၁ ရင်ဘတ်ပိုင်းအကြောလျော့နည်း
အလုပ်လုပ်ချိန်အများစုမှာ အရှေ့ကိုငိုက်ထိုင်ပြီး လုပ်ဖြစ်တာကြောင့် ရင်ဘတ်ရှေ့ပိုင်း အကြောလျော့ခြင်းဟာ ခန္ဓာကိုယ်အတွက် အကောင်းဆုံးလေ့ကျင့်ခန်းတစ်ခု ဖြစ်ပါတယ်။ ဒီနည်းကတော့ လေ့ကျင့်ခန်းသုံးသားရေကြိုးကို အသုံးပြုပြီး ရင်ဘတ်ကြွက်သားတွေ အကြောလျော့နည်းဖြစ်ပါတယ်။ လေ့ကျင့်ခန်းသားရေကြိုးဟာ အားကစားပစ္စည်းဆိုင်တွေမှာ ရရှိနိုင်ပြီး အလုပ်စားပွဲက အံဆွဲထဲမှာ အလွယ်တကူ သိမ်းထားနိုင်ပါတယ်။ နည်းလမ်း - ထိုင်လျက်၊ ဒါမှမဟုတ် မတ်တပ်အနေအထားနဲ့ သားရေကြိုးကို ကိုင်ပြီးလက်ကိုခေါင်းပေါ်သို့ ဆန့်ထုတ်ထားပါ။ လက်ကိုအောက်ကိုပြန်ချတဲ့အခါ သားရေကြိုးကို ဆွဲဆန့်ပြီး ဆယ်စက္ကန့်၊ စက္ကန့် ၃၀ လောက် ဆွဲဆန့်ထားပါ။ ၂ ပခုံးတွန့်လေ့ကျင့်ခန်း
ကွန်ပျူတာရှေ့မှာ တစ်ချိန်လုံး အလုပ်လုပ်နေရသူတွေမှာ ပခုံးနဲ့ဇက်ကြောတွေ တောင့်တင်းပြီး ဝန်ပိစေပါတယ်။ ပခုံးတွန့်တာဟာ ပခုံးကို အညောင်းပြေစေပြီး သွေးလည်ပတ်မှု ကိုလည်း ကောင်းမွန်စေပါတယ်။ နည်းလမ်း - ထိုင်လျက်၊ ဒါမှမဟုတ် မတ်တပ်ရပ်အနေအထားနဲ့ ပခုံးကို နားရွက်ထိ ရောက်အောင် တွန့်နိုင်သမျ တွန့်ထားပါ။ တစ်စက္ကန့်၊ နှစ်စက္ကန့်လောက်ထားပြီး ပခုံးကို မူလအနေအထားအတိုင်း ပြန်ချပါ။ ရှစ်ကြိမ်၊ ဆယ်ကြိမ်လောက် အဲဒီနည်းအတိုင်း ဆက်လုပ်ပါ။ ၃ နောက်ကျောအပေါ်ပိုင်း အကြောလျော့နည်း
ကျောအပေါ်ဘက်ပိုင်းဟာ ဖုန်းကို ပခုံးနဲ့ညှပ်ပြီးပြောတာ၊ Mouse ကို အသုံးပြုတာတွေကြောင့် အကြောတွေ တင်းသွားတတ်ပါတယ်။ ခုနကပြောသွားတဲ့ ပခုံးတွန့်တာဟာ အခု နောက်ကျောဘက်အကြောလျော့နည်းကို ပိုမိုလွယ်ကူစေပါတယ်။ နည်းလမ်း - ထိုင်လျက်၊ ဒါမှမဟုတ် မတ်တပ်ရပ်အနေအထားနဲ့ လက်တွေကို ဆန့်ထားပြီး ကိုယ့်ကိုယ်ကိုယ်ဖက်သလို ညာလက်ဖဝါးကို ဘယ်ဘက်ကျော၊ ဘယ်ဘက်လက် ဖဝါးကို ညာဘက်ကျောပေါ်ကိုရောက်အောင် လက်တွေကိုကွေးလိုက်ပါ။ ဆယ်စက္ကန့်၊ စက္ကန့် ၃၀လောက် ကွေးထားပါ။ ၄ ကျောရိုးတစ်လျောက် အကြောလျော့နည်း
အခုကျောရိုးတစ်လျောက် အကြောလျော့နည်းဟာ အချိန်အတော်ကြာထိုင်တာကြောင့် ကျောအောက်ပိုင်းနဲ့ ခါးနာကျင်တောင့်တင်းသွားတာကို လျော့နည်းသွားစေနိုင်ပါ တယ်။ နည်းလမ်း - ထိုင်လျက်အနေအထားနဲ့ ခြေဖဝါးကို ကြမ်းပြင်ပေါ်ချကာ ကိုယ်ကို ရှေ့ကိုကိုင်းပြီး လက်ကိုအသုံးပြုအားယူကာ ခန္ဓာကိုယ်ကို ညာဘက်ကို လိမ်နိုင်သမျှ လိမ်ကာ ဆယ်စက္ကန့်၊ စက္ကန့် ၃၀ လောက်ထားပါ။ ပြီးရင် ပုံမှန်အနေ အထားပြန်နေပြီး ဘယ်ဘက်ကိုလည်း အဲဒီနည်းအတိုင်းဆောင်ရွက်ပါ။ ၅ ခန္ဓာကိုယ်အပေါ်ပိုင်း အကြောလျော့နည်း
အလုပ်လုပ်နေတဲ့အချိန်မှာ ခန္ဓာကိုယ်အနေအထား မှန်ကန်အောင် ဘယ်လောက်ပဲဂရုစိုက်စိုက် အချိန်ကြာသွားရင် အလိုလို မှီထိုင်မိသွားပြီး ခါးနာလာတတ်ပါတယ်။ ဒီနည်းလမ်းကတော့ နောက်ကျော၊ ကိုယ်လုံးနဲ့ လက်မောင်းမှာရှိတဲ့ ကြွက်သားတွေကို အကြောပြေလျော့စေမှာပါ။ နည်းလမ်း - ထိုင်လျက်၊ ဒါမှမဟုတ် မတ်တပ်အနေအထားနဲ့ လက်ချောင်းတွေကို ယှက်ထား ပြီး လက်ကိုမျက်နှာကြက်ဆီသို့ဆန့်ထုတ်ပါ။ ဆန့်နိုင်သမျ ဆန့်တဲ့အချိန်မှာ အသက်ကို ပြင်းပြင်းရှူသွင်းပါ။ ပြီးနောက် အသက်ရှူထုတ်ကာ လက်တွေကို ခွာပြီးပြန်ချပါ။ ရှစ်ကြိမ်၊ ဆယ်ကြိမ်လောက် လုပ်ပါ။ ၆ လက်ဖျံအကြောလျော့နည်း
ကွန်ပျူတာနဲ့စာရိုက်လွန်းတဲ့အခါ လက်ကောက်နဲ့လက်ဖျံတွေမှာ အကြောတွေတောင့်တင်းနေ တတ်ပါတယ်။ အခုနည်းလမ်းကတော့ လက်ကောက်ဝတ်နဲ့ လက်ဖျံမှာရှိတဲ့ ကြွက်သားတွေ အတွက်ပါ။ နည်းလမ်း - ထိုင်လျက်၊ ဒါမှမဟုတ် မတ်တပ်အနေအထားနဲ့ ညာလက်ကို ဆန့်ထုတ်ပြီး လက်ချောင်းတွေကို အောက်ကိုစိုက်ထားပါ။ ဘယ်လက်နဲ့ အောက်ကိုစိုက်ထားတဲ့ လက်ချောင်း တွေကို မိမိဘက်ဆွဲပါ။ ဆယ်စက္ကန့်၊ စက္ကန့် ၃၀ လောက် ဆွဲထားပါ။ ဘယ်လက်ကိုလည်း အဲဒီနည်းအတိုင်းဆောင်ရွက်ပါ။ ၇ ဇက်ကြောလျော့နည်း
လူအများစုဟာ ကွန်ပျူတာကြည့်တဲ့အခါမှာ ခေါင်းကိုရှေ့တိုးကြည့်တတ်ကြပါတယ်။ ဒါဟာ လည်ပင်းမှာရှိတဲ့ ကြွက်သားတွေကိုဝန်ပိစေပြီး ဇက်ကြောတက်ကာ ခေါင်းကိုက်ခြင်းနဲ့ နောက် ကျောအပေါ်ပိုင်းတွေကိုလည်း ညောင်းညာစေပါတယ်။ နည်းလမ်း - ထိုင်လျက်အနေအထားနဲ့ ကုလားထိုင်ရဲ့ခြေထောက်ကို ညာဘက်လက်နဲ့ ကိုင် ကာ ခေါင်းကိုဘယ်ဘက်ကို ဖြည်းဖြည်းချင်း စောင်းပါ။ လည်ပင်းရဲ့ညာဘက်ခြမ်းနဲ့ ပခုံးက အကြောတွေ ဆန့်သွားတာ ခံစားမိပါလိမ့်မယ်။ ဆယ်စက္ကန့်၊ စက္ကန့် ၃၀ လောက် စောင်း ထားပါ။ နောက်တစ်ဖက်ကိုလည်း အဲဒီနည်းအတိုင်း ဆောင်ရွက်ပါ။ ၈ တင်ပါးဆုံပိုင်းအကြောလျော့နည်း
ပေါင်နဲ့တင်ပါးဆုံပိုင်းတွေဟာ အချိန်အကြာကြီးထိုင်ရတဲ့အခါ ကြွက်သားတွေ တင်းလာပြီး ညောင်းညာစေပါတယ်။ နည်းလမ်း - မတ်တပ်ရပ်အနေအထားနဲ့ ညာဘက်ခြေထောက်ကို အပြေးပြိုင်ခါ နီးအားယူသလို ခြေလှမ်းကျယ်ကျယ် နောက်သို့လှမ်းပါ။ ပြီးရင် ဒူးကိုကွေး ချလိုက်ပါ။ ဆယ်စက္ကန့်၊ စက္ကန့် ၃၀ လောက် ကွေးထားပါ။ နောက်တစ်ဖက်ကိုလည်း အဲဒီနည်းအတိုင်းဆောင်ရွက်ပါ။ ၉ တင်ပါးကြွက်သားများ ထိုင်လျက် အကြောလျော့နည်း
ဒီနည်းလမ်းဟာ တင်ပါးဆုံပိုင်းကြွက်သားအများစုကို အကြောလျော့သွားစေတဲ့နည်းလမ်းပါ။ နည်းလမ်း - ထိုင်လျက်အနေအထားနဲ့ ညာဘက်ခြေကျင်းဝတ်ကို ဘယ်ဘက်ဒူးပေါ် တင်ထားပြီး မတ်မတ်ထိုင်ပါ။ ခါးကိုဆန့်ထားပြီး ညာဘက်တင်ပါးဆုံကြွက်သားတွေ အ ကြောဆန့်သွားတာကို ခံစားမိတဲ့အထိ ဖြည်းဖြည်းချင်းရှေ့ကိုညွှတ်ပါ။ ညာဘက်ဒူးကို အောက် ကို ဖိတွန်းပြီး ကြွက်သားတွေကို ပိုမိုဆန့်ထုတ်နိုင်ပါတယ်။ ဆယ်စက္ကန့်၊ စက္ကန့် ၃၀ လောက် ရှေ့ကိုကုန်းထားပါ။ တခြားတစ်ဖက်ကိုလည်း အဲဒီနည်းအတိုင်းဆောင်ရွက်ပါ။ ၁၀ ပေါင်အတွင်းပိုင်းအကြောလျော့နည်း
ဒီနည်းက စကပ်၊ ထမိန်ဝတ်ထားတဲ့အခါ သိပ်မဆင်မပြေပေမဲ့ ပေါင်အတွင်းပိုင်းကြွက်သားတွေ၊ တင်ပါးဆုံပိုင်းတွေအတွက် ညောင်းညာမှုတွေ ပြေလျော့စေနိုင်တဲ့ နည်းလမ်းကောင်း တစ်ခုဖြစ်ပါတယ်။ နည်းလမ်း - ထိုင်လျက်အနေအထားနဲ့ ခြေထောက်တွေကို ခပ်ကားကားထိုင်ကာ တံ တောင်ကို ပေါင်ပေါ်တင်ပြီး ခါးဆန့်ထားပါ။ ပေါင်အတွင်းပိုင်းကြွက်သားတွေဆန့်သွား တာကိုခံစားမိတဲ့အထိ ခန္ဓာကိုယ်ကို တဖြည်းဖြည်း ရှေ့ကိုကိုင်းကာ တံတောင်တွေကလည်း ခြေထောက်ကို ပိုကားအောင်လုပ်ပါ။ ဆယ်စက္ကန့်၊ စက္ကန့် ၃၀ လောက်ပြုလုပ်ပါ။သွင်ထူး
