အမေရိကန်ကုမ္ပဏီများ၏မြန်မာနိုင်ငံနှင့်အာဆီယံ စီးပွားရေးကဏ္ဍကိုသုံးသပ်လေ့လာချက်

သြဂုတ်လ ၂၈ ရက်နေ့က နေပြည်တော်တွင် ပြုလုပ်သော အာဆီယံစီးပွားရေးဝန်ကြီးများ အစည်းအဝေးတွင် ထုတ်ပြန်သော အာဆီယံစီးပွားရေး လေ့လာသုံးသပ်ချက်အရ အာဆီယံနိုင်ငံရှိ အမေရိကန်ကုမ္ပဏီများက စီးပွားရေးရင်းနှီးမြုပ်နှံမှု တိုးချဲ့ခြင်း၊ လုပ်သားအင်အား တိုးချဲ့ခြင်းနှင့် ၂၀၁၅ခုနှစ်တွင် အကျိုးအမြတ်များ တိုးများလာမည်ဟု မျှော်မှန်းထားကြောင်း သတင်းထုတ်ပြန်ခဲ့ကြောင်း သိရပါသည်။ အဆိုပါ အာဆီယံစီးပွားရေးလေ့လာသုံးသပ်ချက်ကို အမေရိကန်ကုန်သည်ကြီးများအဖွဲ့နှင့် အမေရိကန် ကုန်သည်ကြီးများအဖွဲ့(အာဆီယံ)တို့မှ အကောင်ထည်ဖော် ဆောင်ရွက်ခဲ့ပြီး အာဆီယံ ၁၀ နိုင်ငံရှိ အမေရိကန် အသေးစား၊ အလတ်စားနှင့် အကြီးစားကုမ္ပဏီပေါင်း ၅၈၈ခု ၏ စီမံခန့်ခွဲမှုဆိုင်ရာ တာဝန်ရှိသူများပါဝင်အကောင်အထည်ေဖာ် ဆောင်ရွက်ခဲ့ကြောင်း၊ ၂၀၁၅ခုနှစ်နှင့် အာဆီယံ စီးပွားရေးအသိုက်အမြုံ AEC စတင်နီးကပ်လာသည်နှင့်အမျှ အမေရိကန် ကုမ္ပဏီများသည် ဒေသဆိုင်ရာစီးပွားရေးအခွင့်အလမ်းများအတွက် ပြင်ဆင်နေပြီဖြစ်ကြောင်း၊ စီးပွားရေးသမားအများစု အနေဖြင့် AEC ၏ စီးပွားရေးဦးတည်ချက်ကို ၂၀၂၀ခုနှစ် သို့မဟုတ် ၂၀၂၀ နှောင်းပိုင်းကာလများတွင် ပန်းတိုင်ရောက်ရှိရန် ကြိုးပမ်းနေမှုများကို စိတ်ချလက်ချ ယုံကြည်မှုမရှိသေးကြောင်း၊  မြန်မာနိုင်ငံတွင်လုပ်ငန်းများလုပ်ဆောင်နေသော စီးပွားရေးသမား သုံးပုံ တစ်ပုံတို့က ၎င်းတို့ကုုမ္ပဏီများ၏ ကုန်သွယ်ရေးအဆင့်အတန်းနှင့် အာဆီယံစီးပွားရေး ရင်းနှီးမြုပ်နှံမှုများ မှာ လွန်ခဲ့သော၂နှစ်မှ တိုးတက်လာကြောင်းနှင့် နောက်၅နှစ်အထိ ဆက်လက်တိုးပွားရန် မျှော်မှန်းထားကြောင်း၊ ယေဘုယျအားဖြင့် မြန်မာနိုင်ငံတွင် လာရောက်လုပ်ကိုင်နေသည့် ၈၆%သော စီးပွားရေးလုပ်ငန်းရှင်များက အာဆီယံပေါင်းစည်းမှုသည် ၎င်းတို့ကုမ္ပဏီများ၏ ဒေသတွင်းစီးပွားရေးလုပ်ငန်းများလုပ်ဆောင်ရာတွင် ကူညီထောက်ပံ့ပေးမည့် အရေးကြီးသော အခန်းကဏ္ဍ တစ်ခုဖြစ်သည်ဟု ယုံကြည်ကြကြောင်း၊ ၉၁% သော စီးပွားရေးလုပ်ငန်းရှင်များက မြန်မာနိုင်ငံရှိ ၎င်းတို့၏ကုမ္ပဏီများ တိုးချဲ့နိုင်ရန် မျှော်လင့်ကြောင်းနှင့်  အများစုကကုမ္ပဏီ၏ အကျိုးအမြတ်များကို ၂၀၁၅ခုနှစ်တွင်ပိုမို တိုးပွားလာမည်ဟု မျှော်မှန်းထားခြင်းဖြင့် စီးပွားတိုးချဲ့ရေး မျှော်မှန်းချက်မှာ မြင့်မားလျက်ရှိကြောင်း သိရပါသည်။