ဒေါက်တာ ကေ
ကိုရိုနာဗိုင်းရပ်စ် အသစ်ကြောင့် စိုးရိမ်မှုများကြီးထွားလာကြပါသည်။ အင်တာနက်တွင်လည်းခုခံအားစနစ် မြှင့်တင်နိုင်မည့် နည်းလမ်းများကို ရှာဖွေမှုမှာမြင့်တက်လာပါသည်။ ခုခံအားစနစ်မြင့်တက်စေသော အစားအသောက်များ ရှိပါသလား။ ဗီတာမင်များကကော ကူညီနိုင်ပါသလား။
ခုခံအားစနစ်ဆိုသည် မှာ ခန္ဓာကိုယ်အတွင်း ရောဂါပိုးမွှား မဝင်ရောက်စေရန် ကာကွယ်ပေးသောခန္ဓာကိုယ်ဆဲလ်များအင်္ဂါအစိတ်အပိုင်းများနှင့် တစ်ရှုးများ ပူးပေါင်းဆောင်ရွက်နေသည့်ရှုပ်ထွေးသော ကွန်ယက်အဖွဲ့အစည်းတစ်ခု ဖြစ်ပါသည်း။မျိုးရိုးဗီဇအခြေအနေ များပါဝင်သည်ဟုယူဆကြပြီး အမွှာပူးများ၏ ခုခံအား စနစ်ကို ပြိုင်တူလေ့လာကြည့်ရာ ခုခံအားစနစ်၏တောင့်တင်းကြံ့ခိုင်မှုအခြေအနေသည်မျိုးဗီဇအချက်အလက်များနှင့် သက်ဆိုင်မှုမရှိသည်ကိုတွေ့ရှိရပါသည်။ကျွန်ုပ် တို့၏ အားကောင်းသော ခုခံအား တုံ့ပြန်မှုစနစ်မှာ မိမိတို့ဘဝတစ်သက်တာလုံးထိတွေ့လာခဲ့သည့် ရောဂါပိုးမွှားများ ၊ စိတ်ဖိစီးမှုများ၊အိပ်စက်မှု အလေ့အကျင့်၊ အစားအသောက်နှင့်လေ့ကျင့်ခန်းစသော လူနေမှု ပုံစံများ အပေါ်တွင်သာ အဓိကမူတည်နေပါသည်။
အခြေခံအားဖြင့် သင့်ကို ဤကိုရိုနာဗိုင်းရပ်စ် အသစ်မှ ကာကွယ်ပေးရန်မှော်ဆေးစွမ်းကောင်းများ(သို့မဟုတ်) သင်၏ခုခံအားစနစ် ကို အသေအချာ မြင့်တက်လာစေမည့်သီးခြားအစားအစာဟူ၍မရှိပါ။ သို့သော် သင့်ကိုယ်ကို သေချာစွာ ကာကွယ်စောင့်ရှောက်နိုင်မည့် နည်းလမ်းများနှင့် အသက်ရှုလမ်းကြောင်းဆိုင်ရာရောဂါ များကို အကောင်းမွန်ဆုံးကာကွယ် နိုင်မည့်ခုခံအားစနစ်ဖြစ်လာစေရန် နည်းလမ်းများရှိနေပါသည်။
စိတ်ဖိစီးမှုကိုလျှော့ချပါ။
ကိုရိုနာဗိုင်းရပ်စ်ကိစ္စအပေါ်စိုးရိမ်ခြင်း၊ စီးပွားရေးအခြေအနေ နှင့်ဘဝ၏စိတ်ညစ်ညူးဖွယ်ရာများကသင်၏ စိတ်ဖိစီးမှုကို မြင့်တက်စေပါသည်။ သို့သော် စိတ်ဖိစီးမှုများက သင့်ကိုအသက်ရှူလမ်းကြောင်းဆိုင်ရာ ရောဂါများကိုပိုမိုဖြစ်ပွားစေနိုင်ကြောင်း ကျွန်ုပ်တို့ သိရှိပြီးဖြစ်ပါသည်။
လွန်ခဲ့သော နှစ်နှစ်ဆယ်ခန့်က ကာနချ် မယ်လွန်တက္ကသိုလ် (Carnegie Mellon University)တွင်ပြုလုပ်သော မှတ်သားဖွယ်ရာ လေ့လာမှု များတွင် ကိုယ်ပိုင်ဆန္ဒဖြင့် ဝင်ရောက်ကူညီသူများကို ရာသီတုပ်ကွေးဗိုင်းရပ်စ်တမျိုးဖြင့် ထိတွေ့စေ၍ ရောဂါဖြစ်ပွားမှုကို လေ့လာနိုင်ရန် သီးခြားခွဲထားခဲ့ပါသည်။ယင်းနောက် မိမိတို့၏ ဘဝတွင် စိတ်ဖိစီးမှုအနည်းငယ်သာရှိသော လူများ၌ ရောဂါလက္ခဏာများ အနည်းငယ်သာ ပေါ်ပေါက်လာသည်ဟု သုတေသီများမှတွေ့ရှိခဲ့ပါသည်။အိုဟိုင်းယိုးပြည်နယ်တက္ကသိုလ် (Ohio State University) ၏အခြားသောလေ့လာတွေ့ရှိမှုများ အရလည်း အိမ်ထောင်ရေးပဋိပက္ခ ဖြစ်မှုသည် ခုခံအားစနစ်ကို အဓိကထိခိုက်နေသည်ဟု တွေ့ရှိရပါသည်။နောက်ဆက်တွဲလေ့လာမှုများတွင်လည်း သုတေသီများမှ ပါဝင်ကူညီသူများ၏ လက်မောင်းတွင် ဒဏ်ရာအနည်းငယ် ဖြစ်ပေါ်စေ၍ အနာနှင့်ပတ်သက်သော အကောင်းမြင်သဘောထား သို့မဟုတ် အနာနှင့်ပတ်သက်၍ စိတ်ဖိစီးမှု ခေါင်းစဉ်နှစ်ခုစလုံးကို အိမ်ထောင်ရှင်စုံတွဲများခွဲခြား၍ ဆွေးနွေးပြောဆိုစေပါသည်။ထိုသို့ဆွေးနွေးရာတွင် စိတ်သက်တောင့်သက်သာဖွယ်ဖြစ်သောဆွေးနွေးမှုများပြုလုပ်ကြသည့် အိမ်ထောင်ရှင်စုံတွဲများ၏ အနာများတွင် ပုံမှန်အနာအခြေအနေနှင့် အနာကျက်ရန် တစ်ရက်ခွဲကျော်သာကြာမြင့်သည်ကို တွေ့ရှိရပါသည်။အချင်းချင်းရန်လိုမှုနှင့် အထူးသဖြင့် အနာအပေါ် ဖိအားများနေသည့် စုံတွဲများ၌တွင်မူ အနာကျက်ရန် နှစ်ရက်ကျော် ကြာမြင့်သည်ကို တွေ့ရှိရပါသည်။
မှတ်သားရန်အချက်။ ။ ထို့ကြောင့် အရေးကြီးသည့်အချက်မှာ သင့်တွင်စိတ်ဖိစီးမှု မရှိလျှင် သင်၏ခန္ဓာကိုယ်မှာ အနာမြန်မြန်ကျက်စေခြင်းနှင့် ရောဂါဝေဒနာများကို ပိုမိုကောင်းမွန်စွာတိုက်ထုတ်နိုင်ပါသည်။ တရားထိုင်ခြင်း၊ အသက်ရှူလေ့ကျင့်ခန်းပြုလုပ်ခြင်းနှင့် ကျွမ်းကျင်သောစိတ်ကုထုံးပညာရှင်များနှင့် စကားပြောခြင်း စသည့် စိတ်ဖိစီးမှုထိန်းချုပ်နိုင်သည့် နည်းလမ်းများကို လေ့ကျင့်ထားခြင်းဖြင့် သင်၏ခုခံအားစနစ်ကို ပိုမိုကောင်းမွန်လာစေရန် ပြုလုပ်ပေးနိုင်ပါသည်။
အိပ်ချိန်ပုံမှန်ထားပေးပါ။
ကောင်းမွန်သော ခုခံအားစနစ်က ရောဂါပိုးမွှားများကို တိုက်ထုတ်နိုင်ပါသည်။အိပ်ချိန်မပြည့်ဝသူတစ်ဦး၏ ခုခံအားစနစ်မှာမူ ကောင်းမွန်စွာအလုပ်မလုပ်နိုင်ပါ။အံ့ဩဖွယ်ရာ လေ့လာမှုတစ်ခုတွင် သုတေသီများကအမျိုးသားနှင့် အမျိုးသမီးစုစုပေါင်း ၁၆၄ ယောက်ကိုမိမိတို့ဆန္ဒအလျှောက် တုပ်ကွေးရောဂါဗိုင်းရပ်စ်ပိုးနှင့် ထိတွေ့စေပါသည်။ သို့သော် လူတိုင်းဖျားနာခြင်းမရှိပါ။ ပုံမှန်တစ်ညလျှင် ခြောက်နာရီထက် လျော့နည်း၍ အိပ်စက်သော လူများမှာ အိပ်ချိန်ခုနှစ်နာရီကျော်လွန်သော လူများနှင့်နှိုင်းယှဉ်လျှင် ရောဂါဖြစ်ပွားစေနိုင်မှု ၄.၂ ဆပိုမိုများပြားစေနိုင်ကြောင်း သုတေသီများမှတွေ့ရှိခဲ့ပါသည်။တစ်ညလျှင် ငါးနာရီထက် ပိုမိုနည်းပါးစွာ အိပ်စက်သူများမှာလည်း ရောဂါဖြစ်ပွားနိုင်ခြေ ပိုမိုမြင့်မားပါသည်။
မှတ်သားရန်အချက်။ ။ကောင်းမွန်လုံလောက်စွာ အိပ်စက်ခြင်း အလေ့အကျင့်မှာ သင်၏ခုခံအားစနစ်ကို တိုးတက်ကောင်းမွန်စေသော နည်းလမ်းကောင်းတစ်ခု ဖြစ်ပါသည်။ပြည့်စုံလုံလောက်သော အိပ်ချိန်မှာ တစ်ညလျှင် ခြောက်နာရီမှ ခုနစ်နာရီကြား ရှိရပါမည်။အိပ်ယာဝင်ချိန်နှင့် အိပ်ယာထချိန်များကို ပုံသေအချိန်သတ်မှတ်ထားပေးပါ။ ညဘက်အိပ်ချိန်တွင် မိုဘိုင်းဖုန်းများ၊ကွန်ပြူတာများ၊တက်ဘလက်များကိုကြည့်ရှုခြင်း၊မအိပ်ခင် လေ့ကျင့်ခန်းပြုလုပ်ခြင်းနှင့် အစာစားခြင်းတို့ကို ရှောင်ကြဉ်ရပါမည်။
သင်၏ကိုယ်တွင်း ဗီတာမင်ဒီ ပမာဏကို စစ်ဆေးပေးပါ။
ဗီတာမင်ဒီနှင့် ခုခံအားစနစ်အကြား ဆက်စပ်မှုအတွက် လေ့လာမှုအချို့ ပိုမိုလိုအပ်နေသော်လည်း အချို့အားတက်ဖွယ်ရာ သုတေသနလေ့လာချက်များကဗီတာမင်ဒီပမာဏကို စစ်ဆေး၍ ဗီတာမင်ဒီဆေးများသောက်သုံးခြင်းမှာ အသက်ရှူလမ်းကြောင်းဆိုင်ရာ ရောဂါများကို တိုက်ထုတ်နိုင်ရန် အကူအညီပေးနိုင်ကြောင်း အကြံပြုထားပါသည်။လေ့လာမှုတစ်ခုတွင် သက်ကြီးလူနာ ၁၀၇ ယောက်မှ အချို့လူနာများကိုဗီတာမင်ဒီ ပမာဏမြင့်မားစွာ ပေးထား၍ အချို့ကို ပုံမှန်ပမာဏပေးထားပါသည်။တစ်နှစ်အကြာတွင် ပမာဏမြင့်မားစွာပေးထားသော လူနာများတွင် ပုံမှန်ပေးထားသော လူနာများထက် တစ်နှစ်အတွင်း အသက်ရှူလမ်းကြောင်းဆိုင်ရာ ရောဂါဖြစ်ပွားမှုနှုန်း ၄၀ရာခိုင်နှုန်းခန့် လျော့နည်းသည်ကိုလည်း သုတေသီများမှ တွေ့ရှိခဲ့ပါသည်။မကြာသေးမီကပြုလုပ်သော ကျပန်းရွေးချယ်ထားသော လူနာ ၁၁,၀၀၀ကိုလေ့လာစမ်းသပ်မှု ၂၅ခုပြုလုပ်ရာတွင် ဗီတာမင်ဒီ အပိုတိုက်ကျွေးထားခြင်းမှာ အသက်ရှူလမ်းကြောင်းဆိုင်ရာ ရောဂါများကို ပိုမိုကာကွယ်ပေးနိုင်ကြောင်းလည်း တွေ့ရှိရပါသည်။သို့သော် တွေ့ရှိရသည့်အချက်အလက်များမှာ အသေအချာ ပြောဆိုရန်ခက်ခဲပြီးအချို့လေ့လာချက်များကလည်း ဗီတာမင်ဒီသည်ကောင်းမွန်သော အကျိုးသက်ရောက်မှုမရှိဟူ၍ လည်းဖော်ပြကြပါသည်။
(Ref: Channelnewsasia.com’s How to boost your immune system during COVID-19)
