့ စံချိန်စံညွှန်းနဲ့ကိုက်ညီတဲ့ပညာရေးရဖို့ စိတ်ပူခဲ့ရပါတယ်။ နောက်ပြီး Business Access နဲ့ပတ်သက်ရင်လည်း အဲဒီအချိန်ကအခက်အခဲတွေ အများကြီးရှိခဲ့ပါတယ်။ အဲဒီအချိန်က သတင်းအချက်အလက်နဲ့ ပတ်သက်ပြီးတော့လည်း ပွင့်လင်းမြင်သာမှု မရှိသေးတဲ့အခါ အားလုံးကို မြန်မာ့နည်းမြန်မာ့ဟန်ကိုသုံးပြီး အဖြေရှာခဲ့ရပါတယ်။ စီးပွားရေး ဘယ်လိုလုပ်မယ်၊ ဒီ Application တွေကို ဘယ်လိုသုံးမယ်စတာတွေကအစ မြန်မာပြည်မှာ လုပ်ငန်းစတင်နေပြီးဖြစ်တဲ့ မြန်မာလုပ်ငန်းရှင်တွေနဲ့ Network ရအောင် ဆောင်ရွက်ဖို့တွေထိ သိအောင် လုပ်ဖို့ခက်ခဲခဲ့ပါတယ်။
တစ်ဖက်မှာလည်း Human Resource နဲ့ ပတ်သက်ပြီးတော့လည်း အခက်အခဲတွေရှိခဲ့ပါတယ်။ လူ့စွမ်းအားအရင်းအမြစ်ဆိုတာကလည်း ကျွန်တော်တို့ရဲ့ စီးပွားရေးလည်ပတ်တဲ့နေရာမှာ အရေးကြီးတဲ့ကဏ္ဍကနေ ပါဝင်နေပါတယ်။ ဒါကြောင့် အချိန်နဲ့အမျှတိုးတက်အောင် ဝန်ထမ်းတွေကို Training ပေးရပါတယ်။ ဒါဟာ ခုအချိန်ထိ စီးပွားရေးလုပ်ငန်းတွေအတွက် အခက်အခဲဖြစ်နေတဲ့ပါတယ်။ ကျွန်တော်တို့ကုမ္ပဏီရဲ့ Culture ၊ ကုမ္ပဏီကသတ်မှတ်ထားတဲ့ စံချိန်စံညွှန်းတွေနဲ့ ကိုက်ညီတဲ့ ဝန်ထမ်းအရေအတွက်က ရှားပါးနေပါသေးတယ်။ ဒါကြောင့် ဝန်ထမ်းတွေကို ကျွန်တော်တို့ကုမ္ပဏီရဲ့ Culture ၊ သတ်မှတ်ထားတဲ့ အရည်အချင်းတွေနဲ့ပြည့်မီအောင် အရင်ဆုံး Training ပေးရပါတယ်။ တစ်ခုကောင်းတာက မြန်မာလူမျိုးတွေဟာ လေ့လာလိုစိတ် ပြင်းပြကြပါတယ်။ ဒါကြောင့်လည်း ကျွန်တော်တို့လုပ်ငန်းက အခုလိုမျိုးအောင် မြင်လာတာဖြစ်ပါတယ်။ ကျွန်တော်နဲ့ ဝန်ထမ်းတွေမှာ တူညီတဲ့ရည်မှန်းချက်ပန်းတိုင် ရှိတာကြောင့် ကျွန်တော်တို့ရဲ့ ရည်မှန်းချက်ပန်းတိုင်တွေ ရရှိအောင်မြင်ခဲ့ပါတယ်။
မြန်မာပြည်ဈေးကွက်ကို ထိုးဖောက်ဖို့ ရင်ဆိုင်ခဲ့ရတာတွေ . . .
စီးပွားရေးနဲ့ပတ်သက်ပြီးတော့လည်း မြန်မာပြည်ဈေးကွက်ကို ထိုးဖောက်ဖို့ အခက်အခဲတွေ ရှိခဲ့တယ်ဆိုပေမဲ့ မြန်မာပြည်မှာ ကျွန်တော်တို့ရဲ့ ပြည်တွင်းလုပ်ဖော်ကိုင်ဖက်တွေရှိတာကြောင့် ဒီအခက်အခဲတွေကို ကျွန်တော်တို့ ကျော်လွှားနိုင်ခဲ့ပါတယ်။ သူတို့က မြန်မာပြည်မှာ လုပ်ငန်းစတင်နေတာ အနှစ် ၂၀ ကျော် သက်တမ်းရှိနေပြီဖြစ်တာကြောင့် ဈေးကွက်အနေအထားကို ကောင်းကောင်းနားလည်နေတဲ့အတွက် သူတို့တွေက ကျွန်တော်တို့ ကုန်ပစ္စည်းတွေ ဈေးကွက်ကိုထိုးဖောက်ဖို့ ဆောင်ရွက်ပေးပါတယ်။ တခြားအခက်အခဲတွေလည်း ရှိခဲ့တယ်ဆိုပေမဲ့ ကျွန်တော်တို့ရဲ့ Distributor တွေနဲ့အတူ ရင်ဆိုင်ဖြေရှင်းနိုင်ခဲ့ပါတယ်။ မြန်မာပြည်မှာ ပြည်တွင်းလုပ်ဖော်ကိုင်ဖက်ငါးယောက်ဟာ ကျွန်တော်တို့ရဲ့ ကုန်ပစ္စည်းတွေကို စတင်တင်ပို့ခဲ့တဲ့ ၁၉၉၁ ခုနှစ်တည်းက ရရှိနေခဲ့တာဖြစ်ပါတယ်။ ဒီပါတနာတွေကပဲ ကုန်ပစ္စည်းတွေကို မြန်မာပြည်အနှံ့ ဖြန့်ချိပေးနေပါတယ်။ နောက်ထပ်လည်း ကျွန်တော်တို့ရဲ့ ကုမ္ပဏီ Culture နဲ့ ကိုက်ညီတဲ့ ကျွန်တော်တို့နဲ့ ပူးပေါင်းလုပ်ချင်တဲ့ ပါတနာတွေရှိရင်လည်း လက်တွဲလုပ်ကိုင်သွားမှာဖြစ်ပါတယ်။
Kalbe Myanmar အနေနဲ့ Business Turnover ဘယ်လောက်ရှိပါသလဲ . . .
ကျွန်တော်တို့က Rep Office ဖြစ်တာကြောင့် Kalbe Myanmar က ကုန်သွယ်ရေးနဲ့ပတ်သက်တဲ့ စီးပွားရေး ဘာမှမလုပ်ပါဘူး။ ကျွန်တော်တို့က ဈေးကွက်ရှာဖွေရေးနဲ့ သုတေသနလုပ်ငန်းတွေကိုပဲ လုပ်ပါတယ်။ တကယ်တမ်း စီးပွားရေးအကျိုးအမြတ်လုပ်ငန်းစဉ်မှာတော့ Kalbe Singapore က မြန်မာပြည်မှာရှိတဲ့ ကျွန်တော်တို့ရဲ့ စီးပွားရေးလုပ်ဖော်ကိုင်ဖက်တွေကို Export လုပ်ပါတယ်။
မြန်မာပြည်က စီးပွားရေးလုပ်ငန်းရှင်တွေကို ပြောချင်တာရှိရင် . . .
မြန်မာပြည်မှာ ကျန်းမာရေးဝန်ဆောင်မှုလုပ်ငန်းက တကယ်ကို အလားအလာရှိတယ်လို့ ကျွန်တော်ယုံကြည်ပါတယ်။ ကျွန်တော့်အမြင် ၂၀၁၈ ခုနှစ်လောက်မှာဆိုရင် မြန်မာနိုင်ငံရဲ့ Healthcare Sector ဟာ ဈေးကွက်တန်ဖိုး အမေရိကန်ဒေါ်လာ တစ်ဘီလီယံဖိုးလောက်ထိ ရှိလာနိုင်ပါတယ်။ ကျန်းမာရေးလုပ်ငန်းကဏ္ဍနဲ့ ပတ်သက်ပြီး အစိုးရရဲ့အာရုံစူးစိုက်မှုကလည်း တိုးတက်လာတာကို တွေ့ရပါတယ်။ ဒါဟာ ပြည်သူတွေအတွက် သတင်းကောင်းဖြစ်သလို ကျွန်တော်တို့လို ကျန်းမာရေးလုပ်ငန်းကဏ္ဍက လုပ်ငန်းရှင်တွေအတွက်လည်း အခွင့်အလမ်းကောင်းဖြစ်ပါတယ်။ မြန်မာနိုင်ငံမှာ အာဟာရဓာတ်စာနဲ့ပတ်သက်တဲ့ ကုန်ပစ္စည်းတွေရဲ့ ၉၅ ရာခိုင်နှုန်းလောက်က နိုင်ငံခြားက တင်သွင်းနေတာကို တွေ့ရပါတယ်။ မြန်မာပြည်မှာ ကျွန်တော့်အထင် ဓာတ်စာထုတ်လုပ်ဖို့အတွက် လိုင်စင်ကျထားတဲ့ ကုမ္ပဏီ ၇ ခုလောက် ရှိပေမဲ့ တကယ်တမ်းတစ်ခု၊ နှစ်ခုလောက်ကပဲ အမှန်တကယ် ထုတ်လုပ်နေပါတယ်။ နောက်ပိုင်းမှာဆိုရင်တော့ ဆေးဝါးနဲ့ ဓာတ်စာထုတ်လုပ်ရောင်းချတဲ့ ကုမ္ပဏီတွေ ပိုများလာမယ့် အလားအလာလည်း ရှိနေပါတယ်။
မြန်မာပြည်ကို Product ဘယ်နှစ်မျိုးလောက် တင်သွင်းနေပါသလဲ . . .
မြန်မာပြည်မှာ Prescription ၊ Over the Counter ၊ Nutritional ၊ Consumer စတဲ့ ကုန်ပစ္စည်းအမျိုးပေါင်း ၈၀ လောက်ကို တင်ပို့နေပါတယ်။
Kalbe International မှာရှိတဲ့ ဝန်ထမ်းအရေအတွက် . . .
Kalbe International မှာ ဝန်ထမ်းစုစုပေါင်း ၁၇,၀၀၀ ခန့်ရှိပါတယ်။ Research and Development (R&D) ဌာနကတော့ အင်ဒိုနီးရှားနိုင်ငံမှာ ရှိပါတယ်။ မြန်မာပြည်မှာကတော့ ကျွန်တော်တို့က Rep Office ပဲ ဖြစ်တာကြောင့် ဝန်ထမ်းအနေနဲ့ ခြောက်ယောက်ပဲရှိပါတယ်။ ဒါပေမဲ့ ကျွန်တော်တို့ရဲ့ ကုန်ပစ္စည်းတွေကို ဖြန့်ချိပေးနေသူတွေမှာတော့ ဝန်ထမ်းတွေအများကြီး ရှိပါတယ်။
ဘာစာအုပ်တွေဖတ်ဖြစ်ပါသလဲ . . .
နောက်ဆုံး ကျွန်တော်ဖတ်ဖြစ်တာကတော့ John Maxwell ရေးထားတဲ့ စီမံခန့်ခွဲမှုနဲ့ပတ်သက်တဲ့ စာအုပ်ပါ။ ကျွန်တော့်အနေနဲ့ ကိုယ့်ရဲ့အရည်အချင်း တိုးတက်စေတဲ့စာအုပ်မျိုးတွေ၊ စီမံခန့်ခွဲမှုနဲ့ပတ်သက်တဲ့ စာအုပ်တွေ၊ ကျင့်ဝတ်နဲ့ပတ်သက်တဲ့ စာအုပ်တွေကို ဖတ်ရတာ သဘောကျပါတယ်။
ကိုယ့်ရဲ့စံပြပုဂ္ဂိုလ် . . .
ကျွန်တော့်ရဲ့ စံပြပုဂ္ဂိုလ်က ဘုရားသခင်ဖြစ်ပါတယ်။
ဆောင်ပုဒ် . . .
ဒါက ကျွန်တော့်အတွက်တော့ တော်တော်ခက်ခဲတဲ့ မေးခွန်းပါပဲ။ ကျွန်တော့်မှာ ဆောင်ပုဒ်ရယ်လို့တော့ တိတိကျကျ မရှိပါဘူး။ ဒါပေမဲ့ ဘုရားသခင်ရဲ့ ကျေးဇူးတော်ကြောင့်သာ ကျွန်တော်ရှင်သန်ခွင့်ရတဲ့အတွက် ဘုရားသခင်ကို ကျေးဇူးတင်ပါတယ်လို့တော့ ပြောလေ့ရှိပါတယ်။
စီးပွားရေးလုပ်ငန်းရှင်တွေကို အကြံပြုချင်တာရှိရင် . . .
စီးပွားရေးလုပ်မယ်ဆိုရင် တတ်နိုင်သမျှ ကိုယ့်ရဲ့ Network ကို ကြီးအောင်လုပ်ပါ။ စာဖတ်ပါ။ အခွင့်အလမ်းတွေကို အမြဲရှာဖွေပါ။ အခက်အခဲတွေ၊ စိန်ခေါ်မှုတွေကို မရှာဖွေပါနဲ့လို့ ပြောချင်ပါတယ်။
ကိုဒီ
