အားကစားပစ္စည်းအရောင်းဆိုင်၊ ကော်ဖီဆိုင်၊ ဆံသဆိုင်အစရှိတဲ့ စီးပွားရေးလုပ်ငန်းတွေဟာ Customer တွေကို ပုံမှန်ဖောက်သည်တွေ ဖြစ်လာအောင် ဆွဲဆောင်နေကြပါတယ်။ ကုမ္ပဏီတွေဟာလည်း Customer တွေ ကိုယ့်ဆီကို အမြဲလိုလိုပြန်လာအောင် နည်းလမ်းမျိုးစုံနဲ့ ကြိုးစားနေကြပါတယ်။
ကိုယ့်ရဲ့ဝန်ဆောင်မှုကို စိတ်တိုင်းကျပြီး အစဉ်တစိုက်အားပေးနေတဲ့ Customer တွေကို ကျေးဇူးတင်ကြောင်းတွေ၊ နေ့စဉ်တွေ့ကြုံနေကျဖြစ်တဲ့ အရေးမကြီးတဲ့၊ မထူးဆန်းတဲ့ အကြောင်းအရာတွေကို နိစ္စဓူ၀ တဖွဖွသွားပြောနေရင် သူတို့ကို လက်လွတ်ဆုံးရှုံးသွားနိုင်ပါတယ်။ ကိုယ့်ဆီကို Customer တွေ အစဉ်တစိုက် ပြန်လာဖို့ လုပ်ရတာဟာ ခက်ခဲတယ်လို့ ဆိုနိုင်ပေမယ့် Customer တွေကနေ ပုံမှန်ဖောက်သည်တွေ ဖြစ်လာစေဖို့ နည်းလမ်းရှစ်မျိုးကို ဖော်ပြလိုက်ပါတယ်။
ဖောက်သည်ရဖို့ဆိုရင် ပထမဆုံးအနေနဲ့အကောင်းဆုံးဝန်ဆောင်မှုတွေ၊ ကုန်ပစ္စည်းတွေ ပံ့ပိုးပေးရပါမယ်။ ဒါတွေ မပံ့ပိုးပေးဘဲနဲ့တော့ ခိုင်မာတဲ့ရင်းနှီးမှုကို တည်ဆောက်နိုင်မှာ မဟုတ်သလို ဖောက်သည်တွေ ရလာမှာလည်း မဟုတ်ပါဘူး။ Customer တွေဟာ သူတို့ရဲ့ လိုအပ်ချက်တွေကို ဖြည့်ဆီးပေးနိုင်သူတွေဆီမှာပဲ ရှိနေမှာဖြစ်ပါတယ်။
၁။ လူတွေဟာ ကိုယ်ဘာပြောတယ်၊ ဘာလုပ်တယ်ဆိုတာထက် သူတို့ကိုဘယ်လိုဆက်ဆံတယ်ဆိုတာကို ပိုမှတ်မိတယ်ဆိုတဲ့ ဆိုရိုးစကားတစ်ခုရှိပါတယ်။ ဆိုင်ကို ဝင်လာတဲ့လူတွေကို အလွတ်ကျက်ထားတဲ့ နှုတ်ခွန်းဆက်စကားကို ရွတ်ပြမယ့်အစား နွေးနွေးထွေးထွေးနဲ့ ရိုးရိုး ရှင်းရှင်းလေး ပြုံးပြနှုတ်ဆက်တာက ကောင်းမွန်တဲ့တုံ့ပြန်မှုကို ရရှိစေပါတယ်။
၂။ Customer တွေ အလွယ်တကူ ဆက်သွယ်နိုင်အောင် လမ်းဖွင့်ပေးထားပါ။ ကိုယ့် Customer တွေကို ဘာတွေထပ်ပြီး ပံ့ပိုးပေးနိုင်မလဲဆိုတာနဲ့ Customer တွေ ပိုရလာအောင် ဘယ်လိုလုပ်နိုင်မလဲဆိုတာတွေကို အမြဲလေ့လာပါ။ Customer တွေနဲ့ ပြောဆိုဆက်ဆံတဲ့အခါမှာ Social Media App တွေပဲ သုံးသုံး၊ မျက်နှာချင်းဆိုင်ပဲ ပြောပြော သူတို့တင်ပြလာတာတွေကို သေချာလက်ခံ နားထောင်ပြီး ကောင်းမွန်တဲ့တုန့်ပြန်မှုမျိုး ပြန်ပေးဖို့ လိုပါတယ်။
၃။ ကိုယ်က Customer ကို ဂရုစိုက်တယ်ဆိုတာကို သူတို့သိအောင်လုပ်ပါ။ ဥပမာ- ဆိုင်မှာ Customer တစ်ယောက်ရဲ့ အကြိုက်ဆုံးကုန်ပစ္စည်းအမျိုးအစား တစ်ခုဟာ ပစ္စည်းပြတ်တော့မယ်၊ နောက်ထပ်ရဖို့လည်း သိပ်မသေချာတော့ဘူးဆိုရင် သူ့ဆီကို ဒီကုန်ပစ္စည်း မကုန်ခင် ဝယ်ထားချင်ဝယ်ထားနိုင်အောင် ဖုန်းဆက်ကမ်းလှမ်းတာမျိုး ပြုလုပ်သင့်ပါတယ်။
၄။ ကျေးဇူးတင်ပါတယ်ဆိုတဲ့ စကားလုံးကို လက်ရေးနဲ့ရေးပေးတာ၊ Message ပို့ပေးတာ၊ မွေးနေ့မှာ အမှတ်တရ လက်ဆောင်ပို့ပေးတာတွေက Customer နဲ့ ခိုင်မာတဲ့ရင်းနှီးမှုကို တည်ဆောက်ရာမှာ အမှန်တကယ် အသုံးဝင်ပါတယ်။ ဟိုတယ်မန်နေဂျာတွေဟာဆိုရင် Customer တွေရဲ့ မွေးနေ့တွေ၊ အမှတ်တရ နှစ်ပတ်လည်နေ့တွေကိုမှတ်ထားပြီး အဲဒီနေ့တွေမှာ လက်ဆောင်တွေ၊ ဆုတောင်းစာတို ပို့ပေးတာမျိုးတွေကို ပြုလုပ်လေ့ရှိပါတယ်။
၅။ လူတော်တော်များများဟာ ကုန်ပစ္စည်း၊ ဒါမှမဟုတ် ဝန်ဆောင်မှုနဲ့ ပတ်သက်ပြီး မကျေနပ်မှသာ ဝေဖန်ကြလေ့ရှိပါတယ်။ ဒါပေမဲ့ Customer တွေကို ကိုယ့်ရဲ့ကုန်ပစ္စည်း၊ ဒါမှမဟုတ် ဝန်ဆောင်မှုနဲ့ပတ်သက်လို့ ဘယ်လိုသဘောရှိလဲ၊ ကျေနပ်မှုရှိရဲ့လားဆိုတာကို ပြောထွက်စေဖို့ အခွင့်အလမ်းတွေ ဖန်တီးပေးတာက ကိုယ့်လုပ်ငန်းကို ပိုအောင်မြင်အောင်လုပ်ဖို့ လိုနေသေးတာတွေကို မြင်သာလာစေရုံတင်မကဘဲ ပုံမှန်ဖောက်သည်တွေလည်း တိုးလာစေမှာ ဖြစ်ပါတယ်။ သူတို့ကို အလေးထားတယ်ဆိုတာကို ဖော်ပြနိုင်ဖို့ သူတို့ရဲ့ အကြံဉာဏ်အတိုင်း ဆောင်ရွက်လိုက်တယ်ဆိုတာကိုလည်း သူတို့သိအောင် လုပ်ပြသင့်ပါတယ်။
၆။ ကိုယ်က Customer တွေကို ကုန်ပစ္စည်းအမျိုးအစား အများကြီးရှိတဲ့အထဲက ဘယ်တစ်ခုကို ရွေးသင့်တယ်ဆိုတာကို အကြံပြုပြီး ကူညီရွေးချယ်ပေးရမယ့်အခြေအနေမျိုးမှာ သူတို့ကို ကုန်ပစ္စည်းတစ်ခုချင်းစီရဲ့ ဈေးနှုန်းနဲ့ အရည်အသွေးတွေက ဘယ်လိုကွာခြားတယ်ဆိုတာကို နှိုင်းယှဉ်ပြပြီး ရွေးချယ်စေသင့်ပါတယ်။ Customer ကို ဈေးကြီးတာကို ရွေးဖို့ပဲ အကြံပေးတာမျိုး မလုပ်သင့်ဘဲ သူလိုအပ်နေတာက ဘာလဲဆိုတာကိုသိအောင် အာရုံစိုက်သင့်ပါတယ်။ မဟုတ်ရင် Customer က ကိုယ်ဟာ သူတို့ရဲ့လိုအပ်ချက်တွေကို တကယ်ဂရုမစိုက်ဘဲ ပစ္စည်းရောင်းရဖို့ကိုပဲ အာရုံစိုက်နေတယ်လို့ မြင်သွားပါလိမ့်မယ်။
၇။ ကိုယ့်ဝန်ဆောင်မှုကို ကျေနပ်သွားတဲ့ Customer ဟာ ကိုယ့်လုပ်ငန်းကို သူ့မိတ်ဆွေ၊ မိသားစုတွေကို ပြန်ကြော်ငြာပေးဖို့ အသင့်ရှိနေမှာ ဖြစ်တာကြောင့် သူတို့ကို တခြားသူတွေကိုပြောပေးပါဦးဆိုပြီး အကူအညီတောင်းဖို့ အားမနာပါနဲ့။
၈။ ကိုယ့် Customer တွေရဲ့ လုပ်ငန်းတွေဆီ အလည်သွားပြီး ကိုယ်ဟာလည်း သူတို့ရဲ့ Customer တစ်ယောက်ဖြစ်တယ်ဆိုတာမျိုး သူတို့သိအောင် လုပ်သင့်ပါတယ်။
