မေလ ၁၀ ရက်နေ့၊ ၂၀၁၄ ခုနှစ်၊ နေပြည်တော် - ဒေသတွင်း တင်းမာမှုများကိုတိုးပွားစေသည့် ဆက်လက်ဖြစ်ပွားနေသော တောင်တရုတ်ပင်လယ်အရေးကိစ္စများအပေါ် အလေးအနက်စိုးရိမ်ပူပန်မိကြောင်း အာဆီယံနိုင်ငံခြားရေးဝန်ကြီးများက နေပြည်တော်တွင် မေလ ၁၀ ရက်နေ့မှ ၁၁ ရက်နေ့အထိကျင်းပသည့် 24th ASEAN SUMMIT တွင် သဘောထားထုတ်ပြန်ခဲ့သည်။ ပင်လယ်ရေပိုင်နက်ဆိုင်ရာဥပဒေနှင့်ပတ်သက်ပြီး ၁၉၈၂ ခုနှစ် ကမ္ဘာ့ကုလသမ္မဂပဋိညာဉ်စာချုပ်အပါအဝင် တစ်ကမ္ဘာလုံးက အသိအမှတ်ပြုလက်ခံထားသည့် နိုင်ငံတကာဥပဒေစည်းမျဉ်းစည်းကမ်းများနှင့်အညီ မိမိကိုယ်ကိုယ်ထိန်းချုပ်ရန်၊ ဒေသတွင်းငြိမ်းချမ်းတည်ငြိမ်မှုကို အနှောင့်အယှက်ဖြစ်စေမည့် လုပ်ရပ်များကို ရှောင်ကြဉ်ရန်နှင့် အငြင်းပွားမှုများကို အင်အားသုံးခြိမ်းခြောက်ခြင်းမပြုဘဲ ငြိမ်းချမ်းသည့်နည်းလမ်းများနှင့်ဖြေရှင်းရန် ဝန်ကြီးများက တိုက်တွန်းခဲ့သည်။ ဆက်လက်ပြီး တည်ငြိမ်အေးချမ်းမှုကို ထိန်းသိမ်းစောင့်ရှောက်ခြင်း၊ ရေကြောင်းလုံခြုံရေး၊ တောင်တရုတ်ပင်လယ်တွင် ရေကြောင်းနှင့် လေကြောင်းဆိုင်ရာ လွတ်လပ်စွာမောင်းနှင်ပျံသန်းခွင့်၊ တောင်တရုတ်ပင်လယ်ဆိုင်ရာ အာဆီယံ၏ မူဝါဒ ၆ ချက်နှင့် တောင်တရုတ်ပင်လယ်တွင် Delcaration on the Conduct of Parties(DOC) ကြေညာချက် ဆယ်နှစ်ပြည့်အခမ်းအနားတွင် ၁၅ ကြိမ်မြောက် အာဆီယံ-တရုတ်ထိပ်သီးဆွေးနွေးပွဲမှ ထုတ်ပြန်ခဲ့သည့် ပူးတွဲသဘောထားထုတ်ပြန်ချက်တို့ကို လေးစားလိုက်ရန် အရေးကြီးကြောင်း ဝန်ကြီးများက ထပ်မံအတည်ပြုပြောကြားခဲ့သည်။ အပြန်အလှန်ယုံကြည်မှုရှိသည့် ဝန်းကျင်တစ်ရပ်ကိုဖန်တီးရန်အတွက် ဒေသတွင်းနိုင်ငံအားလုံးအနေဖြင့် DOC ကို ပြည့်ပြည့်၀၀နှင့် ထိထိရောက်ရောက် အကောင်အထည်ဖော်ဆောင်ရွက်ရန်လည်း ဝန်ကြီးများက တိုက်တွန်းပြောကြားသည်။ တောင်တရုတ်ပင်လယ်တွင် Code of Conduct (COC) ကို ဆောလျှင်စွာ သုံးသပ်ချက်ထုတ်ဖော်နိုင်ရန်အတွက် မြန်ဆန်ထိရောက်စွာ လုပ်ဆောင်ဖို့လိုအပ်ကြောင်းကိုလည်း အလေးထားပြောကြားခဲ့သည်။
