စာသားအဓိပ္ပာယ်ကို တည့်တည့်ယူမည်ဆိုလျင် 'ဝယ်သူများနှင့် ဆက်ဆံရေးကိုစီမံခန့်ခွဲခြင်း' ဟုပင်ဆိုရမည် ဖြစ်သည်။ ကွန်ပျူတာခေတ်အခါအရ အသုံးပြုသူများက ကွန်ပျူတာ Software အသုံးပြုမှုနှင့် ရောင်းသူဝယ်သူတို့ အကျိုးစီမံခန့်ခွဲခြင်းသဘောတရားများကို ဆိုလိုခြင်းဖြစ်လာသည်။ တစ်နည်းအားဖြင့် ယခုအသုံးအနှုန်း ဖြစ်ပေါ်လာမှုသည် ကွန်ပျူတာခေတ်တွင် ဆင်းသက်ပေါက်ဖွားလာခြင်း ဖြစ်သည်။ ဝယ်သူများကို အကျိုးရှိရှိ မိမိပိုင်ဖြစ်နိုင်ရန် ကွန်ပျူတာအသုံးပြုမှု လမ်းကြောင်းအမျိုးမျိုးနှင့် စီးပွားရေးလုပ်ငန်းများ ဖန်တီးရယူတိုးချဲ့သည်ကို တွေ့လာရသည်။ နည်းပညာခေတ်၏ တီထွင်ဆန်းသစ်မှုဟုလည်း ဆိုရမည်ဖြစ်ပါသည်။ နည်းပညာအသုံးပြု၍ ဝယ်သူများ၏အလိုနှင့် အပြုအမူတို့ကို သိရှိနားလည်အောင်လုပ်ပြီး ပို၍ကောင်းမွန်သော၊ အကျိုးရှိသော ဆက်ဆံရေးမျိုးရအောင် အားထုတ်ကာ မိမိရောင်းကုန်ကို ပိုမိုရောင်းရအောင် လုပ်ခြင်းပင်ဖြစ်သည်။
မိမိလုပ်သည့် လုပ်ငန်းအမျိုးမျိုး Service Products များအတွက် Customer အများကြီးရစေရန် ထိန်းသိမ်းပြီး ဝင်ငွေမှန်မှန် အမြဲရနိုင်ရန်အတွက် CRM ကို ကွန်ပျူတာ Database တည်ဆောက်ကာ ဆက်သွယ်မှု အမျိုးမျိုးပြုလုပ်ပြီး ဝန်ဆောင်မှုနှင့်ကုန်ပစ္စည်းများကို ရောင်းချကြသည်။ ဝယ်သူအသစ်ရစေဖို့ထက် ဝယ်သူတစ်ဦးကို မိမိထုတ်ကုန်နှင့်ဝန်ဆောင်မှုအမျိုးမျိုးအကြောင်း Channal များ၊ Websites များ၊ Call Centres များတွင် သတင်းအချက်အလက်ပေးနိုင်ပြီး ဖောက်သည်ကောင်းများအဖြစ် ရထားခြင်းဟူသည့် ပိုမိုအကျိုးရှိသော စီမံချက်များ ထွက်ပေါ်လာသည်။
ကုမ္ပဏီကြီးများသည် နည်းပညာ (Technology) ကို အသုံးပြုများသဖြင့် CRM ကို အကျိုးရှိစွာ သုံးနိုင်သည်။ စားသုံးသူများ၏ သတင်းအချက်အလက်များကို ရယူစုဆောင်း၍ စိစစ်သုံးသပ်ကာ ရောင်းချမှုကို လွယ်ကူစေသည်။ CRM ကုမ္ပဏီများမှာ Software ရောင်းချသောကုမ္ပဏီများပင် ဖြစ်သည်။ CRM ကို အသုံးများသောလုပ်ငန်းများမှာ ဘဏ်လုပ်ငန်းများ၊ အာမခံလုပ်ငန်းများ ဖြစ်သည်။ ချေးငွေအမျိုးမျိုး၊ အာမခံ အမျိုးမျိုးတို့ကို ဆက်သွယ်ရောင်းချခြင်းဖြင့် Customer တစ်ဦးချင်းစီကို Database ဖြင့် အမြဲဆက်သွယ်၍ ထိန်းသိမ်းထားပြီး စီမံခန့်ခွဲခြင်းပင် ဖြစ်သည်။ ဝယ်သူများ၏ သတင်းအချက်အလက်များကို ရယူထားသောအခါ ယင်းတို့နှင့်အရောင်းဆက်ဆံရေးကို လိုသလို စီမံနိုင်သည်။ ဆက်သွယ်၍ ဝယ်သူအလိုရှိမည့် ဝယ်နိုင်ခြေကို ဖန်တီးနိုင်သည်။ သို့ရာတွင် နည်းပညာအသုံးပြုမှု စရိတ်ကြီးသဖြင့် ကုမ္ပဏီကြီးများသာ အသုံးပြုနိုင်ကြသည်။
နောက်ပိုင်းတွင်မူ Computer Service Providers များက CRM Applications များကို အငှားချလုပ်ပေးသဖြင့် လုပ်ငန်းငယ်များပါ အသုံးချနိုင်လာသည်။ အသုံးပြုမှု ပိုမိုကျယ်ပြန့်လာသည်။ ထို့ကြောင့် CRM ၏ အချုပ်သဘောမှာ မိမိ၏အကြီးဆုံး၊ အကောင်းဆုံးဝယ်သူများ၏ လိုအပ်မှုများဆောင်ရွက်ပေးနိုင်ရန်၊ ရောင်းချပေးနိုင်ရန် IT နည်းပညာကိုသုံးသည့် ရောင်းချမှုစီမံခန့်ခွဲခြင်းပင်ဖြစ်သည်။ နည်းပညာဆက်သွယ်မှု အကြိမ်ကြိမ်အခါခါလုပ်သည်ကို ငြီးငွေ့သည့် ဝယ်သူများလည်း ရှိနိုင်၍ လိုသည်ထက်မပိုရန်ကိုပါ သတိရှိရန် လိုအပ်ပေလိမ့်မည်။
CRM သဘောတရားကို လက်တွေ့စအသုံးချပြီး နှစ်အတော်များများအထိ စီမံခန့်ခွဲမှုပညာရှင်များက လေးစားအားထားကြသော်လည်း အချို့မှာမူ အပြစ်မြင် ရှုတ်ချကြသည်။ စီးပွားရေးကုမ္ပဏီကြီးတချို့သည် ကွန်ပျူတာနည်းပညာ၊ Online အသုံးပြုသည့်နည်းလမ်းများနှင့် ဝယ်သူများကို အပိုင်ဖြစ်ရန် ကြိုးစားကြသော်လည်း မအောင်မြင်မှုများရှိသည်ကို တွေ့ရသည်။ ငွေကုန်ကြေးကျများပြီး မအောင်မြင်သည့် Project များအကြောင်း သတင်းပျံ့နှံ့ကာ CRM ကို အဆိုးဘက်က မြင်ကြသည်များလည်းရှိသည်။ CRM သုံးနိုင်သော ကုမ္ပဏီကြီးများအဖို့မူ အရာရာ၌ တွင်ကျယ်စွာအသုံးပြုနိုင်၍ CRM Software Service Providers လုပ်ငန်းများ တိုးတက်လာသည်။ CRM သဘောတရားသည်လည်း ပိုမိုကျယ်ပြန့်နားလည်လာကြသည်။
CRM ၏ အချုပ်သဘောမှာ မိမိ၏ အကောင်းဆုံးဖောက်သည်ဝယ်သူများကို စုပေါင်းရရှိအောင် လုပ်နိုင်ဖို့ပင် ဖြစ်သည်။
ဒေါက်တာ ဒေါ်ရီရီမြင့် (ပါမောက္ခ-ငြိမ်း-ရန်ကုန်စီးပွားရေးတက္ကသိုလ်)
