စိတ်ကျေနပ်မှုရှိသည့် ဖောက်သည်များလေ လုပ်ငန်း၊ သို့မဟုတ် အဖွဲ့အစည်းတစ်ခုသည် ပိုမိုတိုးတက်ခိုင်မာလေဖြစ်သည်။ သို့ရာတွင် စိတ်ကျေနပ်မှုရှိသည့် ဖောက်သည်မဆိုထားနှင့်၊ စားသုံးသူဘဝမှသည် ပုံမှန်ဖောက်သည်ဘဝသို့ရောက်အောင်ပင် များစွာအားထုတ်ကြရသည်။
ငွေကြေး၊ လုံ့လ၊ ဂရုစိုက်မှု၊ အချိန် စသည်ဖြင့် အရင်းအနှီးများစွာ စိုက်ထုတ်ရပါသည်။ ထိုမှတစ်ဆင့် နားလည်ရင်းနှီးမှု ရလာသောဖောက်သည်ကို ကြာရှည်ခိုင်မြဲရန်၊ ထိန်းသိမ်းထားနိုင်ရန် ကျားကုတ်ကျားခဲ ကြိုးပမ်းရပြန်ပါသည်။ ဤသို့လုပ်ဆောင်ရာတွင် ဖောက်သည်သည် အဓိကဟု နားလည်ဆောင်ရွက်နေသော လုပ်ငန်းအတော်များများသည်ပင်လျှင် ဖောက်သည်ကျေနပ်ရန်၊ မြဲရန် အတိုင်းအတာတစ်ခုအထိသာ လုပ်ကိုင်ဆောင်ရွက်နိုင်ကြသည်။ ဖောက်သည်သည်သာ ပဓာနဟူသည်ကို အပြည့်အ၀ မဖော်ဆောင်နိုင်ကြသေးပါ။
ဤသို့လုပ်ကိုင်ဖော်ဆောင်ရန် အခြေအနေမပေးခြင်း၊ လုံလောက်သောကျွမ်းကျင်မှု၊ အတွေ့အကြုံနှင့် စီမံခန့်ခွဲမှုအားနည်းခြင်းတို့မှာ လက်ရှိအချိန်တွင် အများဆုံးကြုံတွေ့နေရသော ပြဿနာများပင်ဖြစ်သည်။
ထို့အပြင် ဖောက်သည်သည် အဓိကဆိုသောစိတ်အခြေခံကို လုပ်ငန်းတွင် ပါဝင်ပတ်သက်နေသူများအား သိရှိနားလည်အောင် မလုပ်နိုင်သေးသည့်လုပ်ငန်းများလည်း ရှိနေသေးသည်။
နိုင်ငံတကာစီးပွားရေးစံနှုန်းများနှင့် အသားကျပြီးသည့်လုပ်ငန်းတို့ဖြင့် ယှဉ်ပြိုင်ရမှု များလာသည့်ယခုအချိန်တွင် မိမိတို့၏ဖောက်သည်အပေါ် သဘောထားနှင့် စီစဉ်ဆောင်ရွက်မှုများကို ပြန်လည်သုံးသပ်သင့်ပါသည်။ မိမိလုပ်ငန်းအဖွဲ့အစည်းသည် ဖောက်သည် ဗဟိုပြုသော အဖွဲ့အစည်းစစ်စစ် ဖြစ်ပါသလား၊ ဆုံးဖြတ်လုပ်ကိုင်ဆောင်ရွက်မှုများသည် ဖောက်သည် စိတ်ကျေနပ်မှုကို ရှေးရှုပါသလား စသည်ဖြင့် ပြန်လည်သုံးသပ်သင့်ပါသည်။
မိမိဖောက်သည်တို့အတွက် မည်သို့သောအကောင်းဆုံးတန်ဖိုးများကို ပေးဆပ်မည်။ ထို့အတွက် မည်သို့ပြင်ဆင်စီမံမည်ကို သုံးသပ်လုပ်ဆောင်ရမည့် အချိန်ရောက်နေပြီဖြစ်သည်။
အယ်ဒီတာ
