ဂျပန်ထိပ်တန်းသတင်းစာ Asahi Shimbun မိတ်ဆက်အခမ်းအနား

မြန်မာနိုင်ငံမှာ ဂျပန်နိုင်ငံရဲ့ ထိပ်တန်းသတင်းစာကြီးတစ်စောင်ဖြစ်တဲ့ Asahi Shimbun သတင်းစာရဲ့ ရုံးခွဲဖွင့်လှစ်မယ့်အကြောင်း မိတ်ဆက်ညစာစားပွဲအခမ်းအနားကို ၂၀၁၄ ခုနှစ်၊ ဧပြီ ၃၀ ရက်နေ့က ရန်ကုန်မြို့၊ အလံပြဘုရားလမ်းရှိ PARKROYAL ဟိုတယ်မှာ ကျင်းပခဲ့ပါတယ်။ အခမ်းအနားမှာ Asahi Shimbun သတင်းစာရဲ့ အမှုဆောင်အရာရှိချုပ်နဲ့ ဥက္ကဋ္ဌဖြစ်သူ Mr Tadakazu Kimura က နှုတ်ခွန်းဆက်စကားပြောကြားရာမှာ`သမ္မတဦးသိန်းစိန်လက်ထက်မှာ နိုင်ငံရေးနဲ့ စီး ပွားရေးပြုပြင်ပြောင်းလဲမှုတွေကို အရှိန်အဟုန်နဲ့ ဆောင်ရွက်နေတဲ့အပေါ်မှာ ဂျပန်လူမျိုးတွေအပါအဝင် နိုင်ငံတကာက အထူးစိတ်ဝင်စားလျက်ရှိကြောင်း၊ Asahi Shimbun သတင်းစာအနေ နဲ့ မြန်မာနိုင်ငံ ရဲ့ပြုပြင်ပြောင်းလဲမှုအခြေအနေသတင်းတွေကို မှန်ကန်တိကျမြန်ဆန်စွာ ဂျပန်လူထုတွေကို ဝေမျှပေးလျက်ရှိကြောင်း´ ထည့်သွင်းပြောကြားခဲ့ပါတယ်။  မြန်မာနိုင်ငံရဲ့ သတင်းတွေကို သီးသန့်ရယူနိုင်ဖို့အတွက် ဂျပန်လူမျိုးဌာနေကိုယ်စားလှယ်ကို ဧပြီလအတွင်းမှာ ရန်ကုန်ကို စေလွှတ်ခဲ့ပြီး မြန်မာနိုင်ငံမှာ ရုံးခွဲဖွင့်လှစ်နိုင်ဖို့အတွက် မြန်မာနိုင်ငံ ပြန်ကြားရေးဝန်ကြီးဌာနရဲ့ ခွင့်ပြုချက်ရရှိဖို့ လျှောက်ထားပြီးဖြစ်ကြောင်း သိရပါတယ်။ Asahi Shimbun သတင်းစားဟာ နှစ်ပေါင်းများစွာကတည်းက မြန်မာနိုင်ငံနဲ့ပတ်သက်တဲ့သတင်းတွေကို ရေးသားခဲ့တဲ့ သတင်းစာဖြစ်ပါတယ်။ Asahi Shimbun သတင်းစာကို ဂျပန်နိုင်ငံ၊ အိုဆာကမြို့မှာ ၁၈၇၉ ခုနှစ်က စတင်ထုတ်ဝေခဲ့ရာ အခုဆိုရင် ရပ်တည်မှုသက်တမ်း ၁၃၅ နှစ်ရှိပြီဖြစ်တဲ့ သတင်းစာတစ်စောင်ဖြစ်ပါတယ်။  Asahi Shimbun သတင်းစာဟာ အခုအချိန်မှာ Bureau အဆင့် ရုံးခွဲငါးရုံးနဲ့ အခြားရုံးခွဲ ၃၃ ရုံး၊ ကမ္ဘာတစ်ဝန်းမှာ စုစုပေါင်း ရုံးခွဲ ၃၈ ရုံးဖွင့်လှစ်ထားတယ်လို့ သိရပါတယ်။