အုန်းအုန်းကျွက်ကျွက် တိုက်ဂါး

ယခုနှစ်ဧပြီလတွင် နှစ်စဉ်ကျင်းပနေကျ မာစတာစ်ဂေါက်သီးပြိုင်ပွဲကြီးက မကျင်းပဖြစ်တော့ပါ။ Covid 19 ကို ကြောက်၍ဖြစ်ပါသည်။ မာစတာစ်အကြောင်းတွေးမိသည်နှင့် တိုက်ဂါးအကြောင်း သတိရကြစမြဲပါ။ သူကလက်ရှိချန်ပီယံဖြစ်ပါသည်။ ယမန်နှစ်က သူဗိုလ်စွဲလိုက်သည့်အခါ ဂေါက်သီးရာဇဝင်၌ အကြီးကျယ်ဆုံးသောပြန်လည်နိုးထအောင်ပွဲရမှုကြီးဟု အားလုံးက သတ်မှတ်ခဲ့ကြသည်။ ဂေါက်သီးတွင်သာမဟုတ်ပါ။ အားကစား လောကပေါင်းစုံအတွင်းတွင်ပင် အကြီးကျယ်ဆုံး၊ အကောင်းဆုံးအောင်ပွဲဟု ချီးကျူးဂုဏ်ပြုခြင်း ခံခဲ့ရပါသည်။

မာစတာစ်အကြောင်းတွေးတိုင်း တိုက်ဂါးကိုသတိရခြင်းမှာ သူကဤပွဲကြီးအား ငါးကြိမ် အောင်ပွဲရခဲ့၍လည်း ဖြစ်ပါသည်။ သူထက်အကြိမ်များသူဟူ၍ ခြောက်ကြိမ် ဗိုလ်စွဲခဲ့သူ ဂျက်ခ်နစ်ကလပ်စ်သာ ရှိပါသည်။ ပြန်လည်နိုးထအောင်ပွဲရမှုဟု ဆိုရသည်မှာလည်း တိုက်ဂါးက ၁၉၉၇ မှ ၂၀၀၈ နှစ်အထိ သူ့အသက် ၂၁ နှစ်မှ ၃၂ နှစ်အရွယ်၊ နှစ် ပေါင်း ၁၂ နှစ်အတွင်းတွင် မေဂျာပွဲကြီး ၁၄ ပွဲ ဗိုလ်စွဲခဲ့ပြီးနောက် ၁၁ နှစ်ကြာ မေဂျာအောင်ပွဲကြီးများနှင့် ဝေးကွာခဲ့ပြီးမှ ၂၀၁၉ ခုနှစ် မာစတာစ်အား အောင်နိုင်ခဲ့ခြင်းကြောင့် ဖြစ်ပါသည်။ ဆယ်စုနှစ်တစ်ခုပင် ကျော်ခဲ့ပါပြီ။ ဤသို့အောင်ပွဲနှင့် ဝေးကွာခဲ့သော ဆယ်စုနှစ်တစ်ခုအား တိုက်ဂါးက အုံးအုံးကျွက်ကျွက်တိုင်းသိပြည်သိ သိက္ခာကျ အရှက်ရခဲ့ခြင်းဖြင့် စတင်ခဲ့ရခြင်းပါ။ အများသူငါ၏တံတွေးခွက်တွင် ပက်လက်မျောခဲ့သည့်အခြေအနေ၊ လူတောမ တိုးရဲသည့်အနေအထားမှ သူအလွန်ဝါသနာကြီးလှသော ဂေါက်သီးတွင်အောင်ပွဲပြန်ရရန် ရုန်းကန်ကြိုးပမ်းအောင်နိုင်ခဲ့ခြင်းလည်း ဖြစ်ပါသည်။

ကားတိုက်မှုတစ်ခုမှစကာ တိုက်ဂါး၏ ဖောက်ပြန်မှုပေါ်ပေါက်ခဲ့ခြင်းပါ။ အချိန်က ၂၀၀၉ ခုနှစ်၊ နိုဝင်ဘာလ ၂၇ ရက် လင်းအားကြီးအချိန်ဖြစ်ပါသည်။ အိမ်မှမောင်းထွက်လာသော တိုက်ဂါး၏ကားသည် သူ့ရပ်ကွက်လမ်းတွင်သာ ရှိသေးစဉ်မှာပင် အရှိန်လွန်ကာ လမ်းပခုံးဘောင်ကိုကျော်၍ ပန်းအလှပင်လမ်းလယ် စက်ဝိုင်းကျွန်းကိုပါ ဖြတ်သန်းသွားခဲ့သည်။ ယင်းနောက် မီးသတ်ရေပေးငုတ်တိုင်ကိုပါ ဆက်တိုက်ခဲ့ပြီး အိမ်နီးနားချင်းခြံမှ သစ်ပင်ကိုဝင်တိုက်သည့်အခါတွင်မှ ရပ်သွားပါသည်။ ကားတိုက်သံများကြား၍ တိုက်ဂါး၏ဇနီးသည်က ထွက်ကြည့်ရာ အခြေအနေကိုတွေ့၍ ရဲများကို ခေါ်ယူအကူအညီတောင်းခဲ့ရသည်။ တိုက်ဂါးမှာ မှန်ကွဲမှန်စများကြားတွင် လဲကျနေခဲ့ပြီး သူ့နဘေးတွင်လည်း အနာသက်သာစေသော ဆေးများနှင့် ညအိပ်မပျော်ပါက သောက်သည့်ဆေးများကို တွေ့ခဲ့ကြရသည်။ သူက သတိမေ့နေခဲ့ပြီး လူနာတင်ယာဉ်ဖြင့် ဆေးရုံသို့ပို့ဆောင်ခဲ့ရသည်။

ဤအဖြစ်အပျက်သည် ဇနီးသည်ဖြစ်သူ အဲလင်းကတိုက်ဂါး၏ အိမ်ထောင်ရေးဖောက်ပြန်မှုကို သိရှိခဲ့ပြီး အချိန်အနည်းငယ်အကြာတွင် ဖြစ်ခဲ့ခြင်းပါ။ အချိန်က တိုက်ဂါးသြစတြေးလျမှ ပြန်ရောက်ခါစလည်းဖြစ်သည်။ ထိုနှစ်နိုဝင်ဘာလ ၁၅ ရက်နေ့က သြစတြေးလျ မာစတာစ်အား တိုက်ဂါးဗိုလ်စွဲခဲ့သည်။ ထိုအချိန်ကတည်း က National Enquirer မဂ္ဂဇင်းက တိုက်ဂါးနောက်သို့ တောက်လျောက်အနံ့ခံလိုက်နေခဲ့ပါသည်။ အဆိုပါ အမေရိကန်မဂ္ဂဇင်းသည် Celebrity Magazine တစ်စောင်ဖြစ်ပြီး တိုက်ဂါး၌ ရေချယ်ယူချီတယ်အမည်ရှိ လျို့ဝှက်မိန်းကလေးအဖော်ရှိနေသည်ဟု သံသယရှိနေခဲ့သည်။ တိုက်ဂါးက သြစတြေးလျမှ ပြန်ရောက်သည့်အခါ သူ့ဇနီးကို ထိုမဂ္ဂဇင်းက သူနှင့်ယူချီတယ်တို့ ဇာတ်လမ်းကို ဖော်ပြချင်ဖော်ပြလိမ့်မည်ဖြစ်ကြောင်း၊ ထိုကိစ္စ မဟုတ်မှန်ကြောင်းနှင့် ယူချီတယ်ထံ ဆက်သွယ်စုံစမ်းနိုင်ကြောင်း အဲလင်းကိုပြောခဲ့သည်။

နိုဝင်ဘာလ ၂၆ ရက်နေ့တွင် တိုက်ဂါးက သူ့အိမ် အနီးရှိ Isleworth Clubhouse သို့သွားရောက်ကာ Thanks-giving နေ့ညနေခင်းကို မိတ်ဆွေများနှင့် ဖဲကစားရင်း အချိန်ဖြုန်းခဲ့သည်။ ထိုညသူအိမ်ပြန်ရောက်ပြီးနောက် အိပ်ဆေးသောက်ကာ အိပ်ရာဝင်ခဲ့သည်။ ထိုအချိန်တွင် အယ်လင်းက တိုက်ဂါး၏ဖုန်းဖြင့် ယူချီတယ်ထံ မက်ဆိတ်ချ်ပို့လိုက်ပြီးနောက် ဖုန်းဆက်ကာ စကားပြောခဲ့သည်။ တိုက်ဂါးနှင့်ယူချီတယ်တို့ဖြစ်နေကြောင်း ဖုန်းပြောပြီးသည်နှင့် အယ်လင်းက သူသိသွားခဲ့သည်ဟု ပြောခဲ့ကြောင်း နောက်ပိုင်းတွင် မီဒီယာများက ဖော်ပြခဲ့ကြသည်။ အယ်လင်းက အိပ်လျက်နေသောတိုက်ဂါးကိုနှိုးကာ မိန်းမတို့သဘာ၀ ပူညံကန့်ကွက်လိုက်ပုံရပါသည်။ အိပ်ချင်မူးတူးဖြစ်နေသောတိုက်ဂါးက စိတ်ဆိုး စိတ်ပျက်၊ စိတ်ညစ်၊ ဒေါသဖြစ်ကာ သူ၏ကက်ဒီလက်ကားပေါ် ခုန်တက်၍ အိမ်မှဝေးရာ ဘယ်ရောက်ရောက် ဘယ်ပေါက်ပေါက်မောင်းထွက်ခဲ့ပုံပါ။ ထိုမှ ယာဉ်တိုက်မှုဖြစ်ခဲ့ခြင်းဖြစ်ပါသည်။

သတင်းထောက်များတွင် တိုက်ဂါးအကြောင်း နောက်ကြောင်းလိုက်ရာ၌ ရောဘတ်လူးစ်တစ်ချ်အား မည်သူမျ မမီကြပါ။ သြစတြေးလျလူမျိုးလူးစ်တစ်ချ်သည် နိုဝင်ဘာလ ၂၇ ရက်နေ့က မိတ်ဆွေများနှင့် ဂေါက်သီးကစားနေခဲ့စဉ်တွင် တစ်ယောက်ကဖုန်းတွင်ပေါ်လာသော သတင်းထူးကို တွေ့မြင်သွားပြီး တိုက်ဂါးကားမတော်တဆမှုဖြစ်ကာ ဒဏ်ရာရခဲ့ပြီး ဒဏ်ရာမည်မျပြင်းထန်ကြောင်း မသိရသေးဟူသော သတင်းကို ဖော်ပြခဲ့သည်။ လူးစ်တစ်ချ်က တိုက်ဂါး၏ကက်ဒီဖြစ်သူ စတိဗ်ဝီလျမ်စ်ထံ ချက်ချင်းဖုန်းဆက်ပြောခဲ့သည်။ ဝီလျမ်စ်က တိုက်ဂါးဂေါက်သီးနားနေချိန်ဖြစ်၍ သူ၏မိခင်တိုင်းပြည် နယူးဇီ လန်၌ရောက်နေသည်။ ဝီလျမ်စ်ကလည်း ချက်ချင်းပင်တိုက်ဂါး၏ဂေါက်သီးကိစ္စများကို ဆောင်ရွက်စီမံပေးနေသူ မတ်ခ်စတိုင်းဘတ်ဂ်သို့ ဖုန်းဆက်ပြောခဲ့သည်။ မကြာမြင့်မီမှာပင် လူးစ်တစ်ချ်က ဝီလျမ်စ်ထံမှ စတိုင်းဘတ်ဂ်နှင့် အဆက်အသွယ်ရကြောင်း၊ အားလုံး အခြေအနေကောင်းကြောင်း၊ အပြင်မှာကြားနေရသည်များကို တစ်ခုမျမယုံ ကြည်စေလိုကြောင်း ပြန်ကြားလာခဲ့သည်။ တိုက်ဂါး၏ ပိတ်ကားနောက်ကွယ်မှဖြစ်ရပ်များကို နောက်ယောင်ခံ အလိုက်ဆုံးလူးစ်တစ်ချ်အတွက် အဆိုပါမှတ်ချက်က ထူးဆန်းနေခဲ့သည်။ တိုက်ဂါး၏ မှောင်ထဲကဇာတ်လမ်းများကတော့ အတိုင်းအတာတစ်ခုအထိ ခိုင်မာနေပြီဟု သူခံစားမိခဲ့သည်။

ဆက်လာသော သီတင်းပတ်တစ်ခု၊ နှစ်ခုအတွင်းတွင်ပင် အမျိုးသမီးများစွာက သူတို့တိုက်ဂါးနှင့် တိတ်တိတ်ပုန်းဆက်ဆံမှုရှိခဲ့ကြောင်း ဖွင့်ပြောခဲ့ကြသည်။ အချို့က မှန်နိုင်သလို အချို့ကလည်း နာမည်ကြီးလို၍ ရောချမှုတွေလည်း ပါပါလိမ့်မည်။ ထိုကာလအတွင်း တိုက်ဂါး၏သတင်းများက New York Post သတင်းစာကြီး၏ မျက်နှာဖုံးခေါင်းကြီးပိုင်းတွင် ရက်ပေါင်း ၂၀ ဆက်တိုက်နေရာယူခဲ့သည်။ ၂၀၀၁ ခုနှစ်က၊ စက်တင်ဘာ ၁၁ ရက် အကြမ်းဖက်တိုက်ခိုက်မှုဖြစ်စဉ်က နေ့စဉ်ဆက်တိုက် သတင်းစာမျက်နှာဖုံးခေါင်းကြီးပိုင်းတွင် ပါဝင်နိုင်ခဲ့သော နေ့ရက်ဆက်တိုက်အကြိမ်ကို တိုက်ဂါး၏သတင်းများက စံချိန်ချိုးပစ်ခဲ့သည်မှာလည်း မှတ်သားစရာပါပင်။

ဆေးရုံမှဆင်းလာပြီးနောက် တိုက်ဂါးက ဂေါက်သီးပြိုင်ပွဲများမှ နောက်ဆုတ်နုတ်ထွက်ခဲ့သည်။ ဂေါက်သီးမှာ သူလွှမ်းမိုးထားသော အားကစားပါ။ အသက် ၃၂ နှစ်တွင်ပင် မေဂျာပွဲကြီး ၁၄ ပွဲအောင်နိုင်ထားပြီး မေဂျာပွဲကြီးအကြိမ်အများဆုံးအောင်နိုင်ထားသူ ဂျက်ခ်နစ်ကလပ်စ်၏ ၁၈ ပွဲစံချိန်ကို ချိုးတော့မည်လမ်းကြောင်းပေါ်သို့ သူရောက်နေပါပြီ။ သူချိုးတော့မည်မှာ သေချာနေပြီးအချိန်ပဲလိုသည်ဟု အားလုံးကမှတ်ယူကြပြီးဖြစ်သည်။ တိုက်ဂါး အောင်မြင်လှသည်မှာ ဂေါက်သီးအားကစားထက်ပင်များ စွာကြီးကျယ်သူကြီးဖြစ်နေပါပြီ။ လူဖြူတွေသာ ကစားလေ့ရှိသည့် ဤအားကစားကို လွှမ်းမိုးထားနိုင်သော လူမဲတစ်ဦးဖြစ်နေပါပြီ။ ကမ္ဘာကျော်ကုန်ပစ္စည်းကုမ္ပဏီကြီးများဖြစ်သော Nike ၊ Accenture ၊ Gillette ၊ Tag Heuer စသည်တို့၏ ကြော်ငြာမင်းသားလည်း ဖြစ်နေပါပြီ။ ကမ္ဘာ့ နံပါတ်တစ်ဂေါက်သီးသမားဖြစ်သည်သာမက Forbes မဂ္ဂဇင်း၏ သုံးသပ်တွက်ချက်မှုအရ အားကစားသမားအပေါင်းထဲမှ ကမ္ဘာ့ပထမဆုံးဘီလျံနာသူဌေးလည်း ဖြစ်နေပါပြီ။

သူ့တွင် ပျော်ရွှင်ဖွယ်မိသားစုလည်းရှိနေသည်။ ချောမောလှပသော ဆွီဒင်သူဇနီးသည်နှင့် ငယ်ရွယ်သော ကလေးနှစ်ဦးရှိသည်။ အပြင်လူတွေအတွက် ချမ်းမြေ့သည့် အိမ်ထောင်စုဟု ထင်ကြရသော်လည်း အတွင်းပိုင်း၌ ဇာတ်ရှုပ်တွေက ရှိနေသည်။ တိုက်ဂါးအတွက်မှာ ကာမဆန္ဒကို မထိန်းချုပ်နိုင်ခဲ့ခြင်းဟု ဆိုရပါမည်။ သူက အိမ်ထောင်ရေးဖောက်ပြားမှုမဟုတ်ဟု သူ့ကိုယ်သူလည်း ထင်နေပုံရသည်။ သို့သော် လူယဉ်ကျေးများနယ်ပယ်တွင် ဤသို့ ဇနီးသည်မသိအောင် အခြားမိန်းမနှင့်ဆက်ဆံခြင်းမှာ အိမ်ထောင်ရေးဖောက်ပြန်ခြင်းပင် ဖြစ်ပါတော့သည်။

နိုဝင်ဘာ ၂၇ ရက်နေ့က ဆေးရုံရောက်ပြီး နောက်တစ်ရက်အကြာ နောက်တစ်နေ့တွင် တိုက်ဂါးဆေး ရုံမှဆင်းခဲ့သည်။ ချက်ချင်းပင်သူက အာရီဇိုးနားသို့ ထွက်ခွာခဲ့သည်။ ကားတိုက်ရာတွင် ဒဏ်ရာရသွားသော သူ၏ နှုတ်ခမ်းများအား Plastic Surgery လုပ်ရန်ဟုဆိုသည်။ သို့သော် သတင်းထောက်များရန်ကို ကြောက်၍ သူနေထိုင်ရာနေရာကို အထူးလျို့ဝှက်ထားခဲ့သည်။ တိုက်ဂါးက ဂေါက်သီးပြိုင်ပွဲများမှ အကန့်အသတ်မရှိ နားပါဦးမည်ဟု ကြေညာရင်း ''ကျွန်တော့်အိမ်ထောင်ရေးလော်မာမှုက လူများစွာကို စိတ်ပျက်နာကျင်စေခဲ့သည်ကို ဂရုပြုမိပါကြောင်း၊ အထူးသဖြင့် ကျွန်တော်၏ဇနီးသည်နှင့် ကလေးများကို နာကျင်စေခဲ့ပါကြောင်း'' သူ၏ဝက်ဘ်ဆိုက်တွင် ရေးသားဖော်ပြခဲ့ပါသည်။

ထိုနှစ်၏ ခရစ်စ္စမတ်ကာလလွန်မြောက်ပြီးနောက် မစ်ဆစ်ဆစ်ပီပြည်နယ် ဟက်တိုင်းစ်ဘတ်မြို့ရှိ Pine Grove Behavioral Health and Addiction Services သို့ တိုက်ဂါးစခန်းဝင်ခဲ့သည်ဟု ဆိုသည်။ ထိုဌာနမှာ စိတ္တဇဝေဒနာများ ဖြေဖျောက်ပေးရန် စခန်းတစ်မျိုးပင်ဖြစ်ပါသည်။ ကာမစွဲလမ်းမှုများအပေါ် ကုသပေးနေသည့် Gratitute ဟု အမည်ရသော သင်တန်းစခန်းတစ်ခုကို ဝင်ခြင်းဟုလည်း ဆိုကြပါသည်။ သေချာသည်ကတော့ တိုက်ဂါးသည် မိမိကိုယ်မိမိဆန်းစစ်ကာ ပြင်းထန်သော စိတ်လေ့ကျင့်ခန်းများ လုပ်ဆောင်ခဲ့ခြင်းပင်ဖြစ်ပါသည်။ ဤသို့ စခန်းဝင်မှုကြောင့် သူ၏သားငယ်ချာလီ၏ တစ် နှစ်မြောက်မွေးနေ့ပါတီကိုပင် သူမတက်ရောက်နိုင်ခဲ့ပါ။ တိုက်ဂါး၏ ဂေါက်သီးမိတ်ဆွေဖြစ်ပြီးနောက် သမ္မတဖြစ်လာသူ သူဌေးကြီးဒေါ်နယ်ထရမ့်ပ်က ''ဆိုးရွားသော ဘ၀အတွေ့အကြုံတစ်ရပ်အဖြစ်သာ မေ့ဖျောက်ပစ်ရန် တိုက်ဂါးကိုတိုက်တွန်းကြောင်း၊ အများရှေ့သို့ ပြန်လည် ထွက်လာပြီး ဂေါက်သီးပါရမီရှင်တစ်ဦးပီပီ ပြိုင်ပွဲများ နိုင်အောင်လုပ်ပြီး ကောင်းမွန်သည့်ဘဝလမ်းကြောင်းထဲ ပြန်ဝင်ရန်ဖြစ်ကြောင်း'' အားပေးခဲ့ပါသည်။

၂၀၁၀ ပြည့်နှစ်၊ ဖေဖော်ဝါရီလ ၁၅ ရက်နေ့တွင် ဖလော်ရီဒါပြည်နယ်၊ အိုင်းလ်ဝပ်သ်ရှိနေအိမ်သို့ တိုက်ဂါး ပြန်ရောက်လာသည်။ နောက်လေးရက်အကြာတွင် PGA Tour ၏ ဌာနချုပ်ခန်းမတွင် တိုက်ဂါးက မီဒီယာသမားများနှင့် တွေ့ဆုံပွဲလုပ်ခဲ့ပါသည်။ မိခင်ကူလ်တီဒါနှင့် ရင်းနှီးသောမိတ်ဆွေများဝန်းရံကာ တောင်းပန်စကားပြောကြားခဲ့ခြင်း ဖြစ်ပါသည်။ တီဗီထုတ်လွှင့်တင်ဆက်သော အစီအစဉ် ၂၂ ခုသည် မိမိတို့၏အစီအစဉ်များကို ရပ်ဆိုင်းကာ တိုက်ဂါး၏ ၁၄ မိနစ်ကြာပြောဆိုချက်ကို လိုက်ဗ်ထုတ်လွှင့်ခဲ့ကြသည်။ ဤမျ နာကျင်ခံစားနေရသောချန်ပီယံမျိုးကို ယခင်ကမတွေ့ဘူးခဲ့ကြပါဟု ဆိုကြ သည်။ တိုက်ဂါးက သူ၏တာဝန်ကင်းမဲ့ပြီး တစ်ကိုယ်ကောင်းဆန်သော အပြုအမူများအပေါ် အားလုံးသို့တောင်းပန်ပါကြောင်း ဝန်ခံပြောဆိုခဲ့ပါသည်။ တိုက်ဂါးမိခင်ကမူ ''ကျွန်မသားအတွက် ကျွန်မအင်မတန်ဂုဏ်ယူပါတယ်။ သူတရားမဝင်တာ ဘာမှမလုပ်ခဲ့ပါဘူး၊ ဘယ်သူ့ကိုမှလည်း မသတ်ခဲ့ပါဘူး'' ဟု ပြောပြခဲ့သည်။

တိုက်ဂါးပြိုင်ပွဲ ပြန်လည်စတင်ဝင်ရောက်သည်မှာ ၂၀၁၀ ပြည့်နှစ်၊ ဧပြီလ မာစတာစ်ပွဲကြီးတွင် ဖြစ်ပါသည်။ မာစတာစ်ပြိုင်ပွဲ တာဝန်ယူကျင်းပသော သြဂတ်စ်တာနေရှင်နယ်ဂေါက်ကလပ်၏ ကပ္ပတိန်ဖြစ်သူ ဘီလီပိန်းက ထိုမာစတာစ်ပွဲမတိုင်မီ နှစ်လခန့်က တိုက်ဂါးအပေါ် ပြင်းထန်စွာပြစ်တင်စကားပြောခဲ့ပါသည်။ ''သူက ကျွန်တော်တို့ကို စိတ်ပျက်စေခဲ့ပါတယ်။ ပိုအရေးကြီးတာက ကျွန်တော်တို့ရဲ့ သားသမီးတွေနဲ့ မြေးမြစ်တွေကိုပါ စိတ်ပျက်စေခဲ့တာပါ။ ကျွန်တော်တို့ရဲ့ ဂေါက်သီးသူရဲကောင်းကြီးဟာ ကျွန်တော်တို့ရဲ့ ကလေးတွေအထင်ကြီး စိတ်ကူးကြည်ညိုအားကျခဲ့တဲ့အနေအထိုင်မျိုးနဲ့ မနေတတ်ခဲ့ဘူး'' ဟု မှတ်ချက်ပြုခဲ့သည်။ ဤသည့်အခြေ အနေတွေကြားမှ ထိုနှစ်မာစတာစ်ပွဲကြီးတွင် တိုက်ဂါးက ပူးတွဲစတုတ္ထချိတ်ခဲ့သည်မှာ ကြား၍ပင် မယုံနိုင်စရာဖြစ်ခဲ့ ပါသည်။ တိုင်းသိပြည်သိအရှက်ကွဲကိုယ်ကျိုးနည်းခဲ့သော လေးလကြာပြိုင်ပွဲများနှင့် ဝေးကွာကာလခံနေသည့်ကြားမှ ဤရလဒ်ကို ရခဲ့သောကြောင့်ပါ။

ဇနီးသည်အယ်လင်းက တိုက်ဂါးနှင့်လမ်းခွဲရန်ဆုံးဖြတ်ခဲ့ပြီး တရားဝင်ပြတ်စဲရေးကိစ္စများ ဆောင်ရွက်ခဲ့ရာ တစ်နှစ်ခန့်ကြာပြီးမှ ၂၀၁၀ ပြည့်နှစ်၊ သြဂုတ်လတွင် တရားရုံးမှ ကွာရှင်းခွင့်ရခဲ့သည်။ တိုက်ဂါးက ဒေါ်လာသန်းတစ်ရာပေးရသည်ဟု ဆိုသည်။ ဤကဲ့သို့ ဇနီးသည်က စွန့်ပစ်သွားသည်အထိ အရှက်ရ၊ သိက္ခာကျ၊ ရှုတ်ချခံခဲ့ ရကာ တိုင်းသိပြည်သိအရှက်ကွဲခဲ့သော တိုက်ဂါးမှာ ဤဆိုးရွားသော ဘဝအတွေ့အကြုံများကို မျက်ကွယ်ပြု၍ ဂေါက်သီးမေဂျာပွဲကြီးများ ဆက်လက်စံချိန်တင်ဗိုလ်စွဲရန် ပြန်လည်ကြိုးပမ်းခဲ့သော်လည်း ဒူးနာခါးနာဒဏ်ရာများက ဒုက္ခပေးလာခဲ့ပြန်ပါသည်။ အကြိမ်ကြိမ်ခွဲစိတ်ရသည့် အထိ ပြင်းထန်ခဲ့သည်။ ၂၀၁၀ ခုနှစ်မှစ၍ ကျိုးတိုးကျဲတဲသာ ပြိုင်ပွဲများဝင်နိုင်ခဲ့သည်။ ထိုစဉ်ကာလအထိ မေဂျာပွဲ ကြီး ၁၄ ပွဲအပါအဝင် ပီဂျီအေတိုးစုစုပေါင်း ၇၁ ပွဲ ဗိုလ်စွဲ ခဲ့ပြီးဖြစ်သည်။ အချို့က တိုက်ဂါးတော့သွားပြီ၊ ဂေါက်သီးဘဝပြီးဆုံးသွားပြီဟု ဆိုခဲ့ကြပါသည်။ မှန်လည်းမှန်ခဲ့ ပါသည်။ နှစ်နှစ်ခွဲခန့် တိုက်ဂါးနိုင်ပွဲမတွေ့ခဲ့ပါ။

သို့သော် တိုက်ဂါးက ဂေါက်သီးတွင် ဆန္ဒပြင်းပြဆဲပါ။ ၂၀၁၂ ခုနှစ်တွင် သူက အောင်ပွဲများ ပြန်ရခဲ့သည်။ ၂၀၁၂ ခုနှစ်အတွင်း ပီဂျီဂျီတိုးသုံးပွဲ၊ ၂၀၁၃ ခုနှစ်တွင်ပီဂျီအေတိုးပွဲငါးပွဲဗိုလ်စွဲခဲ့ပြီး ၂၀၁၃ ခုနှစ်၌ တစ်နှစ်တာအကောင်းဆုံးဂေါက်သီးသမားဆု၊ တစ်နှစ်တာ ပျမ်းမျရိုက်ချက်အနည်းဆုံးလူဆု၊ တစ်နှစ်တာဆုကြေးအများဆုံး ဂေါက်သီးသမားဆုများကို သိမ်းကျုံး၍သူရခဲ့သည်။ ၂၀၁၃ ခုနှစ်၊ မတ်လ ၂၅ ရက်တွင် ကမ္ဘာ့နံပါတ်တစ်ဂေါက် သီးသမားနေရာကို သူပြန်ရခဲ့သည်။ သီတင်းပတ်ပေါင်း ၆၀ ဆက်တိုက် ထိုနေရာကိုရယူနိုင်ခဲ့သည်။ တစ်သက်တာ၌ ထိုနေရာကိုရခဲ့သည့် သီတင်းပတ်စုစုပေါင်းက ၆၈၃ ပတ်ရှိခဲ့ပြီ။ ထိုကာလအောင်ပွဲများတွင် မေဂျာပွဲကြီးများတော့ မပါခဲ့ပါ။

၂၀၁၄ ခုနှစ်တွင် တိုက်ဂါး၏ နောက်ကျောက ဒုက္ခပြန်ပေးလာပြန်သည်။ ထိုနှစ်နောက်ပိုင်းတွင် လေးပွဲသာဝင်ကစားခဲ့ပြီး တစ်ပွဲတွင်သာလေးရက် အပြည့်ကစားနိုင်ခဲ့သည်။ ၂၀၁၅ ခုနှစ်၊ ဖေဖော်ဝါရီလတွင် ကျောအောက်ပိုင်းဝေဒနာ၊ ဧပြီလမာစတာစ်ကစားနေစဉ်တွင် လက်ကောက်ဝတ်ဒဏ်ရာ၊ သြဂုတ်လတွင် တင်ပါးဆုံရိုးဒဏ်ရာ များရခဲ့သည်။ ၂၀၁၅ ခုနှစ်၊ စက်တင်ဘာလတွင် နောက်ကျော ခွဲစိတ်မှုလုပ်ခဲ့ရပြီးနောက် ၁၅ လ ကျော်ပြိုင်ပွဲများ မဝင်နိုင်ဘဲရှိခဲ့ပြန်ပါသည်။ ၂၀၁၇ ခုနှစ်တွင် နှစ်ပွဲသာ ကစားခဲ့ပြီးနောက် ဧပြီလတွင် နောက်ကျောခွဲစိတ်မှု ထပ်လုပ်ပြန်ပြီး ထိုနှစ်နိုဝင်ဘာလအထိ ပြိုင်ပွဲများ မဝင်နိုင်ဘဲရှိခဲ့ရာ ကမ္ဘာ့အဆင့်တွင် အမှတ်စဉ် ၁,၁၉၉ အထိ ကျဆင်းသွားခဲ့ပါသည်။ အများက ဒီတစ်ခါတော့ တိုက်ဂါးတကယ် ဂေါက်သီးဘဝပြီးသွားပြီဟု မှတ်ယူခဲ့ကြပါသည်။

အများက တိုက်ဂါး၏ တကယ့်စိတ်ဆန္ဒကိုမသိကြ၍ပါ။ တိုက်ဂါးက ဂေါက်သီးကို အလွန်စွဲလမ်းစုံ မက်ချစ်ခင်ရူးမူးသည်။ အလွန်ဗိုလ်စွဲလိုသည်။ အတော်ဆုံး၊ အကောင်းဆုံး၊ ရာဇဝင်၌ စံတင်ရဆုံးဖြစ်ချင်သည်။ ဆန္ဒအလွန်ပြင်းပြသည်။ တစ်ချက်က သူသည် အသက် ၄၀ ကျော်သာရှိသေးသူဖြစ်ခြင်းပါ။ ၂၀၂၀ ဒီဇင်ဘာလ တွင်မှ ၄၅ နှစ်ပြည့်ပါမည်။ ကမ္ဘာ့နံပါတ်တစ်ဟောင်းဗီဂျေဆင်းဆိုပါလျင် ပီဂျီအေတိုးပွဲပေါင်း ၃၄ ပွဲ ဗိုလ်စွဲခဲ့ရာ ၂၂ ပွဲမှာ အသက် ၄၀ ကျော်မှ အောင်ပွဲရခဲ့ခြင်းပါ။ တိုက်ဂါး၌ ဆန္ဒပြင်းပြမှုက ရှိပြီးဖြစ်လေရာ ကိုယ်ခန္ဓာဒဏ်ရာ များမရှိဖို့ရာသာ လိုအပ်နေပါသည်။ ၂၀၁၈ နှင့် ၂၀၁၉ ခုနှစ်များတွင် တိုက်ဂါးပြန်လာပါပြီ။ သူ၏ နောက်ဆုံးအခြေအနေကို ဂေါက်သီးပရိသတ်များ သိပြီးကြပါပြီ။ ၂၀၁၈ ခုနှစ်၊ စက်တင်ဘာလက ပီဂျီအေတိုးရာသီပိတ် Tour Ch ပြိုင်ပွဲကြီး သူဗိုလ်စွဲခဲ့ပါသည်။ ငါးနှစ်ကျော်ကြာခဲ့ပြီးမှ အောင်ပွဲပြန်ရခဲ့ခြင်းပါ။ ထိုမှတစ်ဖန် ၂၀၁၉ ခုနှစ်၊ ဧပြီလတွင် မာစတာစ်ပွဲကြီးအား သူ၏ ၁၅ ပွဲမြောက် မေဂျာအောင်ပွဲအဖြစ် ဗိုလ်စွဲခဲ့ပါတော့သည်။ တစ်ကမ္ဘာလုံးရှိ ဂေါက်သီးပရိသတ်အပေါင်းသည် အုန်းအုန်းကျွက်ကျွက်နှင့် ချီးကျူးမဆုံး ရှိခဲ့ကြသည်။

တိုက်ဂါးထက် ၁၄ နှစ်ငယ်ပြီး ယနေ့အသက် ၃၀ ရှိပြီဖြစ်သည့် ကမ္ဘာ့နံပါတ်တစ် ရော်ရီမက်ကဲလ်ရွိုင်းက ''လွန်ခဲ့တဲ့ဆယ်နှစ်က တိုက်ဂါးဖြစ်ခဲ့တာတွေက သူ့ကိုတကယ်ပဲ ထိခိုက်နာကျင်စေခဲ့ပါတယ်။ တော်တော်လေးကိုပဲ အဆင့်လျော့ကျစေခဲ့ပါတယ်။ စိတ်ထိခိုက်မှုပိုင်းကကြည့်ရင် ပြန်လာဖို့က အင်မတန်ခက်ခဲပါတယ်။ ၂၀၁၇ ခုနှစ်က သူနဲ့နေ့လယ်စာအတူစားရင်း သူပြောခဲ့တာလေးကို သတိရမိပါတယ်။ အဲဒါကတော့ ကိုယ်ခန္ဓာသန်စွမ်းမှုအကြောင်းပါ။ သူကငါတော့အားလုံးပြီးသွားပြီလို့ ထင် တယ်။ ဆက်ကစားနိုင်ဖို့ဆိုတာက ဖြစ်ချင်မှဖြစ်တော့မယ်လို့ပြောခဲ့တယ်။ ဒါပေမဲ့ နောက် ၁၅ လကြာတော့ ပီဂျီအေတိုးအောင်ပွဲ သူပြန်ရပြီး နောက်ထပ်ခုနစ်လလည်းကြာရော သူကနောက်ထပ်မေဂျာပွဲကြီးတစ်ပွဲ ဗိုလ်စွဲပြန်ရော။ တကယ်ကိုမယုံနိုင်စရာပါ'' ဟု ပြောခဲ့ပါသည်။ ကိုယ်ရေးကိုယ်တာ အိမ်ထောင်ရေးပြဿနာများနှင့် ရုပ်ပိုင်းဆိုင်ရာဒဏ်ရာ အနာတရရရှိမှုများကြားမှ ပြန်လည်နိုးထနိုင်ခဲ့သည့် တိုက်ဂါး၏ စိတ်ဓာတ်အင်အားကို ပြောခဲ့ခြင်းဖြစ်ပါသည်။

မက်ကဲလ်ရွိုင်းက ထပ်ပြောသည်မှာ ''တိုက်ဂါးဟာ ဂေါက်သီးလောကရဲ့ အင်မတန်ကြီးကျယ်တဲ့ သံတမန်ကြီးပါ။ ဂေါက်သီးနဲ့ပတ်သက်နေသူတိုင်း - ဥပမာဗျာ- ခင်ဗျား၊ ကျွန်တော်၊ မီဒီယာလောကသားတွေ၊ တိုးပလေယာတွေ၊ ဂေါက်ပစ္စည်းထုတ်လုပ်သူတွေ စသဖြင့် စသဖြင့်- အားလုံးက တိုက်ဂါးကြောင့် အကျိုးရှိခဲ့ကြပါတယ်။ ကျွန်တော်တို့အားလုံးအတွက်ကတော့ တိုက်ဂါး အခုထက်ထိ ဒီအဆင့်မှာရှိနေသေးတယ်ဆိုတာက အလွန့်အလွန်ကို ကံကောင်းမှုပါ'' ဟူ၏။

အုန်းအုန်းကျွက်ကျွက် တိုင်းသိပြည်သိ သိက္ခာကျအရှက်ရပြီးမှ ဆန္ဒပြင်းပြမှုဖြင့် ပြန်လည်တည်ဆောက်ခဲ့ရသော တိုက်ဂါး၏ ဆယ်စုနှစ်တစ်ခုကတော့ ပြည့်ခဲ့ပါပြီ။

၀င်းမြင့်သိန်း