၂၀၁၇ ခုနှစ်၊ ဒီဇင်ဘာလ ၉ ရက်ကနေ ၁၀ ရက်ထိ နှစ်ရက်ကြာကျင်းပခဲ့တဲ့ Myanmar's Leading Property Show 2017 ကို Young Developers Association က ဦးစီးပြီး ShweProperty.com နဲ့အတူ ပူးပေါင်းပြုလုပ်ခဲ့တာဖြစ်ပါတယ်။ ပွဲမှာ ပါဝင်ပြသခဲ့ကြတဲ့ အိမ်ခြံမြေဆောက်လုပ်ရေးလုပ်ငန်းတွေအနေနဲ့ ၂၀၁၇ ခုနှစ်အတွင်းက ကြုံတွေ့ခဲ့တဲ့ စိန်ခေါ်မှုတွေ၊ ဈေးကွက်အခြေအနေနဲ့ ၂၀၁၈ ခုနှစ်အတွက် သူတို့ရဲ့ မျှော်လင့်ချက် စတာတွေကို မေးမြန်းဖြစ်ခဲ့ပါတယ်။
Young Developer Association ဆိုတာ
--------
ကျွန်တော်တို့အသင်းကို ရန်ကုန်မြို့မှာရှိတဲ့ Developer ၂၁ ယောက် (ကုမ္ပဏီတွေက အကြီး ၂၁ ခု) နဲ့ စုစည်းထားတာဖြစ်ပါတယ်။ တစ်နိုင်ငံလုံးရဲ့ ၈၀ ရာခိုင်နှုန်း၊ ၉၀ ရာခိုင်နှုန်းသော Developer တွေက ရန်ကုန်မြို့မှာရှိတဲ့အတွက် မြန်မာနိုင်ငံရဲ့ Developer တွေ အများစုနဲ့ စုစည်းတည်ထောင်ထားတဲ့ အသင်းလို့လည်း ပြောလို့ရပါတယ်။ ကျွန်တော်တို့အုပ်စုက ကုမ္ပဏီတစ်ခုချင်းဆီမှာ နည်းပညာရှိတယ်။ အင်အားတောင့်တင်းမှုရှိတယ်။ ကျွမ်းကျင်မှုရှိတယ်။ အရင်းအနှီးရှိတယ်။ အတွေ့အကြုံရှိတယ်။ အဲဒီအတွေ့အကြုံရှိတဲ့ ကုမ္ပဏီတစ်ခုချင်းကိုမှ နောက်တစ်ခါ ထပ်မံပေါင်းစည်းလိုက်ပြီးတော့ အင်အားကြီးမားတဲ့ အဖွဲ့အစည်းတစ်ခုအဖြစ် ကျွန်တော်တို့ ဦးတည်ကြိုးပမ်းနေတာပါ။ ဒီအသင်းကနေ ဆောက်လုပ်ရေးလောကကြီးကို ဦးဆောင်နိုင်အောင်၊ နိုင်ငံတော်ဖွံ့ဖြိုးတိုးတက်ရေးလုပ်ငန်းတွေမှာ ပါဝင်နိုင်အောင်၊ ရန်ကုန်မြို့ပြ ဖွံ့ဖြိုးတိုးတက်ရေးတွေမှာ ပါဝင်နိုင်အောင်၊ Green Process တွေ ၊ CSR လုပ်ငန်းတွေလုပ်မယ် စတဲ့ရည်ရွယ်ချက်တွေနဲ့ အသင်းက ဆက်လက်လုပ်ဆောင်သွားမှာဖြစ်ပါတယ်။ ကျွန်တော်တို့ အသင်းအနေနဲ့ နိုင်ငံတော်ရဲ့ တည်ဆောက်ရေးလုပ်ငန်းတွေမှာ တစ်စိတ်တစ်ပိုင်း ဖွံ့ဖြိုးတိုးတက်စေဖို့၊ ကမ္ဘာ့အဆင့်မီ အဆောက်အအုံတွေ၊ အိမ်ရာတွေပေါ်ထွန်းလာဖို့အထိ ကျွန်တော်တို့ ရည်မှန်းချက်ထားပြီးတော့ ဒီ YGA အသင်းကို ဖွဲ့စည်းဆောင်ရွက်နေတာ ဖြစ်ပါတယ်။
YGA Group အဖွဲ့ဝင်ဖြစ်ဖို့အတွက် ဘယ်လိုစည်းကမ်းတွေ သတ်မှတ်ထားပါသလဲ
-------------------
စည်းကမ်းချက်က အဓိကအားဖြင့် ကုမ္ပဏီတွေကို ကြည့်ပါတယ်။ တကယ့်ကိုနာမည်ကောင်းနဲ့၊ ကောင်းတဲ့ဂုဏ်သတင်းနဲ့ ကျော်စောတဲ့ကုမ္ပဏီ ဖြစ်ရမယ်။ နောက်ပြီးတော့ တစ်ဦးတစ်ယောက်တည်းမဟုတ်ဘဲနဲ့ အဖွဲ့အစည်း စိတ်ဓာတ်ရှိရမယ်။ နိုင်ငံတော်ကို အကျိုးပြုချင်တဲ့ စိတ်ဓာတ်ရှိရမယ် စသဖြင့် အရည်အသွေးကောင်းမွန်တဲ့ ကုမ္ပဏီမျိုးတွေကို ကျွန်တော်တို့ စုစည်းထားတာဖြစ်ပါတယ်။
၂၀၁၇ ထဲမှာ Main Challenge အနေနဲ့ ကြုံတွေ့ခဲ့တာတွေ
-------------
ကျွန်တော်တို့ Main Challenge ကတော့ အရောင်းအဝယ်ကျဆင်းတာပါ။ ဈေးနှုန်းကျပြီး အရောင်းအဝယ်သွက်တာ သိပ်ပြဿနာမရှိဘူး။ ဈေးနှုန်းလည်းကျတယ်။ အရောင်းအဝယ်လည်းအေးတယ်။ အဲဒီအပြင်ကို ခွင့်ပြုမိန့်တွေ ကြန့်ကြာတယ်။ ခွင့်ပြုမိန့်တွေ ကြန့်ကြာနေတော့ ကျွန်တော်တို့က အသစ်မဆောက်နိုင်သေးဘူး။ နဂိုစာချုပ်ချုပ်ထားတာတွေ ခွင့်ပြုမိန့်တင်တာကိုက ကြန့်ကြာတယ်။ အဲဒီအပြင် တချို့ဘဏ်တွေဆိုရင် ဆောက်လုပ်ရေးနဲ့ပတ်သက်တဲ့ ချေးငွေတွေ ထုတ်မပေးတော့ဘူး။ ဆောက်လုပ်ရေးပစ္စည်းဈေးကွက်အတွင်း ပစ္စည်းဈေးတွေကလည်းတက်တယ်။ လုပ်သားဈေးတွေကလည်း တက်တယ်။ အဲဒီတော့ ကျွန်တော်တို့က ဘက်ပေါင်းစုံက တော်တော်လေးကို ကျပ်ကျပ်တည်းတည်းနဲ့ ရင်ဆိုင်ခဲ့ရပါတယ်။ ဘယ်လိုပဲဖြစ်ဖြစ် အဲဒီလိုကျပ်တည်းတဲ့ ကာလတစ်ခုမှာ ကြံ့ကြံ့ခံပြီးတော့ ရပ်တည်နိုင်ပြီဆိုရင် ကျွန်တော်တို့ ယူဆထားတာက နောက်အဆင့်တစ်ခုကို ကျော်တက်နိုင်တယ်။ ဒီအခက်အခဲတစ်ခုကို ကျော်ဖြတ်နိုင်တဲ့အတွက် နောက်တစ်ဆင့်ကို ကျွန်တော်တို့တက်ဖို့ ခွန်အားပေးလိုက်တာပါ။
ကျွန်တော်တို့ ဒီနေ့ YDA Group မှာရှိတဲ့ ကုမ္ပဏီကြီးတွေဆိုရင် ဘယ်လိုပဲဖြစ်ဖြစ် ဒါရန်ကုန်မြို့မှာ ဦးဆောင်နေတဲ့ ကုမ္ပဏီတွေ၊ မြန်မာနိုင်ငံမှာ ဦးဆောင်နေတဲ့ ကုမ္ပဏီတွေလို့ပြောလို့ရပါတယ်။ ဒီကုမ္ပဏီတွေက ဒီအခက်အခဲတွေကို ကြံ့ကြံ့ခံတယ်။ နည်းပညာပိုင်းဆိုင်ရာတွေ ဖွံ့ဖြိုးတိုးတက်ဖို့အတွက်။ အဆင့်မြင့်နည်းပညာတွေ တဖြည်းဖြည်းထည့်သွင်းပြီးတော့ တည်ဆောက်လာတယ်။ အဲဒါကြောင့် ကျွန်တော်တို့ ၂၀၁၇ ခုနှစ်မှာ တွေ့ကြုံလာရတဲ့ အခက်အခဲတွေ၊ တွေ့ကြုံလာရတဲ့ အတွေ့အကြုံတွေကို သင်ခန်းစာယူပြီး ၂၀၁၈ ခုနှစ်မှာ ပိုမိုကောင်းမွန်တဲ့ဆီကိုပဲ အားလုံးမျှော်လင့်ပြီး ချီတက်နေကြတာဖြစ်ပါတယ်။
၂၀၁၈ အတွက် မြန်မာ Developer ဈေးကွက်ရဲ့အလားအလာ
----------------
၂၀၁၈ ခုနှစ်ကတော့ မြန်မာ့ Developer ဈေးကွက်ကောင်း မယ်လို့ ကျွန်တော်မျှော်လင့်ပါတယ်။ ဘာလို့လဲဆိုရင် ၂၀၁၆၊ ၂၀၁၇ ခုနှစ်တို့က ဆောက်လုပ်ရေးအခြေအနေရော၊ Property အခြေအနေရော ဆိုးဝါးခဲ့ပါတယ်။ အဆိုးဆိုတာ အမြဲတမ်းရေရှည်မလာပါဘူး။ ၂၀၁၈ ခုနှစ်ကနေစပြီး အကောင်းတွေ ဖြစ်လာတော့မယ်လို့ ကျွန်တော်တို့မျှော်မှန်းပါတယ်။ ဆောက်လုပ်ရေးလောက ကောင်းလာတာနဲ့အတူတူ မြန်မာ့စီးပွားရေးလောကလည်း တစ်စိတ်တစ်ပိုင်း စပြီးတော့ ကောင်းလာနိုင်တယ်လို့ ကျွန်တော်တို့ မျှော်မှန်းထားပါတယ်။
၂၀၁၇ ခုနှစ်မှာ Condominium နည်းဥပဒေလည်း ထွက်ခဲ့ပါတယ်။ နည်းဥပဒေထွက်ပြီး Condo Law က အသက်ဝင်သွားပြီဆိုရင် ၂၀၁၈ ခုနှစ်မှာတော့ ဈေးကွက်အလားအလာကောင်းဖို့ ကျွန်တော်တို့ မျှော်လင့်ထားပါတယ်။ အဲဒီအပြင် နိုင်ငံတော်အကြီးအကဲတွေကို ကျွန်တော်တို့ အကြိမ်ကြိမ်တင်ပြနေတဲ့ အခွန်ကိစ္စကိုလည်း သူတို့အနေနဲ့က လျှော့ချပေးမယ်လို့သိရပါတယ်။ နောက်ဘဏ်တွေရဲ့ ထောက်ပံ့မှုနဲ့ပတ်သက်ပြီးတော့ ကျွန်တော်တို့ အကြိမ်ကြိမ်တင်ပြနေတဲ့အတွက် အခုအချိန်မှာဆိုရင် ဘဏ်တွေနဲ့ပတ်သက်တဲ့ ချေးငွေကဏ္ဍတွေ တစ်ဖက်တစ်လမ်းက ထပ်ပြီးတော့ ပံ့ပိုးပေးလာမယ်ဆိုရင် ပိုပြီးကောင်းမယ်လို့ ကျွန်တော့်အနေနဲ့ မျှော်လင့်ပါတယ်။
၂၀၁၈ ခုနှစ် မြန်မာနိုင်ငံရဲ့ Developer ဈေးကွက်အလားအလာနဲ့ ဘယ်လိုစိန်ခေါ်မှုတွေ တွေ့ရမယ်လို့ ခန့်မှန်းထားပါသလဲ
----------------
Developer Market က ပြီးခဲ့တဲ့ အစိုးရက ၂၀၁၃ - ၂၀၁၄ မှာမှစပြီးတော့ ကောင်းလာတာ ဖြစ်ပါတယ်။ ပြီးခဲ့တဲ့ အစိုးရခေတ်မှာ ရှစ်ထပ်နဲ့အထက် အဆောက်အအုံတွေ ဆောက်ဖို့ ပါမစ်တွေခွင့်ပြုခဲ့တယ်။ အားလုံး ၁၈၅ လုံးရှိပါတယ်။ Project တစ်ခုကို အခန်းတစ်ရာဆိုရင် အခန်းပေါင်းနှစ်သောင်းတောင် ခွင့်ပြုခဲ့တယ်။ ၂၀၁၄ - ၂၀၁၅ ခုနှစ်မှာတော့ မဆောက်ရသေးတဲ့ စီမံကိန်းအကြီးကြီးတွေက ကြိုပွိုင့်တွေရောင်းချခဲ့ရာမှာ တချို့လည်း ရာခိုင်နှုန်း ၅၀၊ တချို့လည်း ရာခိုင်နှုန်း ၇၀၊ ၈၀ လောက် ရောင်းရတယ်။ ရောင်းရပြီးတော့ ကျန်ခဲ့တဲ့ အခန်းတွေက ကျွန်တော်ထင်တယ် ၂၀၁၅၊ ၂၀၁၆၊ အခု ၂၀၁၇ ခုနှစ်လယ်လောက်အထိကို Market က တောက်လျှောက် Graph က အောက်ကို ဆင်းလာတယ်။ အောက်ကိုဆင်းလာနေရင်းနဲ့ပဲ တချို့လည်း ဈေးကိုလျှော့ရောင်းကြတယ်။ အဲဒီတော့ Develop တော်တော်များများက လက်ရှိအချိန်မှာ ထုတ်ရောင်းတဲ့အခါမှာ တချို့ Developer တွေလည်း ကုန်သလောက်နီးနီးဖြစ်နေပြီ။ နောက်ထပ် Project အသစ်တစ်ခုကို စရတော့မယ်။ အဲဒီလိုနောက်ထပ်အခု ၂၀၁၇ ခုနှစ် သီတင်းကျွတ်နောက်ပိုင်းမှာတော့ အရောင်းအဝယ်က တဖြည်းဖြည်းနဲ့ ပိုကောင်းလာတယ်။
ကျွန်တော်တို့ရောင်းချတဲ့ ဈေးတွေဟာဆိုရင် နောက်နှစ်မှာ ဒီဈေးနဲ့ပြန်ရောင်းဆိုရင် ဒီဈေးနဲ့ ဘယ်လိုမှ မရောင်းနိုင်တော့ဘူး။ ဘာလို့လဲဆိုရင် ကျွန်တော်တို့ ဝယ်ထားတဲ့ မြေဈေး၊ ကျွန်တော်တို့ အဆောက်အအုံဆောက်တဲ့ ဈေးနှုန်း၊ သံချောင်းဈေး၊ အလုပ်သမားခ စသည်အားဖြင့် ကျွန်တော်နောက်အသစ် Project ကို ပြန်စမယ်ဆိုရင် ဈေးက မတူတော့ဘူး။
ကျွန်တော်တို့က တိုင်းပြည်တစ်ပြည်မှာ နေထိုင်တယ်ဆိုတာ Developer တွေအပါအဝင် တိုင်းသူပြည်သားတွေက သားသမီး၊ ကျွန်တော်တို့ အစိုးရက မိဘပါ။ ကျွန်တော်တို့ အစိုးရကချမှတ်တဲ့ Rules and Regulations တွေက အရေးကြီးတယ်။ Main Challenging တွေကတော့ ဥပဒေကို ဖြေလျှော့ပေးဖို့နဲ့ Paper Work တွေကို မြန်ဆန်စွာလုပ်ဖို့နဲ့ အဆောက်အအုံ ဆောက်လုပ်ခွင့်ပါမစ်တွေကို Online ကနေ လျှောက်နိုင်ဖို့ဖြစ်ပါတယ်။ Rules and Regulations တွေက အခုအချိန်အထိ တိတိကျကျမရှိသေးဘူး။ ဥပမာ- စည်ပင်က Rules and Regulations တိတိကျကျ မရှိသေးတဲ့အတွက် ကျွန်တော် ဒီမြေကြီးဝယ်ထားတယ်။ ဒီအဆောက်အအုံကို ဒီမြေကျန်နဲ့ ဆောက်မယ်လို့ ရမလားလို့ သက်ဆိုင်ရာတာဝန်ရှိသူတွေကိုသွားမေးရင် တင်ကြည့်လိုက်လို့ပြောလို့ တင်ကြည့်လိုက်ပြီး အောက်ကိုပြန်ဆင်းလာရင် ခြောက်လလောက် ကြာသွားတယ်။ ခြောက်လလောက် ကြာသွားတဲ့အခါမှာ ကျွန်တော်တို့ဘက်က အတိုးတက်နေပြီ။ နံပါတ်တစ်စိန်ခေါ်မှုက ကျွန်တော်တို့ မိဘအစိုးရကတော့ တချို့ Rules and Regulations တွေကို ဖြေလျှော့ပေးမယ်။ ပါမစ်ကို မြန်အောင်လုပ်မယ်။ တချို့ကားပါကင်တွေလည်း မကျပ်သင့်တဲ့နေရာ မကျပ်ဘူးဆိုရင် အင်မတန်ကိုကောင်းမှာပါ။
Developer Market ကတော့ ဒီကနေစပြီး ပိုကောင်းမယ်လို့ မြင်တယ်။ တစ်ချိန်တည်းမှာပဲ နိုင်ငံတော်ကလည်း စုပေါင်းပိုင်ဆိုင်ရာ အဆောက်အအုံဥပဒေဆိုတာ ပြီးခဲ့တဲ့အစိုးရလက်ထက်ကတည်းက ၂၀၁၅ ခုနှစ်၊ ဇန်နဝါရီလောက်ကတည်းက ထွက်ပြီးသား။ အဲဒီလိုမျိုး စုပေါင်းပိုင်ဆိုင်ရာ နည်းဥပဒေများထွက်လာရင် မြန်မာနိုင်ငံသားတွေတင်မဟုတ်ဘဲနဲ့ ပြည်ပက နိုင်ငံခြားသားတွေလည်း သူတို့က ဝယ်ယူနိုင်တော့မှာဖြစ်ပါတယ်။ အဲဒီလိုဝယ်ယူနိုင်တော့မှာ ဖြစ်တဲ့အတွက်ကြောင့် Demand နဲ့ Supply ကို ချိန်ထိုးကြည့်တဲ့အခါမှာ တကယ့်ကွန်ဒိုအစစ် (စံချိန်မီကွန်ဒိုတိုက်ခန်းတွေ) ဆိုတာ ရန်ကုန်တိုင်းဒေသကြီးနဲ့ ယှဉ်မယ်ဆိုရင် အခန်းရေပေါင်းတစ်သောင်းလောက်ပဲရှိတယ်။ အဲဒီတစ်သောင်းကို Foreign က လာတဲ့သူတွေကို ရာခိုင်နှုန်း ၄၀ လောက် ပေးရောင်းမယ်ဆိုရင် မလောက်လောက်ဘူး။ နောက်ထပ် High Building တွေ ထပ်ဆောက်ရဦးမယ်။ ထပ်ဆောက်ရဦးမယ်ဆိုတော့ ကျွန်တော်တို့ တိုင်းပြည်မှာ Infrastructure တွေ အများကြီး လိုအပ်တယ်။ အဲဒီအတွက်ကြောင့် Developer လုပ်ငန်းသည် ရှေ့လျှောက်ကောင်းဖို့ပဲ ရှိပါတယ်။
၂၀၁၈ ခုနှစ် မြန်မာနိုင်ငံရဲ့ Developer ဈေးကွက်အလားအလာနဲ့ ဘယ်လိုစိန်ခေါ်မှုတွေ တွေ့ရမယ်လို့ ခန့်မှန်းထားပါသလဲ
--------------------
အခုနောက်ပိုင်းကတော့ Condo Law တွေ ဘာတွေ ထွက်လာပြီ၊ အတည်ပြုပြီဆိုရင် လူတွေရဲ့ စိတ်ဝင်စားမှုက ပြန်တက်လာနိုင်ပါတယ်။ နောက်ပိုင်း FDI တွေ ဘာတွေဝင်လာပြီဆိုရင် လောလောဆယ် Demand ရှိတဲ့ Location အပိုင်းကတော့ ပိုပြီးတော့ရောင်းရလာမယ်လို့ မြင်ရပါတယ်။
၂၀၁၈ ခုနှစ်မှာ စိန်ခေါ်မှုကတော့ အသစ်တွေ ဈေးတက်လာမယ်။ အလုပ်သမားခတွေ ဈေးမြင့်လာမယ်။ ကောင်းခြင်းကတော့ အရည်အသွေးပိုင်းမှာလည်း ရွေးချယ်စရာတွေ ပိုများလာမယ်။ အဲဒီအတွက် ဝယ်မယ့်သူတွေအတွက်ကတော့ အများကြီးအခွင့်အလမ်းသာပါတယ်။ ကိုယ်နေထိုင်မယ့်နေရာ၊ ကိုယ် Invest လုပ်မယ့်နေရာကို သေချာရွေးချယ်နိုင်မယ်။
အစိုးရပိုင်းကတော့ ပေါ်လစီကို ချမှတ်ပေးရင်တော့ ဝယ်သူတွေရဲ့ ယုံကြည်မှုအပိုင်းတွေ ပိုရရှိလာမယ်။ အခွန်ပိုင်းတွေကအစ သေသေချာချာ စိစိစစ်စစ်လုပ်ပေးနိုင်ရင် Developer တွေအတွက်လည်း ပိုပြီးတော့ အကျိုးပြုသလိုဝယ်ယူသူတွေအတွက်လည်း အကျိုးပြုပါတယ်။
အရောင်းအဝယ် ဈေးကွက်ကတော့ အခုလောလောဆယ်မှာ ပြည်သူတွေက ဝယ်ယူဖို့ ပိုက်ဆံရှိတယ်။ ဒါပေမဲ့ သူတို့က ဈေးကွက်အခြေအနေကို လေ့လာတုန်း၊ ပြန်လည်ဆန်းစစ်တုန်းလို့ မြင်ပါတယ်။
အဲဒါကြောင့် အရောင်းပိုင်းကတော့ အေးနေပါတယ်။ ဒါပေမဲ့ Location ကို အခြေခံပြီးတော့ တကယ်နေမယ့်သူတွေ၊ တကယ် Invest လုပ်မယ့်သူတွေကျတော့လည်း ဝယ်ပါတယ်။
၂၀၁၇ ခုနှစ်နဲ့ နောက်ပိုင်းနှစ်တွေမှာ Developer တွေအနေနဲ့ အဓိကဘာအခက်ခဲတွေ တွေ့ခဲ့ရလဲ
---------------
၂၀၁၄ ခုနှစ်လောက်ကစပြီးတော့ နိုင်ငံရေးအပြောင်းအလဲ ဖြစ်မလားဆိုပြီး စောင့်ကြည့်ခဲ့ကြတယ်။ အစိုးရတက်လာပြီးတဲ့အချိန်မှာ လူတွေက ဈေးကွက်ကျလာမလားဆိုတဲ့ မျှော်လင့်ချက်လေးတွေနဲ့ စောင့်ခဲ့တာဖြစ်ပါတယ်။ ဒါပေမဲ့ သူတို့စောင့်နေတဲ့ဈေးက အနိမ့်ဆုံးဈေး ဖြစ်ပါတယ်။ အဲဒီထက်နိမ့်ဖို့တော့ ဘယ်လိုမှမရှိတော့ပါဘူး။ အဲဒီလို ဈေးကွက်တော့ ဖြစ်ခဲ့ပါတယ်။
၂၀၁၈ ခုနှစ် မြန်မာနိုင်ငံရဲ့ Developer ဈေးကွက်အလားအလာနဲ့ ဘယ်လိုစိန်ခေါ်မှုတွေ တွေ့ရမယ်လို့ ခန့်မှန်းထားပါသလဲ
--------------------
၂၀၁၈ ခုနှစ်မှာ ခု Condominium Law လည်းထွက်ပြီ ဖြစ်ပါတယ်။ နောက်တစ်ခုက Apartment Law လည်း ဆက်ပြီး ရေးဆွဲနေပြီဖြစ်ပါတယ်။ Market ကတော့ ပြန်ပါလာလိမ့်မယ်လို့ ထင်ပါတယ်။
ကျွန်တော်ထင်တာကတော့ ၂၀၁၈ ခုနှစ်မှာ ခုလောက်စိန်ခေါ်မှုများလိမ့်မယ်လို့ မထင်ပါဘူး။ စီးပွားရေးဈေးကွက်၊ အိမ်ခြံမြေဈေးကွက်ဆိုတာ နိုင်ငံတကာမှာ အမြဲတမ်းအကျတောက်လျှောက်သွားတာ မဟုတ်ပါဘူး။ သူ့မှာ Pattern လေးတွေရှိပါတယ်။ အကျဆုံးအချိန်ပြီးရင် ပြန်တက်တာ ဖြစ်ပါတယ်။ ပြီးခဲ့တဲ့နှစ်၊ အခုနှစ်အထိက အကျဆုံးအချိန်လို့ ပြောလို့ရပါတယ်။ လာမယ့်နှစ်မှာကတော့ Pattern အရ Condo Law ထွက်တာရော၊ Apartment Law ရေးဆွဲတာရောဆိုရင် ပြန်တက်လာဖို့ရှိပါတယ်။ အခွန်တွေလည်း လျှော့လိမ့်မယ်လို့ ကြားနေရပါတယ်။ ဈေးကွက်အနေနဲ့ကတော့ ပြန်ကောင်းမယ်လို့ ထင်ပါတယ်။ Developer Association တွေကတော့ ကျွန်တော်တို့တွေက အဓိကနိုင်ငံခြားသား လုပ်ငန်းရှင်တွေကို ပြိုင်ဖို့အတွက် ပြည်တွင်းအားတွေကို စုရမှာဖြစ်ပါတယ်။ ကျွန်တော်တို့က နိုင်ငံခြားသား Developer တွေကို ယှဉ်ဖို့အတွက် ငွေကြေးအင်အားအများကြီး အားနည်းပါတယ်။ ဘဏ်တွေရဲ့ အထောက်အပံ့က ကျွန်တော်တို့နိုင်ငံအတွက် အင်မတန်နည်းပါတယ်။ ကျွန်တော်တို့အနေနဲ့ Developer အသင်းက စုပြီးတော့ အနာဂတ်မှာတော့ တစ်ဦးချင်းရဲ့ Capital တွေနဲ့ ပေါင်းပြီးတော့ နိုင်ငံခြားသား Developer တွေကို ယှဉ်ပြိုင်ဖို့အတွက်က ကျွန်တော်တို့ရဲ့ရည်ရွယ်ချက်ဖြစ်ပါတယ်။
အိမ်၊ ခြံ၊ မြေဝယ်ချင်သူတွေအတွက် အကြံပြုချက်
---------------------
အိမ်၊ ခြံ၊ မြေဝယ်မယ့်သူတွေအနေနဲ့ကတော့ ကျွန်တော်တို့နိုင်ငံမှာ ရွှေလိုဈေးကွက်လေးတစ်ခုရှိပါတယ်။ ဈေးကျတဲ့အချိန်မှာ ဘယ်သူမှမဝယ်ကြဘူး။ ဈေးတက်တဲ့အချိန်မှာ ပြုံဝယ်ကြပါတယ်။ တကယ့်တကယ် Investment လုပ်သင့်တဲ့အချိန်က အခုချိန်ဖြစ်ပါတယ်။ ဝယ်သင့်တဲ့အချိန်လည်း ဖြစ်နေပါတယ်။ ဈေးထပ်ကျဖို့ဆိုတာ ဘယ်လိုမှမရှိပါဘူး။ တည်ဆောက်စရိတ်တွေက တဖြည်းဖြည်းတက်လာတယ်။ အခုဒါတွေကို ဒီဈေးတွေနဲ့ရောင်းနိုင်တယ်ဆိုတာ အရင်ကတည်းကဆောက်ခဲ့တဲ့အချိန်၊ ကုန်ပစ္စည်းနည်းတဲ့အချိန်က တည်ဆောက်ခဲ့လို့ ရောင်းလို့ရတာဖြစ်ပါတယ်။ ကျွန်တော်တို့တွေက Contractor လည်းဖြစ်လို့၊ Developer လည်းဖြစ်လို့ ဒီဈေးနဲ့ရောင်းနိုင်တာဖြစ်ပါတယ်။ တကယ်လို့ နိုင်ငံခြားပုံစံမျိုးနဲ့ Developer သက်သက်လုပ်တယ်ဆိုရင် သူများကို Contractor ပြန်ပေးပြီးမှဆိုရင် ဒီဈေးနဲ့ရောင်းဖို့ဆိုတာ မလွယ်ပါဘူး။ ယနေ့တည်ဆောက်မယ်ဆိုရင် ဘယ်လိုမှမဖြစ်နိုင်ပါဘူး။ ဝယ်မယ့်သူတွေကို ကျွန်တော်အကြံပေးချင်တာကတော့ အခုလက်ရှိ ဆောက်ထားပြီးသားတွေက နောက်သုံးနှစ်မှာ အသစ်ထွက်လာဖို့ဆိုတာမရှိပါဘူး။ တည်ဆောက်မယ်ဆိုရင် အနည်းဆုံးသုံး၊ လေးနှစ်ကြာမှာဖြစ်ပါတယ်။ အခုလက်ရှိ တည်ဆောက်နေတာတွေကတော့ အသစ်လုပ်တာမဟုတ်ဘဲ ခွင့်ပြုမိန့်ကျပြီးသားတွေကိုပဲ ဆက်လုပ်နေတာဖြစ်ပါတယ်။ အခုချိန်မှာ ဝယ်ကိုဝယ်ရမယ့်အချိန်လို့ တိုက်တွန်းချင်ပါတယ်။ နောက်ပိုင်းအသစ်တွေ ထွက်လာမယ်ဆိုရင် မြေအသုံးချမှုကို အခုလောက်ပေးတော့မှာမဟုတ်ပါဘူး။ မြေအသုံးချမှုနည်းလာတဲ့အတွက် အိမ်ရဲ့တန်ဖိုးက ကျသွားစရာမရှိပါဘူး။
ဥပမာ-10000sq ရှိတဲ့ မြေကို ၆၅ ရာခိုင်နှုန်းပေးတယ်ဆိုရင် နောင်တစ်ချိန်မှာ ဖြစ်လာနိုင်တာက ၅၀ ရာခိုင်နှုန်းလောက်ပဲ ပေးတော့မှာ ဖြစ်ပါတယ်။ အဲဒီလိုမျိုးပေးလာရင် အဆောက်အအုံကသေးသွားမယ်၊ သေးသွားတဲ့အပေါ်မှာ ထပ်လျှော့ဖို့မဖြစ်နိုင်တဲ့အတွက် ဖြစ်ပါတယ်။
၂၀၁၈ ခုနှစ် မြန်မာနိုင်ငံရဲ့ Developer ဈေးကွက်အလားအလာနဲ့ ဘယ်လိုစိန်ခေါ်မှုတွေ တွေ့ရမယ်လို့ ခန့်မှန်းထားပါသလဲ
-------------------
လက်ရှိအချိန်မှာ မြန်မာနိုင်ငံရဲ့အိမ်ခြံမြေဈေးကွက်က အဆိုးကြီးလည်းမဟုတ်ပါဘူး။ အခု ဝယ်ယူမယ့် ဝယ်သူတွေအတွက်ကတော့ အကျိုးအများကြီးတော့မရှိဘူး။ ဒါပေမဲ့ လတ်တလောမှာ ဘဏ်တွေကလည်း တက်တက်ကြွကြွနဲ့ Home Loan တွေကို ပေးနေပြီးတော့ Condominium Law ကလည်း နိုင်ငံခြားရင်းနှီးမြှုပ်နှံမှုတွေကိုတော့ ဝင်လာစေမှာဖြစ်ပါတယ်။
ဒါဆိုရင် အိမ်ခြံမြေဈေးကွက်လည်း တိုးတက်မှုရှိလာမှာပါ။ အိမ်ခြံမြေရင်းနှီးမြှုပ်နှံရှင်တွေအတွက် Home Loan တွေ၊ ချေးငွေပြန်ပေးတဲ့အစီအစဉ်တွေ၊ စနစ်ကျတဲ့အိမ်ခြံမြေစီမံခန့်ခွဲမှုနဲ့ ရေရှည်အစီအစဉ်တွေ ရှိလာမှာဖြစ်ပါတယ်။ အိမ်ခြံမြေလုပ်ငန်းရှင်တွေအတွက် ငွေကြေးရရှိမှုက အဓိကကျပါတယ်။ ဒါက အိမ်ခြံမြေဈေးကွက်ကို ရပ်တန့်သွားစေမယ့် တစ်ခုတည်းသော အဟန့်အတားဖြစ်ပါတယ်။
အခုဆိုရင် မြန်မာနိုင်ငံထဲ ဝင်ရောက်လာတဲ့ နိုင်ငံခြားကုမ္ပဏီတွေများလာနေပါတယ်။ သူတို့က မြန်မာနိုင်ငံက သူတွေကို လစာမြင့်မြင့်ပေးပြီးတော့ အလုပ်ခန့်ကြတယ်။ အဲဒီတော့ ဒီလစာကောင်းတဲ့သူတွေက ဘဏ်တွေရဲ့ Home Loan အကူအညီတွေနဲ့ အိမ်ခြံမြေတွေကို ဝယ်ယူလာနိုင်ကြပြီ။ ဒါက ဝယ်အားပိုအားကောင်းမှုတွေ ရှိလာတဲ့ အလယ်အလတ် လူတန်းစားတွေဖြစ်ပါတယ်။ သူတို့က ပထမဆုံး အိမ်ဝယ်ယူသူတွေဖြစ်တယ်၊ အိမ်ခြံမြေရင်းနှီးမြှုပ်နှံရှင်တွေမဟုတ်ဘူး။ ကြင်စဦးဇနီးမောင်နှံတွေ၊ အောင်မြင်နေတဲ့လုပ်ငန်းငယ်ပိုင်ရှင်တွေနဲ့ မိသားစုသစ်တွေက အိမ်ဝယ်ဖို့ အရစ်ကျစနစ်ငွေပေးချေနိုင်သလို ဒီမိသားစုတွေအတွက် ဘဏ်တွေကလည်း Home Loan တွေ ပေးနေကြပါပြီ။
ခြုံပြီးကြည့်မယ်ဆိုရင် မြန်မာ့အိမ်ခြံမြေဈေးကွက်က ရှေ့ပြေးအနေအထားမှာဖြစ်ပါတယ်။ နောင်လာမယ့်နှစ်သုံးဆယ်မှာ လုပ်ငန်းတိုးတက်အောင်လုပ်ဖို့၊ စီးပွားရေးလည်ပတ်ဖို့အတွက် နေရာတွေရှိပါတယ်။ မြန်မာနိုင်ငံ အထူးသဖြင့် ရန်ကုန်ကတော့ ပြောင်းလဲလာမှာပါ။ စင်ကာပူနဲ့ ပုံစံပိုတူလာမှာပါ။ အဲဒီလိုပြောင်းလဲမှုရဲ့ အဓိကတွန်းအားတစ်ခုက အိမ်ခြံမြေလုပ်ငန်းပါ။ နောက်တစ်ခုက နည်းပညာပိုင်းဖြစ်ပါတယ်။
အနာဂတ်ဈေးကွက်က တအားခိုင်မာပြီးတော့ မြန်မာနိုင်ငံမှာ အိမ်ခြံမြေလုပ်ငန်းတိုးတက်မှုရဲ့ ရွှေခေတ် နောက်တစ်ခေတ်ကို ရောက်လာမှာပါ။ ဘာကြောင့်လဲဆိုတော့ အိမ်ခြံမြေလုပ်ငန်းက လည်ပတ်နေတာပြီးတော့ အချိန်တိုင်း မြင့်တက်လာနေတာဖြစ်လို့ပါ။ အိမ်ခြံမြေဈေးကွက်ကို တွန်းအားပေးတဲ့ အကြောင်းရင်းနှစ်ချက် ရှိပါတယ်။ တစ်ခုက Home Loan ပေးတဲ့ဘဏ်တွေနဲ့ နောက်တစ်ခုက နိုင်ငံတကာက Condominium Law တွေကို ကျင့်သုံးအကောင်အထည်ဖော်ဖို့ပါ။
ဒီနှစ်ချက်က မြန်မာနိုင်ငံရဲ့အိမ်ခြံမြေဈေး ကွက်ကို တိုးတက်မှုရှိတဲ့ နောက်ခေတ်တစ်ခေတ်ဆီကို ပို့ဆောင်ပေးမှာဖြစ်ပါတယ်။ နိုင်ငံတကာမှာ ဘဏ်တွေက Home Loan တွေပေးတယ်၊ ဒါက အကျိုးအမြတ် ဖြစ်ထွန်းစေတဲ့အရာဖြစ်ပါတယ်။ ဒီနေ့ပွဲမှာ အိမ်ဝယ်မယ့်သူတွေကို Home Loan ပေးဖို့အတွက် အိမ်ခြံမြေလုပ်ငန်းရှင်တွေနဲ့အတူတူ တက်တက်ကြွကြွပါဝင်လာတဲ့ CB Bank နဲ့ AYA Bank တို့ကို တွေ့မြင်ရတဲ့အတွက် ဝမ်းသာပါတယ်။ အခု Condominium Law လည်းရှိလာပြီဆိုရင် လက်လီအိမ်ခြံမြေရင်းနှီးမြှုပ်နှံမယ့်သူတွေဆီက နိုင်ငံခြားရင်းနှီးမြှုပ်နှံမှုအနေနဲ့ ဒေါ်လာသန်းပေါင်းများစွာ ဝင်လာတော့မှာပါ။ မြန်မာနိုင်ငံက အိမ်ခြံမြေတွေကို နိုင်ငံခြားသားဝယ်ယူသူတွေ ရှိလာတာက ကောင်းတဲ့အချက်ပါ။ ဘာကြောင့်လဲဆိုတော့ မြန်မာနိုင်ငံက ရင်းနှီးမြှုပ်နှံမှုကောင်းတစ်ခုလို့ ယူဆလို့ ဖြစ်ပါတယ်။
ပြည်တွင်းက အိမ်ခြံမြေလုပ်ငန်းရှင်တွေကို နိုင်ငံတကာနဲ့ ယှဉ်ပြိုင်နိုင်ဖို့ ဘယ်လိုလုပ်ဆောင်စေချင်လဲ
--------------
နိုင်ငံတိုင်းမှာ Joint Venture လုပ်ငန်းတွေအမြဲရှိပါတယ်။ ကျွန်တော်အကြံပေးချင်တာက ပြည်တွင်းအိမ်ခြံမြေလုပ်ငန်းရှင်တွေအနေနဲ့ နိုင်ငံတကာကလုပ်ငန်းတွေနဲ့ Joint Venture လုပ်စေချင်တယ်။ ပြည်တွင်းကသူတွေက မြေယာများများကို ပိုင်ဆိုင်ထားမယ်၊ နိုင်ငံခြားက လုပ်ငန်းရှင်တွေက နည်းပညာတွေ၊ ကာလရှည်ကြာလုပ်ငန်းလည်ပတ်ခဲ့တဲ့သမိုင်းကြောင်းတွေနဲ့လုပ်ငန်းစဉ်တွေ ယူလာမယ်။ ဥပမာပြောရရင် ရုံးခန်းအဆောက်အအုံနဲ့ လူနေအဆောက်အအုံတွေကို တွဲဖက်လုပ်ခြင်းက အောင်မြင်တဲ့ Joint Venture ပုံစံတစ်ခုပါ။ ဒါကြောင့် ပြည်တွင်းအိမ်ခြံမြေလုပ်ငန်းရှင်တွေကို Joint Venture လုပ်ပြီးတော့ နိုင်ငံတကာက အိမ်ခြံမြေလုပ်ငန်းတွေရဲ့ အတွေ့အကြုံတွေကို ရရှိအောင်လုပ်ဖို့ ကျွန်တော်အကြံပြုချင်ပါတယ်။
အယ်ဒီတာအဖွဲ့
