Office Syndrome ဆိုတာ တစ်နေကုန် ရုံးစားပွဲမှာထိုင်ရင်း ကွန်ပျူတာနဲ့ အလုပ်လုပ်ပြီး အနေအထားမပြောင်းဘဲ အလုပ်လုပ်လေ့ ရှိသူတွေခံစားရတဲ့ ဝေဒနာတစ်ခုဖြစ်ပါတယ်။ ပခုံးနဲ့ကျောတွေနာကျင်တာ၊ လက်ချောင်းနဲ့ လက်မောင်းတွေ ထုံကျင်ကိုက်ခဲတာ၊ အမြင်အာရုံေ၀ဝါးတာ၊ မျက်ရည်ခန်းခြောက်တာ၊ ခေါင်းကိုက်တာတွေကို ခံစားရပါတယ်။ ဒါတွေကို သက်သာပျောက်ကင်းစေဖို့ ရုံးစားပွဲမှာတင် ပြုလုပ်နိုင်တဲ့ ယောဂလေ့ကျင့်ခန်း ငါးမျိုးကို ဖော်ပြလိုက်ပါတယ်။
လေ့ကျင့်ခန်း ၁ . . .
ကိုယ်နေဟန်ထားကောင်းသွားစေတယ်။ ခါးအောက်ပိုင်းနာနေတာကို သက်သာစေတယ်။ ကျောရိုးနဲ့ လည်ပင်းကို စန့်သွားစေပြီး သန်မာသွားစေပါတယ်။
နည်းလမ်း . . .
၁။ ပုံမှာပြထားတဲ့အတိုင်း ကုလားထိုင်မှာထိုင်ရင်း ခြေထောက်တွေကို ကြမ်းပြင်မှာချထားပြီး လက်တွေကို စားပွဲစောင်းမှာတင်ထားပါ။
၂။ အသက်ရှူသွင်းလိုက်ပါ။ ခါးကော့ထားပါ။ လည်ပင်းဆန့်ပြီး ခေါင်းမော့ရင်း အပေါ်ကိုကြည့်ပါ။ ဗိုက်ကိုလည်း ဆန့်ထားပါ။ ပခုံးတွေကို နောက်ကို ဆန့်ထားပါ။
၃။ အသက်ရှူထုတ်ပါ။ ကျောရိုးကို ကုန်းလိုက်ပါ။ ခေါင်းချလိုက်ပြီး အောက်ဘက်ကိုကြည့်ပါ။ ပခုံးတွေကို ရှေ့ကို ဆန့်ပေးလိုက်ပါ။
၄။ အသက်ရှူသွင်းတဲ့အခါမှာ အမှတ်စဉ် ၂ ကိုလုပ်ပါ။ ရှူထုတ်တဲ့အခါမှာ အမှတ်စဉ် ၃ ကို လုပ်ပါ။ အဲဒီလို အသက်ငါးကြိမ် ရှူပြီးလုပ်ပါ။
လေ့ကျင့်ခန်း ၂
ခါးအောက်ပိုင်းတင်းမာနေမှုကို လျော့စေပါတယ်။
၁။ ပုံမှာပြထားတဲ့အတိုင်း ခေါင်းနဲ့ပခုံးတွေကို ချထားပါ။ ကြွက်သားတွေ တင်းမနေပါစေနဲ့။
၂။ ခြေမျက်စိတွေကိုပဲဖြစ်ဖြစ်၊ ခြေဖနောင့် နောက်ပိုင်းကိုပဲဖြစ်ဖြစ် တွဲလောင်းချထားတဲ့လက်တွေနဲ့ ကိုင်ထားပါ။
၃။ အသက်ဆယ်ကြိမ်ရှူလိုက်ပါ။ အသက်ရှူထုတ်လိုက်တိုင်း ရင်အုပ်ကို ခြေထောက်တွေနား တတ်နိုင်သမျှ နီးကပ်သွားအောင် လုပ်ပေးပါ။
လေ့ကျင့်ခန်း ၃ . . .
နောက်ကျောတင်းနေတာ၊ နာနေတာကို သက်သာစေပါတယ်။ တင်ပါးဆုံအဆစ်တွေကို လွယ်လွယ်ကူကူ လှုပ်ရှားစေနိုင်တယ်။ ရင်အုပ်ကိုကျယ်စေပြီး အဆုတ်ထဲကို အောက်ဆီဂျင်ပိုဝင်စေနိုင်တယ်။
၁။ ပုံမှာပြထားတဲ့အတိုင်း ကြမ်းပြင်မှာခြေချပြီး ကုလားထိုင်မှာ ထိုင်ပါ။
၂။ ကိုယ်ခန္ဓာအထက်ပိုင်းကို ညာဘက်လှည့်လိုက်ပါ။ လက်တစ်ဖက်က ကုလားထိုင်လက်ကိုင်ကို ကိုင်ထား၊ နောက်တစ်ဖက်က ကျောမီကို ကိုင်ပေးပါ။
၃။ အသက်ရှူထုတ်လိုက်တိုင်း ခန္ဓာကိုယ်ကို အမှတ်စဉ် ၂ အတိုင်း ကွေးနိုင်သမျှ ကွေးပေးပါ။ အပြန်အလှန် အသက်ငါးကြိမ်ရှူပါ။
၄။ ဒီနည်းအတိုင်း ဘယ်ဘက်ကိုပြောင်းလုပ်ပါ။
လေ့ကျင့်ခန်း ၄ . . .
လက်ကောက်ဝတ်တွေနဲ့ ပခုံးတွေကို ပျော့ပျောင်းစေတယ်။ လက်ပြင်ရိုးနှစ်ခုကြားမှာ တင်းမာနေတာကို သက်သာစေပြီး ခြေထောက်တွေကို သန်မာစေပါတယ်။
ပုံမှာပြထားတဲ့အတိုင်း တင်ပျဉ်ချိတ်ထားပါ။ ဖြစ်နိုင်ရင် ခြေသလုံးချင်း ရစ်ပတ်ထားပါ။
ခြေသလုံးချင်းချိတ်ထားသလို ပုံမှာပြထားတဲ့အတိုင်း လက်မောင်းချင်း ရစ်ပတ်ချိတ်ထားပါ။ လက်ဖဝါးချင်း ထိသွားပါစေ။
အသက်ရှူသွင်းလိုက်ပါ။ အထက်ပါအနေအထားအတိုင်း တံတောင်ဆစ်တွေကို အထက်ကိုပင့်မြှောက်လိုက်ပါ။ တစ်ချိန်တည်းမှာပဲ လည်ပင်းဆန့်ပြီး အထက်ကိုကြည့်ပါ။ ကျောရိုးကို ကွေးဆန့်ထားပါ။
အသက်ရှူထုတ်ပါ။ ခေါင်းပြန်ချပြီး တံတောင်ဆစ်တွေကို ဒူးဆစ်တွေပေါ်မှာ တင်ထားလိုက်ပါ။ ခါးကုန်းရင်း လုပ်ရမှာဖြစ်တယ်။
ဒီအနေအထားအတိုင်း အသက်ငါးကြိမ် ရှူပါ။
လေ့ကျင့်ခန်း ၅ . . .
ရင်အုပ်ပွင့်လာစေတယ်။ လက်မောင်းကြွက်သားတွေ ဆန့်သွားစေတယ်။ လည်ပင်းတင်းမာနေမှုကို သက်သာစေတယ်။
၁။ တံတောင်ဆစ်တွေကို စားပွဲစောင်းမှာ တင်ထားပါ။ လက်တွေကို ပခုံးအကျယ်လောက် ခွာထားပါ။
၂။ ပုံမှာပြထားတဲ့အတိုင်း လက်နှစ်ခုကြား ခေါင်းဝင်နေလို့ရအောင် ကုလားထိုင်ကို နောက်နည်းနည်း ဆုတ်ထိုင်ပါ။
၃။ လက်ဝါးချင်း ထိ၊ ဖိထားရင်း ကျောဆန့်ပေးပါ။
၄။ ဒီအနေအထားအတိုင်း အသက်ဆယ်ကြိမ်ရှူပါ။
