Ooredo Myanmar နှင့် သဘောတူစာချုပ်လက်မှတ်ရေးထိုးလိုက်တဲ့ Digicel Asian Holdings

Digicel Group ၊ Yoma Strategic Holdings Ltd နဲ့ First Myanmar Investment Co Ltd (FMI) တို့ ပါဝင်ပြီး YSH Finance Ltd က အသစ်ပြန်လည် ဖွဲ့စည်းလိုက်တဲ့ Digicel Asian Holdings ဟာ Ooredoo Myanmar နဲ့ သဘောတူစာချုပ် လက်မှတ်ရေးထိုးကာ Ooredoo ရဲ့ မြန်မာနိုင်ငံတစ်ဝန်း ကမ္ဘာ့အဆင့်မီ ဆက်သွယ်ရေး ကွန်ရက်တစ်ခု ဖြစ်ပေါ်လာစေဖို့ ဆက်သွယ်ရေးတာဝါတိုင်တွေ ကြိုးပမ်းတည်ဆောက်တဲ့ နေရာမှာ အကောင်အထည်ဖော် တည်ဆောက် ငှားရမ်းသွားမှာဖြစ်ကြောင်း ဒီဇင်ဘာလ ၂ ရက်နေ့က ထုတ်ပြန်ကြေညာခဲ့ပါတယ်။ မြန်မာနိုင်ငံမှာရှိတဲ့ Digicel Asian Holdings ရဲ့ ကုမ္ပဏီဖြစ်တဲ့ Myanmar Tower Company ဟာ မြန်မာနိုင်ငံ မှာ တာဝါတိုင် တည်ဆောက်ရေးလုပ်ငန်းကို ပထမဆုံး စတင်ဆောင်ရွက်တဲ့ ဆက်သွယ်ရေးတာဝါတိုင် ကုမ္ပဏီတွေထဲမှာ တစ်ခုအပါအဝင် ဖြစ်လာပါလိမ့်မယ်။ Myanmar Tower Company ရဲ့ ဘက်စုံငှားရမ်းတဲ့ (multi-tenancy) တာဝါတိုင်တွေကတဆင့် ဆက်သွယ်ရေးကုမ္ပဏီအားလုံးရဲ့ မြန်မာနိုင်ငံတစ်ဝန်း ဆက်သွယ်ရေး လွှမ်းခြုံချိတ်ဆက်မှု လျှင်လျှင်မြန်မြန် တည်ဆောက်နိုင်ရေး ရည်မှန်းချက်ကို အကောင်အထည် ပေါ်လာစေမှာ ဖြစ်ပါတယ်။ အဲဒီ ကြေညာချက်နဲ့ပတ်သက်လို့ Digicel Group ရဲ့ Chairman ဖြစ်တဲ့ Mr. Denis O’Brien က "မြန်မာနိုင်ငံတစ်ဝန်းမှာ အရည်အသွေးမြင့် ဆက်သွယ်ရေး ကွန်ရက်တစ်ခု တည်ဆောက်ပြီး မြန်မာ့စီးပွားရေး ဖွံ့ဖြိုးတိုးတက်စေဖို့နဲ့ ပြည်နယ်၊ တိုင်းဒေသကြီးတွေ၊ ပြည်ထောင်စု နယ်မြေတွေအားလုံးက မြန်မာနိုင်ငံသားတွေကို အကျိုးဖြစ်ထွန်းစေဖို့ ကျွန်တော်တို့က Ooredoo နဲ့ ပူးပေါင်းဆောင်ရွက်ရတာကို ဝမ်းမြောက်မိပါတယ်" လို့ ပြောကြားခဲ့ပါတယ်။ Yoma နဲ့ FMI ရဲ့ ဥက္ကဋ္ဌ Mr. Serge Pun ကလည်း "ဒီနေ့ ကြေညာချက်ဟာ မြန်မာနိုင်ငံရဲ့ စီးပွားရေးနဲ့ လူမှုရေး ဖွံ့ဖြိုးတိုးတက်မှုအတွက် အရေးပါ တဲ့ ခြေလှမ်းတစ်ရပ်ဖြစ်ပါတယ်။ ကျွန်တော်တို့ဟာ ဒေသခံ ကုမ္ပဏီတစ်ခုအဖြစ် အခုလို ဆောင်ရွက်ခွင့်ရတာကို ဝမ်းသာမိသလို နိုင်ငံတော် အစိုးရ၊ တာဝန်ရှိသူတွေ၊ ဆက်သွယ်ရေး အော်ပရေတာတွေ၊ တခြားဒေသခံ ကုမ္ပဏီတွေနဲ့ လက်တွဲဆောင်ရွက်သွားနိုင်ဖို့ မျှော်လင့်မိပါတယ်" လို့ ဆိုပါတယ်။