Orient Art Gallery နဲ့ ပန်းချီကြီးမြင့်စောတို့စီစဉ်တဲ့ ပန်းချီဆရာသန်းထိုက်မြန်မာစာရဲ့ Exodus Song လို့ အမည် ပေးထားတဲ့ ပန်းချီပြပွဲတစ်ရပ်ကို၂၀၁၄ ခုနှစ်၊ ဇူလိုင် လ ၅ရက်ကနေ ၁၉ ရက်အထိ ရန်ကုန်မြို့၊ သံလွင်လမ်းရှိ Orient Art Gallery မှာ ပြုလုပ်လျက်ရှိပါတယ်။ အဆိုပါပန်းချီပြပွဲဟာ ပန်းချီဆရာသန်းထိုက်မြန်မာစာရဲ့ ဒုတိယအကြိမ်မြောက်တစ်ကိုယ်တော်ပြပွဲဖြစ်ပြီး မြို့ပြလူနေမှုစရိုက်ကို ဖော်ကျူးရေးဆွဲထားတဲ့ပန်းချီကား ၂၆ ကားကို ပြသထားတာဖြစ်ပါတယ်။ တစ်ကိုယ်တော်ပန်းချီပြပွဲနဲ့ပတ်သက်လို့ ပန်းချီဆရာသန်းထိုက် မြန်မာစာက''အဓိကတော့ မြို့ပြလူနေမှု စရိုက်တွေကို ရေးထားပြီး Exodus လို့ အမည်ပေးထားပါတယ်။ ဒါကို စိတ်ဝင်စားအောင် လှုပ်ရှားမှုတစ်ခုအနေနဲ့ Song လို့ ပေးလိုက်တာပါ။ ပန်းချီကားအများစုကတော့ ရန်ကုန်မြို့ပြလူနေမှုစရိုက်ကို ဦးတည်ထားပါတယ်။ Exodus Song ကတော့ အများကြီးရှိပါတယ်။ အဲဒီမှာ ကျွန်တော်က A going away of many people ဆိုတာ တင်စား ပြီးတော့ လူတွေက မနက်မိုးလင်းတာနဲ့ စားဝတ်နေရေးအတွက် အလုပ်ခွင်ထဲ ထွက်သွားရတာကို ကိုယ်စားပြုု ပြီးတော့ ပေးလိုက်တာပါ''လို့ ပြောပြခဲ့ပါတယ်။ ပြပွဲမှာ ပြသထားတဲ့ပန်းချီကားအများစုကိုတော့ ပြီးခဲ့တဲ့သုံးလေးလလောက် ရေးဆွဲခဲ့တာဖြစ်ပြီး နောက်ပိုင်းမှာလည်း လက်ရှိဖြစ်ပျက်နေတဲ့အဖြစ်အပျက်တွေကို လွတ်လွတ်လပ်လပ်ရေးဆွဲသွားဖို့ ရည်ရွယ်ထားကြောင်း ပန်းချီဆရာသန်းထိုက်မြန်မာစာက ဆိုပါတယ်။ 
