ဝန်ဆောင်မှုပေးသည်ဖြစ်စေ၊ ကုန်ပစ္စည်းထုတ်လုပ်ရောင်းချသည်ဖြစ်စေ အရေးအကြီးဆုံး လုပ်ငန်းတာဝန်နှစ်ရပ် ရှိသည်။
၁။ ဖောက်သည်အသစ်များရရှိရန်နှင့်
၂။ ဖောက်သည်အဟောင်းတို့က မိမိတို့၏ဝန်ဆောင်မှု၊ သို့မဟုတ် ပစ္စည်းကို များများနှင့် ထပ်ကာထပ်ကာ ဝယ်ယူရန် ဖြစ်သည်။
ဖောက်သည်ဟူသည် လုပ်ငန်းတစ်ခုအတွက် အဓိကဝင်ငွေစီးဝင်ရာ အရင်းအမြစ်ဖြစ်သည်။
ဖောက်သည်မရှိသော စီးပွားရေးလုပ်ငန်းသည် ဆက်လက်ရှင်သန်နိုင်စရာ အကြောင်းမရှိပေ။
ဖောက်သည်သည် စားသုံးသူဘဝဖြင့် အစပြုသည်။
စားသုံးသူအဖြစ်နှင့် ဝန်ဆောင်မှု၊ သို့မဟုတ် ကုန်ပစ္စည်းကို စတင်ဝယ်ယူသုံးစွဲသည်။
စိတ်ကျေနပ်မှုရသည်နှင့်အမျှ ထပ်မံ၍ ဝယ်ယူသုံးစွဲသည်။
ဤသို့လျှင် စွဲမြဲစွာဝယ်ယူအားပေးသော စားသုံးသူသည် ဖောက်သည်ဖြစ်လာရပေသည်။
ဖောက်သည်သည် မိမိလုပ်ငန်း၏ ကြော်ငြာကိုယ်စားလှယ်ဖြစ်သည်။
ပိုမိုစွဲမြဲသောဖောက်သည်သည် မိမိလုပ်ငန်းအတွက် ရှေ့နေလိုက်ပေးသည်။
ထို့ကြောင့် အမြော်အမြင်ရှိသော လုပ်ငန်းအဖွဲ့အစည်းတို့တွင် ဖောက်သည်ကို ဗဟိုပြု၍ လုပ်ငန်းလည်ပတ်သည်။
ဖောက်သည်၏အသံကို နားထောင်သည်။
ဖောက်သည်နှင့် ထိတွေ့ဆက်ဆံရသူများကို အလေးထားသည်။
ဖောက်သည်စိတ်ကျေနပ်ရေးသည် ပထမဦးစားပေးဖြစ်သည်။
လုပ်ငန်းအဖွဲ့အစည်းတို့သည် မိမိတို့၏ ဖောက်သည်ဗဟိုပြု ဝန်ဆောင်မှုစံနှုန်းများကို ပြန်လည်စိစစ်သင့်သည်။ ပိုမိုတိုးတက်မှုရှိရန် အားထုတ်ရမည်။
ဖောက်သည်စိတ်ကျေနပ်မှု ရှေးရှုသော သေးငယ်သည့်အပြောင်းအလဲလေးကပင်လျှင် ကြီးစွာသောအောင်မြင်မှုရလဒ်ကို ပေးစွမ်းနိုင်ပါသည်။
အယ်ဒီတာ
