Mainstream Marketing Advice အရ ဈေးကွက်အတွက် လူဦးရေအရေအတွက်က အရေးကြီးတယ်လို့ ဖော်ပြထားပါတယ်။ ဒါပေမဲ့ စီးပွားရေးလုပ်ငန်းအများစုတွေအတွက် ပုံမှန်ရောင်းအားရှိဖို့ Follower သောင်းဂဏန်းနဲ့အထက်ရှိဖို့မလိုပါဘူး။ ကုန်ပစ္စည်းအမှတ်တံဆိပ်နဲ့ ပတ်သက်ပြီးအကြံဉာဏ်ပေးသူ အိန္ဒိယနိုင်ငံကဂျက်ဆန်ဆိုသူက လူမှုကွန်ရက်ကစွန့်ဦးလုပ်ငန်းရှင်တွေနဲ့အသေးစားစီးပွားရေးတွေနဲ့ပတ်သက်ပြီး လေ့လာမှုတွေလုပ်ခဲ့ပါတယ်။ ဂျက်ဆန်ကသူ့ရဲ့ဖောက်သည်လုပ်ငန်းရှင်တွေကို ခြောက်နှစ်စာစာချုပ်ထဲမှာ Instagram ကနေ Follower ခြောက်ရာသာသာနဲ့ရောင်းအားကောင်းအောင်ကူညီထားပါတယ်။ လျို့ဝှက်ချက်ကတော့ Follower တွေနဲ့ အမြဲတစေထိတွေ့ဆက်ဆံမှုရှိဖို့ အလေးထားပြီး Fan Group တွေဖန်တီးကာသူတို့ကနေတစ်ဆင့် ကုန်ပစ္စည်းတွေကို ပြန်လည်ကြော်ငြာရောင်းချစေခြင်းဖြစ်ပါတယ်။
မိမိရဲ့လူမှုကွန်ရက်ပလက်ဖောင်း Account မှာ Follower နည်းသည်ဖြစ်စေ၊ များသည်ဖြစ်စေသူတို့နဲ့အမြဲထိတွေ့ဖို့ကိုဂရုပြုရပါမယ်။ မိမိရဲ့ပရိသတ်တွေနဲ့ကောင်းမွန်တဲ့ဆက်ဆံရေး ဖန်တီးနိုင်တယ်ဆိုရင်အဖွဲ့တွေရှိလာမှာဖြစ်ပြီး ကိုယ့်ရဲ့ကုန်ပစ္စည်းတွေကို သူတို့ကပြန်လည်ကြော်ငြာပေးရုံသာမကရောင်းချပေးဖို့အထိလုပ်ဆောင်လာကြပါလိမ့်မယ်။ ဒီနေရာမှာလုပ်ငန်းတစ်ခုကြီးထွားဖို့ထက် ကောင်းမွန်တဲ့ဆက်ဆံရေးတည်ဆောက်ဖို့ကို အလေးထားပါတယ်။ ဒါကြောင့်ဆက်ဆံရေးခိုင်မြဲပြီး နောက်အဆင့်တစ်ခုတက်နိုင်ဖို့ နည်းဗျူဟာလေးမျိုးကို ဖော်ပြပေးလိုက်ပါတယ်။
၁။ ကျေးဇူးတင်စကား ပြောပါ။
Instagram မှာလစဉ် Active User ပေါင်းတစ်ဘီလီယံရှိပါတယ်။ LinkedIn မှာတော့သန်း ၂၆၀ ရှိပြီး Facebook ကတော့ ၂.၇ ဘီလီယံနဲ့ထိပ်ဆုံးမှာရှိပါတယ်။ ဒီသန်းပေါင်းများစွာ Active User တွေထဲကလူအနည်းငယ်က သင့် Account ကို Following လုပ်ကြပါတယ်။ ဒီအတွက်သူတို့ကို 'ကျေးဇူးတင်စကား'ဆိုပါ။
လွယ်ကူတဲ့နည်းလမ်းအနေနဲ့ Follower အသစ်ဆီကို ရိုးရှင်းပြီး တိုက်ရိုက်ကျတဲ့ ကျေးဇူးတင်စာတစ်စောင်ပို့ပါ။ ဒီထက်ပိုလုပ်လို့ရသေးတယ်ဆိုရင်တော့ အသံနဲ့ Memo လုပ်ပြီး ပေးပို့လို့ရပါသေးတယ်။ သေချာတာကတော့ သူတို့ Follow လုပ်လိုက်တဲ့ Account ကတခြား Account လို မဟုတ်ပါလားဆိုတာ သူတို့သိသွားပါလိမ့်မယ်။ ဒါအပြင် သူတို့ရဲ့ပို့စ်တွေမှာ Like ပေးတာ၊ Comment ရေးတာနဲ့ ပို့စ်တွေကို Sharing လုပ်တာကဆက်ဆံရေးပိုကောင်းစေပါတယ်။ ဆိုလိုတာကသူတို့ကိုကိုယ်ကအမှန်တကယ်အလေးထားဆက်ဆံကြောင်း သိစေဖို့ ဖြစ်တယ်လို့ ဂျက်ဆန်ကအကြံပေးထားပါတယ်။
၂။ မေးခွန်းမေးပါ။
လူတွေကနေ့စဉ်နေ့တိုင်း ဆိုရှယ်မီဒီယာကို အချိန်ပေးတာများပါတယ်။ အချိန်တိုင်းသုံးပြီး ဘာကြောင့်သုံးနေတာလဲဆိုတာမသိတော့တဲ့အထိပါပဲ။ ဈေးရောင်းပို့စ်တစ်ခုတင်လိုက်ပေမယ့် ဖုန်းပွတ်တဲ့သူကကျော်သွားပါတယ်။ အဝေးပြေးလမ်းမကြီး နံဘေးကဆိုင်းဘုတ်နဲ့အတူတူပါပဲ။ တွေ့တော့တွေ့ပေမယ့်ဘာမှန်းမသိဘူး ဖြစ်သွားတာပါ။ ဒီလိုအကြောင်းအရာတွေကနေ အွန်လိုင်းဈေးရောင်းတာတွေကျရှုံးသွားတာ မကြာခဏပါပဲလို့ ဂျက်ဆန်ကပြောပါတယ်။
ဖုန်းဆက်တိုက်ပွတ်နေရာကနေ ခဏရပ်ပြီးကိုယ့်ရဲ့ပို့စ်ကိုစိတ်ဝင်စားစေဖို့ဆိုရင် မေးခွန်းမေးရပါမယ်။ ပို့စ်တွေ၊ စတိုရီတွေ၊ ဒါမှမဟုတ် Polls တွေမှာ မေးခွန်းပါတာက သူတို့နဲ့ကိုယ့်အကြားဆက်ဆံရေးကို ပိုမိုအဆင်ပြေစေပါတယ်။ မေးခွန်းတိုင်းကကိုယ့်ရဲ့လုပ်ငန်းနဲ့ တိုက်ရိုက်သက်ဆိုင်ဖို့ မလိုပါဘူး။ မေးခွန်းမေးရာမှာလူတစ်ယောက်ရဲ့အလေ့အကျင့်၊ ကြိုက်နှစ် သက်တာတွေနဲ့ခံစားမှုနဲ့ဆိုင်တဲ့ဟာတွေကို Open-Ended မေးခွန်းပုံစံ မေးပေးရပါမယ်။ ဥပမာ -သင်ကမနက်စောစောထသူလား၊ ဒါမှမဟုတ် ညဇီးကွက်လား၊ ခုတလော ဘာသီချင်းတွေ နားထောင်နေကြသလဲ စသဖြင့်ပေါ့။
၃။ တန်ဖိုးကို ဖော်ပြပါ။
ဒီနေရာမှာ တန်ဖိုးဆိုတာဈေးနှုန်းကိုဆိုလိုချင်တာမဟုတ်ပါဘူး။ ကုန်ပစ္စည်းရဲ့ စံနှုန်းတန်ဖိုးကို ပြောချင်တာဖြစ်ပါတယ်။ ကုန်အမှတ်တံဆိပ်တွေအများစုဟာ သူတို့ရဲ့တန်ဖိုးတွေကိုမဖော်ပြကြပါဘူး။ ဝယ်သူတွေက သူတို့ရဲ့ပိုက်ဆံနဲ့ဝယ်ယူကြတာကြောင့် သူတို့ယုံကြည်လက်ခံလောက်တဲ့ ကုန်အမှတ်တံဆိပ်တွေမှာ ပိုက်ဆံကိုပိုသုံးချင်ကြပါတယ်။ ဒီကုန်ပစ္စည်းကပေးရတာနဲ့တန်ပါ့မလား၊ ဒီအမှတ်တံဆိပ်ကဘာအတွက်ရပ်တည်တာလဲဆိုတာကို ဝယ်သူတွေက သိချင်ကြပါတယ်ဆိုပြီး ဂျက်ဆန်ကရှင်းပြထားပါတယ်။
သင့်ရဲ့ကုန်အမှတ်တံဆိပ်က ဘာကိုဆိုလိုတယ်၊ ဘာအတွက်ရည်ရွယ်တယ်ဆိုတာတွေကို ဖော်ပြ တာက Follower တွေအတွက် ပိုပြီးလေးနက်စေရုံသာမက သူတို့ရဲ့ ခံစားမှုအဆင့်တစ်ခုအထိရောက်ရှိစေပါတယ်။ တန်ဖိုးဖော်ပြလိုက်ခြင်းက ဒီတိုင်းဈေးနှုန်းရေးတင် ရောင်းလိုက်ခြင်းထက် ပိုကောင်းပါတယ်။
၄။ နောက်ကွယ်က အကြောင်းအရာတွေကို ဖော်ပြပါ။
လူတွေက ကိုယ့်ရဲ့ဈေးရောင်းသူ ဘယ်သို့ဘယ်ပုံအလုပ်လုပ်နေတယ်ဆိုတာတွေနဲ့ နောက်ကွယ်ကအကြောင်းအရာတွေကို ပို့စ်တစ်ခုအနေနဲ့သိချင်ကြပါတယ်။ အရာအားလုံးက ပြည့်စုံနေတာမဟုတ်တဲ့အတွက်ကြောင့် ဒါတွေကို တကယ်လည်းဖော်ပြသင့်ပါတယ်။ ဒီကနေတစ်ဆင့် လုပ်ငန်းဖြစ်စဉ်တွေကို သိမြင်ရပြီး Follower တွေအနေနဲ့ လုပ်ငန်းနဲ့ပိုပြီးအကျွမ်းတဝင်ရှိစေပါတယ်။
ကုန်ပစ္စည်းနောက်ကွယ်က အဖြစ်အပျက်တွေကိုဖော်ပြတာက ဖန်တီးမှုနဲ့ဆက်ဆံရေးအကြောင်း အရာနှစ်ခုအတွက် အရေးပါပါတယ်။ ဖန်တီးမှုဆိုတဲ့နေရာမှာ မိမိရဲ့ကုန်ပစ္စည်းနဲ့ဝန်ဆောင်မှုတွေကို ဘယ်လိုလုပ်တယ်ဆိုတာကိုဖော်ပြပြီး ဆက်ဆံရေးဆိုတဲ့နေရာမှာ အတူတွဲလုပ်တဲ့သူတွေအပေါ် မိမိရဲ့ခံစားမှုကို ဖော်ပြပေးပါတယ်။
