မြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်းချုပ် (UMFCCI) နဲ့ confexhub တို့ပူးပေါင်းကြီးမှူးကျင်းပတဲ့ Myanmar Agribusiness Investment Summit 2014 ကို ၂၀၁၄ ခုနှစ်၊ ဇန်နဝါရီလ ၂၁ရက်မှ ၂၂ ရက်အထိ နှစ်ရက်တိတိ Inya Lake Hotel မှာ ကျင်းပနေပါတယ်။ အဆိုပါ Summit ဖြစ်မြောက်ရေးအတွက် Sime Darby Seeds & Agricultural Services Sdn Bhd နဲ့ International Tractors Limited တို့က ပူးပေါင်းကူညီပံ့ပိုးပေးခဲ့ကြပါတယ်။ အဆိုပါ Summit ပထမနေ့ဖြစ်တဲ့ ဇန်နဝါရီလ ၂၁ ရက်နေ့မှာ မြန်မာနိုင်ငံကုန်သည်များနှင့်စက်မှုလက်မှုလုပ်ငန်းရှင်များအသင်းချုပ် ဥက္ကဋ္ဌ ဦးဝင်းအောင်က အဖွင့်အမှာစကားပြောကြားခဲ့ရာ စိုက်ပျိုးမွေးမြူရေးလုပ်ငန်းတွေဟာ တစ်ခြား နေ့ချင်းညချင်းရင်းနှီးမြုပ်နှံလို့ မရတဲ့အတွက် အချိန်အတိုင်းအတာတစ်ခုထိ စောင့်ကြည့်ဖို့ လိုအပ်ပြီး နိုင်ငံတကာကဝင်လာတဲ့ ရင်းနှီးမြုပ်နှံချင်သူတွေ၊ အလားအလာတွေကို ကြိုဆိုလက်ခံရမှာ ဖြစ်တယ်လို့ ဆိုပါတယ်။ အဲဒီနောက် Confexhub Group ရဲ့ Executive Advisor ဖြစ်တဲ့ Mr Hishamuddin Koh က နှုတ်ခွန်းဆက်စကားပြောကြား ခဲ့ပါတယ်။ လယ်ယာစိုက်ပျိုးရေးနှင့် ဆည်မြောင်းဝန်ကြီးဌာန ဝန်ကြီး ဦးမြင့်လှိုင်ကိုယ်စား ဦးရဲမြင့်ထွန်းက မြန်မာ့လယ်ယာစီးပွားရေးဖွံ့ဖြိုးတိုးတက်မှုအခြေအနေများကို တင်ပြခဲ့ပြီး စီးပွားရေးဆိုင်ရာသမ္မတအကြံပေးနဲ့ ဗဟိုစီးပွားရေးဖွံ့ဖြိုးတိုးတက်ရေးဆိုင်ရာ ညွန်ကြားရေးမှူး ဦးစိန်လှဘိုက Challenges and opportunities in Myanmar Agribusiness Sector As A Social Economic Contribution For Rural And National Development စာတမ်းကို တင်ပြသွားခဲ့ပါတယ်။ အဲဒီနောက် လယ်ယာစိုက်ပျိုးရေးကဏ္ဍတစ်ခုချင်းစီရဲ့ ကဏ္ဍအလိုက် ရင်းနှီးမြုပ်နှံမှုဆိုင်ရာအခွင့်အလမ်းတွေ၊ မူဝါဒတွေ၊ အခွန်ကဏ္ဍနဲ့ လက်ရှိအခြေအနေတွေကိုလည်း စာတမ်းများနဲ့ ဆွေးနွေးတင်ပြကြပြီး မေး၊ဖြေအစီအစဉ်များဆက်လက် ပြုလုပ်ခဲ့ပါတယ်။
