မြန်မာနိုင်ငံ ဆေးနဲ့ဆေးဝါးပစ္စည်းကုန်သည်များနဲ့ လုပ်ငန်းရှင်များအသင်း (Myanmar Pharmaceutical & Medical Equipment Entrepreneurs' Association - MPMEEA) က ကြီးမှူးပြီး ဒုတိယအကြိမ် မြန်မာကျန်းမာရေးဆိုင်ရာပြပွဲ (2nd Myanmar Health Expo 2015) ကို ရန်ကုန်မြို့၊ ဦးဝိစာရလမ်းရှိ တပ်မတော်ခန်းမမှာ ၂၀၁၅ ခုနှစ်၊ ဖေဖော်ဝါရီလ ၅ ရက်ကနေ ၇ ရက်အထိ မနက် ၉ နာရီကနေ ညနေ ၅ နာရီအထိ ကျင်းပလျက်ရှိပါတယ်။ ပြပွဲ ဖွင့်ပွဲနေ့မှာ မြန်မာနိုင်ငံ ဆေးနဲ့ဆေး ပစ္စည်းကုန်သည်များနဲ့ လုပ်ငန်းရှင်များအသင်းဥက္ကဋ္ဌ ဒေါက်တာဝင်းစည်သူက အဖွင့်အမှာစကားနဲ့အတူ မြန်မာပြည်သူလူထုရဲ့ ကျန်းမာရေးစောင့်ရှောက်မှုမှာ တစ်ဖက်တစ်လမ်းကနေ အထောက်အကူပြုနေတဲ့ ဆေးဝါးတွေ၊ ဆေးဝါး ကုမ္ပဏီတွေ၊ ပြည်တွင်းပြည်ပ ပုဂ္ဂလိကဆေးရုံ၊ ဆေးခန်းတွေအကြောင်း ပြည်သူလူထုအကြား အသိပညာပေးဖို့နဲ့ ပိုမိုတိုးတက်ကောင်းမွန်လာစေဖို့ … စတဲ့ ရည်ရွယ်ချက်တွေနဲ့ ကျင်းပကြောင်း ပြောကြားသွားပါတယ်။ အခမ်းအနားကို ရန်ကုန်တိုင်းဒေကြီး ဝန်ကြီးချုပ် ဦးမြင့်ဆွေ၊ ကျန်းမာရေးဦးစီးဌာန ဆေးသုတေသန (ဦးစီးဌာန)(အောက်မြန်မာပြည်) ညွှန်/ချုပ် ဒေါက်တာကျော် ဇင်သန့်၊ မြန်မာနိုင်ငံဆေးကောင်စီဥက္ကဋ္ဌ ပါမောက္ခ ဒေါက်တာ S ကျော်လှ၊ မြန်မာနိုင်ငံဆရာဝန်အသင်း ဥက္ကဋ္ဌ ပါမောက္ခ Dr Ray Mra ၊ မြန်မာနိုင်ငံ ဆေးနဲ့ဆေးပစ္စည်း ကုန်သည်များနဲ့လုပ်ငန်းရှင် များအသင်းဥက္ကဋ္ဌ ဒေါက်တာဝင်းစည်သူနဲ့ ပုဂ္ဂလိကဆေးရုံ လုပ်ငန်းရှင် များအသင်း ဥက္ကဋ္ဌ ဒေါက်တာရဲမိုးမြင့်တို့က ဖဲကြိုးဖြတ် ဖွင့်လှစ်ပေးခဲ့ပါတယ်။ ပြပွဲမှာ ပြည်တွင်းပြည်ပက ဆေးနဲ့ဆေးပစ္စည်း ထုတ်လုပ်တင်သွင်း ရောင်းချသူများ၊ ပြည်တွင်းပြည်ပ ဆေးရုံနဲ့ကျန်းမာရေးဝန်ဆောင် မှုလုပ်ငန်းများက အနောက်တိုင်းဆေးဝါးနဲ့ ဆေးပစ္စည်းများ၊ ဖြည့်စွက်အာဟာရပစ္စည်းများ၊ အလှအပဆိုင်ရာကျန်းမာရေးပစ္စည်းများ၊ ဆေးပစ္စည်းကိရိ ယာများနဲ့ဆေးရုံသုံးပစ္စည်းများကို ဝင်ရောက်ပြသထားပါတယ်။ ဟောပြောပွဲအစီအစဉ်အဖြစ် ဖေဖော်ဝါရီလ ၆ ရက်(ယနေ့)မှာ ပါမောက္ခဦးသံစစ်က `အသည်း(B)ပိုး၊ (C) ပိုး ပပျောက်ရေး´ခေါင်းစဉ်နဲ့ ဟောပြောခဲ့ပါတယ်။ ဖေဖော်ဝါရီလ ၇ ရက်မှာ ဒေါက်တာခင်မောင်လွင် (Fame) က `Natural Medicines for CKD (Chronic Kidney Disease)´ ခေါင်းစဉ်နဲ့ ဟောပြောမှာဖြစ်ပါတယ်။ ပြပွဲကို မည်သူမဆို အခမဲ့ ဝင်ရောက်ကြည့်ရှု လေ့လာ ဝယ်ယူနိုင်ကြောင်း သိရပါတယ်။ 
