အလုပ်မှာ ထင်ရှားချင်တယ်ဆိုရင် ကောင်းတဲ့ရည်ရွယ်ချက်အတွက်ပဲဖြစ်သင့်ပါတယ်။ အလုပ်ရှင်ရဲ့ ယုံကြည်မှုရရှိဖို့က အရေးကြီးပါတယ်။ ဒါမှလည်း သူကပိုကြီးတဲ့တာဝန်ကို အပ်နှင်းပြီးတော့ အဲဒီကတစ်ဆင့် ရာထူးတိုး၊ လစာတိုးတာတွေ ခံစားရမှာဖြစ်ပါတယ်။ အောက်ဖော်ပြပါအချက်တွေက ကိုယ့်အလုပ်ရှင်ရဲ့ ယုံကြည်မှုကိုခံရမယ့် နည်းလမ်း ၉ ခုပဲဖြစ်ပါတယ်။
လျော်ညီတဲ့ ရုံးကျင့်ဝတ်တွေကို သုံးပါ
------------
ရုံးကချမှတ်ထားတဲ့ စည်းမျဉ်းကျင့်ဝတ်တွေကို လုပ်ဖော်ကိုင်ဖက်တွေ လိုက်နာသလိုပဲ ကိုယ်က လိုက်နာမယ်ဆိုရင် အလုပ်ရှင်က ကိုယ့်ကိုသဘောကျမှာဖြစ်ပါတယ်။ ဥပမာအနေနဲ့ ဆဲလ်ဖုန်းကို လိုက်လျောညီထွေရှိစွာသုံးတတ်မယ်၊ စားသောက်တဲ့အခါ ကောင်းကောင်းပြုမူတတ်မယ်၊ အလုပ်သဘော အီးမေးလ်ရေးပုံရေးနည်းနဲ့ အလုပ်မှာ ဖုန်းသုံးပုံသုံးနည်းတွေကို သိရမယ်။
အမှားလုပ်ထားရင် ဝန်ခံပါ
------------------
အလုပ်မှာ အမှားလုပ်မိထားတယ်ဆိုရင် ဝန်ခံလိုက်ပါ။ ဒီလိုပဲ တစ်ခါတလေမှာ လူတိုင်း မလွှဲသာမရှောင်သာ အမှားလုပ်မိတတ်ကြပါတယ်။ အမှားကို လျစ်လျူရှုပြီး သူများအပေါ်အပြစ်ဖို့တာမျိုးမလုပ်သင့်ပါဘူး။ အဲဒီလို လုပ်မယ့်အစား ကိုယ့်အမှားအတွက် တာဝန်ယူပြီး ပြင်ဆင်ဖို့ နည်းလမ်းရှာရပါမယ်။ အမှားလုပ်မိတဲ့အတွက် အလုပ်ရှင်က သဘောမကျဘူးဖြစ်နိုင်ပါတယ်၊ ဒါပေမဲ့ အဲဒီအပေါ် ကိုယ်က ကောင်းကောင်းမွန်မွန် တုံ့ပြန်ပေးမယ်ဆိုရင် အသိအမှတ်ပြုခံရမှာဖြစ်ပါတယ်။
နေမကောင်းလို့ ရုံးမလာနိုင်ကြောင်းကို ဖုန်းဆက်ပြောသင့်ရင် ဖုန်းဆက်ပါ
----------------
နေမကောင်းဖြစ်နေပေမယ့် အိမ်မှာမနေဘဲ ရုံးလာတာက အလုပ်ရှင်ရဲ့ လေးစားမှုကိုရရှိမယ်လို့ ထင်နေပါသလား။ နေမကောင်းဖြစ်နေတဲ့ဝန်ထမ်းတစ်ယောက်က လုပ်နိုင်စွမ်းတွေမရှိရုံသာမက ရုံးမှာရှိတဲ့သူတွေကိုလည်း နေမကောင်းတာတွေပြန့်သွားနိုင်တယ်ဆိုတာကို အကျိုးအကြောင်းသိတဲ့ အလုပ်ရှင်တွေက နားလည်ပါတယ်။ ဒါကြောင့် နေမကောင်းကြောင်း မဖြစ်မနေ ဖုန်းဆက်ပြောရမယ်ဆိုရင် ပြောပါ။
ဒါကို ကိုယ့်အလုပ်ရှင်နဲ့ လုပ်ဖော်ကိုင်ဖက်တွေက သဘောကျမှာဖြစ်ပါတယ်။
ပြဿနာတွေကို ရင်ဆိုင်ဖြေရှင်းပါ
----------------
အလုပ်မှာ မမျှော်လင့်ထားတဲ့ တစ်စုံတရာဖြစ်တဲ့အခါမှာ အလုပ်ရှင်ရဲ့ လေးစားယုံကြည်မှုပိုရနိုင်တဲ့သူက ကြောက်ရွံ့ထိတ်လန့်နေသူလား၊ ဒါမှမဟုတ် ရင်ဆိုင်ဖြေရှင်းတတ်သူလား။ ပြဿနာကို လျင်လျင်မြန်မြန်နဲ့ အကျိုးရှိရှိ ဖြေရှင်းတတ်သူကိုတော့ အလုပ်ရှင်က ပိုပြီးအထင်ကြီးမှာတော့သေချာပါတယ်။
မဆွေးနွေးသင့်တဲ့ အကြောင်းအရာတွေကိုသိပါ
------------------
တခြားသူတွေကို စိတ်အနှောင့်အယှက်ဖြစ်စေနိုင်တဲ့၊ ဒါမှမဟုတ် အလုပ်ခွင်မှာ ရုန်းရင်းဆန်ခတ်ဖြစ်စေနိုင်တဲ့ အကြောင်းအရာတွေကို ပြောလေ့ရှိတယ်ဆိုရင် အလုပ်ရှင်က ကိုယ့်ကိုအမြင်ကြည်မှာမဟုတ်သလို အထင်ကြီးမှာလည်း မဟုတ်ပါဘူး။ လုပ်ငန်းခွင်မှာ ပြောဆိုဆက်ဆံမှုကောင်းမဖြစ်စေတဲ့ အကြောင်းအရာတွေက နိုင်ငံရေး၊ ဘာသာရေး၊ ကျန်းမာရေးပြဿနာနဲ့ တခြားပုဂ္ဂိုလ်ရေးပြဿနာတွေကို ခဏခဏဆွေးနွေးမှုတွေဖြစ်ပါတယ်။
အချိန်ကို အကျိုးရှိရှိစီမံပါ
---------
လုပ်ရမယ့်တာဝန်တွေကို အချိန်ကိုက်ပြီးနိုင်ရင် အလုပ်ရှင်က ကိုယ့်ကိုအထင်ကြီးမှာဖြစ်ပါတယ်။ ဒါကြောင့် ဖြစ်နိုင်မယ်ဆိုရင် သတ်မှတ်ရက်မတိုင်ခင် အချိန်မီတာဝန်တွေ ပြီးအောင်လုပ်ခြင်းအားဖြင့် အချိန်ကိုအကျိုးရှိရှိ စီမံနိုင်တယ်ဆိုတာ သိကြောင်းပြသသင့်ပါတယ်။
လိုက်လျောညီထွေရှိစွာ ဝတ်ဆင်ပါ
------------
အလုပ်နဲ့ကိုက်ညီတဲ့ အဝတ်ဝတ်ဆင်တာ၊ အရေးကြီးဆုံးက လိုက်လျောညီထွေမှုမရှိတဲ့ အဝတ်အစားတွေ မဝတ်တာက အလုပ်ရှင်ရဲ့အမြင်ကြည်မှုကို ရမှာဖြစ်ပါတယ်။ ကိုယ်လုပ်ရမယ့်တာဝန်နဲ့ လိုက်လျောညီထွေဖြစ်အောင် ဝတ်စားဆင်ယင်သင့်ပါတယ်။ အလုပ်မှာ ခေါင်းဆောင်တစ်ဦး ဖြစ်ချင်စိတ်ရှိတယ်ဆိုရင် အဲဒီလိုပုံစံဝတ်ဆင်ပါ။
လုပ်ဖော်ကိုင်ဖက်တွေကို စိတ်ကသိကအောက်ဖြစ်စေတာကို ရှောင်ပါ
---------------
ကိုယ့်လုပ်ဖော်ကိုင်ဖက်တွေကို စိတ်ကသိကအောက်ဖြစ်စေတဲ့ အရာတွေမလုပ်ဘူးဆိုရင် အလုပ်ရှင်က သဘောကျမှာပါ။ သူတို့တွေကို အမြဲတမ်းလေးစားမှုပြသပါ။
လုပ်ငန်းအစည်းအဝေးတွေမှာ ကိုယ့်ကုမ္ပဏီကို ကောင်းကောင်းကိုယ်စားပြုပါ
----------------
အလုပ်ရှင်ကိုယ်စား လုပ်ငန်းအစည်းအဝေးတစ်ခုကို တက်ရောက်ရတယ်ဆိုရင် လေးစားမှု ရစေမယ့်အရာမှန်သမျှကို ကိုယ်က ပြုမှုလုပ်ဆောင်တယ်ဆိုရင် အလုပ်ရှင်က အထင်ကြီးမှာဖြစ်ပါတယ်။ လိုက်လျောညီထွေရှိစွာ ဝတ်ဆင်ပါ၊ အလုပ်ရှင်ကိုယ်စား တခြားသူတွေနဲ့ပြောဆိုဆက်ဆံပြီးတော့ သတင်းအချက်အလက်တွေကို ယူဆောင်လာပါ။
