လုံခြုံရေးဆိုင်ရာဥပဒေချိုးဖောက်မှုတွေကြောင့် ဖိလစ်ပိုင်စရိတ်သက်သာလေကြောင်းလိုင်း Zest Air ကို ပျံသန်းခွင့်ပိတ်ပင်ခဲ့တယ်လို့ ဖိလစ်ပိုင်လေကြောင်းစည်းကမ်းထိန်းသိမ်းရေးအဖွဲ့က ဆိုပါတယ်။ Zest Air အနေနဲ့ လိုအပ်တဲ့ပြင်ဆင်မှုတွေနဲ့ လုံခြုံရေးဆိုင်ရာစံနှုန်းသတ်မှတ်ချက်တွေအတိုင်း လိုက်နာဆောင်ရွက် မှုတွေပြုလုပ်ပြီးမှသာ ပိတ်ပင်မှုကို ဖယ်ရှားပေးမှာဖြစ်တယ်လို့ ဖိလစ်ပိုင်မြို့ပြလေကြောင်းအာဏာပိုင်အဖွဲ့ရဲ့ လက်ထောက်ညွှန်ကြားရေးမှူးချုပ် John Andrews က ဆိုပါတယ်။ ဇူလိုင်လ ၂၂ ရက်နဲ့ သြဂုတ်လ ၁၃ ရက်အတွင်း Zest Air ရဲ့ ပြည်တွင်းလေကြောင်း ခရီးစဉ်ငါးခုဟာ ဟိုက်ဒရောလစ်စနစ် ချို့ယွင်းမှု၊ လောင်စာ ဆီလျံကျမှုနဲ့ လောင်စာဆီကြားဆက်ကိရိယာအဖုံး မပါဝင်တာစတဲ့ ပြဿနာတွေကြောင့် ပျံသန်းခွင့်တားမြစ်ခံခဲ့ ရပါတယ်။ Ref: CNA
