၂၄ ကြိမ်မြောက်အာဆီယံထိပ်သီးအစည်းအဝေး(မျက်နှာစုံညီ)ကို မေလ ၁၁ ရက်နေ့၊ မနက် ဆယ်နာရီခွဲမှာ နေပြည်တော်ရှိ MICC-I မှာ ကျင်းပခဲ့ပါတယ်။ အဆိုပါအစည်းအဝေးမှာ အာဆီယံနိုင်ငံရေးနဲ့ လုံခြုံရေးအသိုက်အဝန်းကောင်စီရဲ့ အစီရင်ခံစာ၊ အာဆီယံစီးပွားရေးအသိုက်အဝန်းကောင်စီရဲ့ အစီရင်ခံစာ၊ အာဆီယံလူမှုရေးနဲ့ ယဉ်ကျေးမှုအသိုက်အဝန်းကောင်စီရဲ့ အစီရင်ခံစာ၊ အာဆီယံ အတွင်းရေးမှူးချုပ်ရဲ့ အာဆီယံအသိုက်အဝန်းအကောင်အထည်ဖော်မှုဆိုင်ရာ အစီရင်ခံစာနဲ့ အာဆီယံဖောင်ဒေးရှင်းရဲ့ အမှုဆောင်ညွှန်ကြားရေးမှူးကတင်သွင်းတဲ့ အစီရင်ခံစာ စတဲ့ အစီရင်ခံစာငါးစောင်ကို မှတ်တမ်းတင်ခဲ့ပါတယ်။ အစည်းအဝေးမှာ နိုင်ငံတော်သမ္မတ ဦးသိန်းစိန်က အာဆီယံအဖွဲ့အတွင်း စည်းလုံးညီညွတ်မှုကိုပြသပြီး ဒေသတွင်းငြိမ်းချမ်းရေးနဲ့ တည်ငြိမ်ရေးကို ကြိုးစားဖော်ဆောင်ရန်၊ ဒေသတွင်းဖွံ့ဖြိုးတိုးတက်မှုကွာဟချက်ကို လျော့နည်းစေပြီး မျှတတဲ့စီးပွားရေးဖွံ့ဖြိုးတိုးတက်မှုကို ဖော်ဆောင်ကာ အလုံးစံလွှမ်းခြုံတဲ့ ဖွံ့ဖြိုးတိုးတက်မှုကို ရရှိအောင်ဆောင်ရွက်ရန်၊ အာဆီယံအဖွဲ့အစည်းဆိုင်ရာ စွမ်းဆောင်ရည် ပြည့်ဝစေရန်၊ ဒေသတွင်းရင်ဆိုင်နေရတဲ့ စိန်ခေါ်မှုနဲ့ ပြောင်းလဲမှုတွေကို ရင်ဆိုင်နိုင်စွမ်းမြှင့်တင်ရန် တိုက်တွန်းပြောကြားခဲ့ပါတယ်။ 
